الأربعاء، 18 يونيو 2008

ازاى تــــــــــــــدلع مــــــــــــــــــــــــراتك



طبعا نظرا للاقبال الشديد على نصايحى الجهنميه اللى تودى فى داهيه حبيت اكون محايده وابقى النهارده مع الفريق التانى "الرجاله"....كمان انا هاكتب البوست ده غيظ فى احسان اللى قالى كفايه عليكى نصايح بقى قرفتى الناس.......ويا انا يا انت يا سى احسان....!


***بصوا بقى اهم حاجة يا معشر الرجال ان نيتكم تكون صافيه وقنوعه***


يعنى لو انت متجوزة واحده وحشة او قد الفيل .... تكون راضى ومقتنع باللى قسمهولك ربنا تعالى على نفسك ياسيدى واتخيلها فى براءة وحلاوة نانسى ولو للحظة تخيل انها فى دلع هيفاء شويه وغمض عنيك وتخيل انك واقف ادام رشاقه اليسا ......ايون معلش تعالى على نفسك يعنى هى هيفاء ولا نانسى ولا اليسا اجمل منها فى ايه؟؟ ....انت بس امسح لهم الميكب اللى حطينه وشيلهم الباروكة وانت هتشوف اللى عمرك ما شفته انا عارفه ان كتير منكم هيقول بس هى فين دى اللى شبهم حتى ولو كانت ايه ...ومعاك بردوا انهم زى لهطة القشطة .....بس معلش انساهم دلوقتى وابقى فكر فيهم بعدين وهى مش جنبك

***لانها وهى جنبك اكيد اكيد هتقطع حبل افكارك وان شاء الله تشنقك بيه..!***


اول حاجة ...حاول تستعيذ بالله من الشيطان الرجيم مش من مراتك وابتسم لها كده يا اخى حتى وان فتحت بقك بالعافيه والكلمة مقدرتش تخرج منه...معلش بس قولها انتى اجمل حب فى حياتى ..... انا من ساعة ما دخلتى حياتى وانتى منوراها ...حتى وان كانت من ساعة ما دخلت حياتك النور قطع وضلمتها وبقت عتمه مفيش مشكلة خالص ......هو الكلام عليه جمرك..؟

***" اه لو كان عليه كان زمانك لقيتلك حجة يا عم بس ولو ...مش هتقدر تهرب"***

*******

كمان حاول تحسسها بانوثتها وجمالها وان حتى كانت شبهك... واقعد كل شوية اتغزل فيها وابقى دور وشك وانت بتكلمها ده لو نفسك ما طاوعتكش اصلا اما لو كانت نفسك حلوة ......فهنيلك يا فاعل الخير والثواب

حاجة مهمة ....لما ترجع من الشغل وتلاقيها واقفة فى المطبخ.... ما تقعدش تزعق وتقولها ريحتك بصل وتوم لا اكتم نفسك وخد نفس عميق وقولها.... الله ريحتك مسك وعنبر ولو طلبت منك فلوس علشان تروح للكوافير...... اديها اللى هى عاوزاه يعنى هى هتعمله لمين وكمان علشان انت تستريح من السلك اللى فوق دماغها ده ويبطل يشوكك اقربها


***انك هتعرف تنام بدل ما تقلق منامك كل شوية ...ولازم تعرف انك دافع دافع***

********

ودايما يكون فى رقه فى كلامك يعنى تخلى لسانك زى ما بيقوله ينقط عسل... مش مكرونه .....وتدلعها يا سوسو... يا توتو... يا ميمى ...يا حبيبتى... يا ام العيال... ايون معلش حتى وان كانت ...ام قويق او... ام اربعه واربعين

معلش ماتنساش ان وراء كل عظيم امرأه .....انا عارفه دلوقتى انتم بتقولوا ايه ....سامعكم....وراء كل عظيم امرأه نكديه ...تشل... تعل ...تغم...ترغى... تخينة... تافهة ...حاكم انتم بتحبوا حرف التاء اوى وبتنسوا الباقى!

********

الهدايا....ده بند مهم يا جماعه يعنى متدخلش عليها بحزمة فجل... ولا جرجير ... ولا بطيخة....معلش انسى الحاجات الخضراء دى خالص اللى بتخليك تعملها حجة وتقول ما انا بجيب ....يعنى حاول تركز فى الحاجات الصفراء خاتم دهب صغنن كده قيمه ربع جرام... دبدوب لونه حلو كده ب10 جنيه ...كده ايوا دلعها صدقنى هى مش هتبص لقيمه الحاجة وان الحاجة اللى بتجيبها دى قيمتها ايون....

لانك لو فكرت فى انك لازم تجيب لها حاجة من قيمتها يبقى مش هتجيب خااااااااااااااااااااااالص طول عمرك وطول ما هى على ذمتك...!

********

صدقنى لو عملت اللى بقولك عليه هتحبك وان كانت ورده بجنيه دى هتموت فيك ...مش بعيد تروح تخبط على الجيران تقلهم اصل الهدايا والحاجات دى انقرضت من زمان .....والله هتدعيلى هتحبك وهتموت فيك وهتلزقلك لذق بغرا وابقى ***قابلنى لو عرفت تهرب***

********

كمان لازم تكون نزيه وبتحب الفسح وتخرجها ....ايوا يعنى من وقت للتانى تفسحها فى مكان حلو كده وبلاش الجنينة اللى على اول شارعكم اللى من غير تذاكر دى.... او كل ما تطلب منك تخرجها تقولها روح عند مامتك اقعدى جنبها ***ومتصدق وكل يوم تقولها مش هتروحى تتفسحى***

لا .....خدها وروح الملاهى واهو بحق التذكرة ممكن تهد حيلها من اللعب وتدغدغها لحد ما يبان لها صاحب.... وهى ***بنفسحها تحرم تقول اخرج من عتبه باب البيت***

او دخلها بيت الرعب يا سلام بقى لو دخلته كده تضمن انها مش هتطلب منك تفسحها تانى ده ان مخلصتش منك اصلا اما اذا كانت من ذوى القلوب الجامده فاطمئن انت واضمن انها هى اللى هتخلص عليك!

********

الثقة ...لازم تخليها تثق فى نفسها وفيك صحيح صنف الرجاله كله لا يوثق فيه.... لكن معلش اضحك عليها يا اخى بمعنى.......مش اى واحدة تعدى من ادامك تبصلها معلش اعصر على نفسك ليمونه... وركز مع مراتك حتى وان كنت قرفان من شكلها .....ولو حصل وبصيت على واحده ومراتك شافتك.... خليك حدق وقلها انا بس بشوف فيها ايه احلى منك اصلها معجبة بنفسها اوى مش عارف على ايه وبعدين بقى بردوا انا هبصلواحده زى دى ودى تيجى ايه فى حلاوتك ورقتك ؟؟

حتى وان كانت عينيك هتطلع على البنت التانية.... وابقى فى سرك انعى حظك واحسد جوز اللى بصلتها وقول يا ابنى المحظوظة تيجى نبدل؟

بس فى سرك لحسن لو سمعتك ما اضمنلكش العواقب الوخيمة اللى هتحصلك وتتقلب الحداقة لحادق اوى ومملح!

********

التليفزيون ......وانت بتتفرج وهى معاك حاول متبقاش على قناة الاخبار والحاجات دى.... صدقنى ده فى مصلحتك هاتلها مسلسلات اغانى.... بس بلاش قناه ميلودى " لحسن لو اتفرجت عليها مش هطيقها ولا هطيق نفسك ولا اللى فى البيت وينتهى بك الحال بانك تجيلك حالة هيستريا وتصمم تدخل جوا الشاشة تعرف ايه اللى بيحصل جوه"

يعنى حاول تفرجها على قنوات الافلام والمسلسلات كلام فاضى من ده الهيها فى حاجة بدل ما تتفرج على اللى بيحصل حولينا .....من ضرب وقتل وخناقات بعدين تلقط من اللى بتشوفه وتتقلب من "وراء كل عظيم امرأه " الى وراء كل ***عظيم ساطور وسكاكين واكياس ***

********

الكمبيوتر والموبيل.....وانت قاعد لوحدك اعمل اللى انت عايزه ...شات وماسنجر وصور... براحتك على الاخر اما طول ما هى موجودة اتفرج بس من غير ما تحس.... واول ما تدخل عليك ما تتلخبطش وتتفزع

وقولها اصلى المدير طلب منى اخلص شغل واخد" اوفر تاي"..هى لما هتعرف ان فيها اوفر تايم هتروقلك الجو وتسيبك براحتك ده ان ما خرجتش وسابتلك البيت كذا يوم ....

بس ابقى ورينى بقى ورينى نفسك بقى يا حلو اخر الشهر والمرتب معلهوش ولا مليم زيادة ده ان ما كانش ناقص كمان من السلف والجمعيات وكسوة المدارس الخ

***اصل الكدب مالوش رجلين ........ليه ايدين وممدودة كمان***

********

الموبيل......اه ده بقى مشكله لوحده... بس يا ريت لما يرن وتكون المدام رد... ما بتردش ليه ؟؟

انت خايف ...اذا كان انت قاعد معاها ليل ونهار ووشك فى وشها يبقى بتخاف ترد

وهى بعيد عنك ولا انت ما بتصدق؟؟ خليك جرىء وحمش ....بدل ما تسمعلك كلمتين لما تروح انت فى غنى عنهم

ولما تروح اعمله "سايلنت" اخفى صوته خالص" علشان لو حد كده ولا كده.... يتخرس بدل ما تتخرس انت

وكمان بلاش الاسامى الناعمة دى كيكى... وميكى... خليها بكار... عبد الجبار... وحاول تشترى موبيل رخيص علشان ***لو شمت خبر ما تندمش عليه طول عمرك ده ان كان ليك طوله عمر اصلا***

********

المساعدة والتعاون......اه عايزاك دايما تساعدها فى البيت... متقولش مش فاضى ...ابقى اعمل يوم الاجازة وحاسسها انك راجل متعاون

وبلاش تشرب العصير وتحط الكوبايه فاضيه فى الحوض.....علشان النمل خليك دايما نضيف متتكبرش وتقول انا راجل ما احنا عارفين يعنى هو فى فصيله تانيه غير كده.....بعدين هو النمل لما يتلم على التلزيق اللى انت هببته هيقرصها ***لوحدها مهو هيقرصك انت كمان***

كمان لما تلاقيها تعبانه ساعدها ومتروحش تنام فى الاوضه التانية وتقولها بطلى دلع

اه وان شاء الله هى لما هتلاقيك عملت كده هتستحلى الموضوع وهتفضل عيانه علطول ومش هتقوم من مكانها ابدا!

********

بصوا بقى يا رجاله انا احسان جوزى والحمد لله مدلعنى على الاخر .....وبيعمل معايا كل النصايح اللى بقولهالكم دى اه امال.... مستتننى... ومدلعنى على الاخر... لا بصوت... ولا بشد فى شعرى.... ولا بيحط الكوبايه فاضيه فى الحوض غايه ما هنالك..... انى ما بسبش بيت ماما خاااااااااااااااالص ده طبعا بناءا على حبه ليا............ويارب اكون قدرت اديكم نصايح متودكوش فى داهيه وحاولوا تعملوا بيها ....مش العكس واللى مش هيعمل يستاهل اللى يجراله ده ان كنتم حابين النكد والقرف والكأبه..!


***ومش عايزة اشوف حد فى سرايا المجانين اوكيه......اه انا بزور احسان هناك كل اسبوع!***


**شفقة**

هناك 66 تعليقًا:

غير معرف يقول...

هاهاهاهاها
أكتر حاجة موتتنى من الضحك "متتكبرش وتقول انا راجل ما احنا عارفين يعنى هو فى فصيله تانيه غير كده....." :))))))))
كمان كويس انه بيحط الكوباية فى الحوض ده فى حد ذاته انجاز :)))))
ارجع و اقول "جوزك على ما تربيه و ابنك على ما تعوديه" :P

أم أحمد المصرية يقول...

ما شاء الله ربنا يخلي لك احسان بيه اللي مهنيك
زي بعضه حمشي معك في احلام اليقظة بتاعتك و اقي قابلني لو حد من الازواج سمع كلامك
اروح بقي انظف البامية :))

Unknown يقول...

بما إني مش متجوز ولسة شباب وأعزب فطبعا مليش في النصايح دي بس على فكرة أستاذة
متنسيش تعدي بقا أنا حطيت بوست جديد وكملت قصة ورقة وذكرى في نفس البوست بتاعها هتلاقيه في نهايتها
تحيتي

صحفية روشة يقول...

والله عندك حق فى موضوع الممثلين لما بيغسلو وشهم دول
__________________________________
ميفوتكش البوست الجديد (فال الله ولا فالك)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية

سمر الشافعى يقول...

يعنى عماله تقولى نصايح ماشاء الله عليكى جامده جدا وتنفع بس لليه محسسانى ان الراجل اللى بتنصحيه متجوز اسماعيل ياسين ولا عبد الفتاح القصرى دا ناقص نشحت عالراجل ونلم ليه معونه تعينه عالصبر عالغوريلا اللى متجوزها ههههههههه

تحياتى ليكى

إنتظارات شاهقة يقول...

هوة قد كدة الرجالة شايفة زوجاتهم غير صالحين للاستهلاك الادمى
انا باشوف ان فية رجالة برضة
تقرف الليمون على شجرة
ههههههههههههه
جميل البوست
تقبلى مرورى الاول
دومت بخير

رئـــــيسـة حزب الأحلام يقول...

ههههههههههههههههههههه
ايه النصايح الجامدة دى
جزاك الله خيرا بس ياريت تجيبولى ابن الحلال الاول
تحياتى ياقمر

Mafrousa يقول...

هههههههههههههههههههههه
و الله النصايح ديه متينه...بس لخبطة الكلااام اللي علينا ده مش حلو يا اختي
ههههههههههههههههه
بس سيبك ممكن اجيب جوزي يحضر دورة عنك
ههههههههههههههههههههههه
عاوزاكو تدخلو معانا انا و مفقوعه فى مباراة التعليقات هنا
http://faransaraayek.blogspot.com/feeds/posts/default

شهد الكلمات يقول...

طيب انا راضية زمتك واحد يتجوز واحدة قردة كدة لية ؟؟؟؟؟؟؟؟؟؟؟؟؟؟؟؟
و يعصر علي نفسه لمونة طب ماهو من الاول يشوف واحدة عدله بدل ما يدوخنا معاه و نشوفله علي حلول

موضوع جميل و دمه خفيف موووووووووووت تحياتي

بنت مصريه يقول...

كده يا شفقه
مكنش العشم دا انت مسخرتنا خالص
ليه ان شاء الله كنا نسانيس
ماشى ماشى ليك يوم
والله لقول لاحسان

RaRa يقول...

مساء الخير
أنا معاكى فى النصايح اللى قولتيها
انما لو كل النصايح اللى قولتيها دى الراجل قالها من قلبه وبأحساس أكيد الست كنت هتحس بها أكتر ولا انتى مش معايا ..؟؟

maiosha يقول...

ههههههههههههههه
نصايح جبارة أنا مش عارفة ابطل ضحك

أنا خلاص عالم المدونات ده عاملى قفلة فى دماغى .. أى نصايح عن الجواز ولا المتجوزين بجرى اجيب ورقة وقلم وأقعد أكتب النصايح دى علشان استعملها ساعة اللزوم
ههههههههههههههههههههههههه

الله يكون فى عون اللى هيعملها ويتجوزنى

غير معرف يقول...

هههههههههههههههههه

بصراحه نصايح جامده جدا

بس عن نفسى باعتبار
ما سيكون
اى نصيحه من دول عملها

مش هتفوت عليا مش هيلبسنى العمه اه

الرجاله ملهومش امان

ولو قابلتنى المواقف دى هكون عارفه بيحصل ايه من وريا يا ختى


تصدقى هيا نصايح للستات اكتر منها للرجاله

علشان اى واحده تعرف اى حركة بيقوم بيها الراجل يكون وراها حاجه

مش بيعملها لله فى لله

كتر خيرك

R-H-S يقول...

تقريبا الحاجات دي في المدينه الفاضله بس
مش عندنا في مصر
والله شكلك مبتعليش الحاجات دي
وبعدين ليه متعمليش نصائح للستات
دول حتي الراجل عينيهم طلعت في الشغل ياعيني

نداء الي احسان ارجع بسرعه وشوف مراتك بتقول ايه
هههههه انا بهدي النفوس

تحياتي ليكوا

امل يقول...

السلام عليكم ورحمة الله وبركاته
انا مش عارفة اشكرك ازاي عشان خليتيني اوصل للمدونة الجميلة دي .. طول ما انا بقرأ النصايح دي وانا شاكه ان اللي كاتبها احسان بيك مش انتي لحد اما وصلت للنهاية ولقيته في المستشفى اتأكدت كده ان انتي اللي كاتباها فعلا هههههه .. تحياتي وتقديري لهذه النصائح الجميله

شفـقــة و إحســــان يقول...

ليلى
ازيك يا جميل منورنا......انتى بتقولى جوزك على ما تربيه ليه يا بنتى هو فرخه .....دا احنا اللى بنتربى وبكاكى كمان بعد الجواز

شفـقــة و إحســــان يقول...

ام احمد المصريه
منورنا يا اصيله شايفاكى فخورة اوى ببلدك المصريع عندك حق ما هو ما شربتش من نيلها؟
انتى عرفتى منين اننى انا بحلم انتى لازم كنتى معايا فى الكابوس

شفـقــة و إحســــان يقول...

كاتب مصرى
منور المحكمة يا باشا كاتب وبعدين لازم تتجوز مش علشان الجواز حلو ...نو نو نو
لكن علشان تطبق نظرياتى....اقصد بلوجاتى
وان شاء الله هعدى عليك بس حضر نيسكافيه وكيك

شفـقــة و إحســــان يقول...

صحفية روشة
منورة الجريدة.....شكلك كده متغاظة من الممثلين بينى وبينك انا ما عنديش حق ده كلام من وراء قلبى هما فعلا لهطة قشطة
وبعدين ايه لوحة الشرف دى انتى صحفيه ولا مدرسة؟؟

شفـقــة و إحســــان يقول...

سمر الشافعى
منورانااااااااااااااا
ايه يا سمر اسماعيل ياسين ايه وقصرى وطويل ايه؟؟ هو اللى على راسه بطحة ولا ايه....ههههههههه
وبعدين معونه ايه مش منعوها خلاص ؟؟ومتخافيش هنشحت هنشحت ومش هيبقى رجاله وبس لا كل حاجة

شفـقــة و إحســــان يقول...

احلام اليقظة
مش عارفه اقولك منورانا ولا قلقتى منامنا؟؟
المهم اننا صحينا ...ايوه الرجاله شايفهم مده صالحيتهم انتهيت يعنى عايزهم يستحملوا بضاعه فاسده؟؟
وبعدين ليمون ايه وشجرة ايه انتى جانينيه؟

شفـقــة و إحســــان يقول...

رئيسة حزب الاحلام
ابعتيلنا حلم كويس وصلحه....ههههههه
وحشتينا فينك؟
وبعدين بقولك ايه انتى جيتى هنا غلط لو عايزة ابن الحلال...... روح البوست اللى قبل قبل ده وسيبى بياناتك..... واملىء الابليكيشن ....وادفعى رسوم الخدمة واستنى مننا رد

شفـقــة و إحســــان يقول...

واحده مفروسة
فرستينى يا عبيطة افهمى....انا بقول كده علشان نكسبهم فى صفنا وبعدين ما تنسيش ان اول بوست انا اعلنت الحرب عليهم فقلت اخد هدنه ونعمل اتفاقيه صلح...
اما بالنسبه للدورة بتاعه الافندى بتاعك فمفيش فرق شوفى هتدفعى كام واحنا مستنينه

شفـقــة و إحســــان يقول...

شهد الكلمات
ايه يا بنتى ده ...لمونه ودوخه جبتلنا انفلونزا
وبعدين هجاوب على سؤالك واحد هيتجوز قرده ليه؟؟
بالطبع والمفهوميه علشان ساعدته قرداتى

شفـقــة و إحســــان يقول...

بنت مصريه
منورة جنينه الحيوانات
ايه يا ستات ايه اللى جرالكم فى البوست ده كلكم على راسكم بطحة ولا بتحبوا جنينة الحيوانات اوى كده؟؟
وبعدين احسان بيسلم عليكى وبيقولك هو محبوس فى القفص

شفـقــة و إحســــان يقول...

rara
كلامك كله نغم ومشاعر .....اما بخصوص ان الراجل يقولها من قلبه انا معاكى بس هو مش هيعمل كده الا فى حالات نادرة لما يكون اخرس........ ساعتها بس هيقولها من قلبه طبعا قله حيلة مش حب!

شفـقــة و إحســــان يقول...

maiosha
ايه يا بنتى هو احنا بنبيع زغزغه اوعى تفطسى من الضحك بعدين يجوا يشمعولنا المدونه.
بعدين عندى وصفه كمان كده .......بعد ما تكتبى النصايح خدى بعدها اسبرين ونامى علشان تنسى كل النصايح
وربنا يكون فى عونك يالى فى بالى

شفـقــة و إحســــان يقول...

همس
نورتينا بس بشويش
وبعدين انت هتعملى فيها جيمس بوند؟
وعماله تقولى ملهمش امان ....يا بنتى دى الحكومة نفسها صرحتلهم بحزام الامان يبقى انتى لا؟؟

شفـقــة و إحســــان يقول...

gehad
منورنا فى الجبهة بتاعتنا ....بس سؤال رفيعة المدينه الفاضله دى بيروحلها ازاى يعنى بيركبوا مينى باص رقم كام علشان اختك مش من هنا من هناك
اما بالنسبه للنداء العاجل بتاع احسان فهو ما بيتفرجش على القناه التالته ابقى اعمله على الجزيرة

شفـقــة و إحســــان يقول...

امل
نورتينا واسعدتينا
اما بخصوص المدونة فسهلة جدا خد مينى باص من جوجل لحد هنا
او لو هتاخدى الدائرى يبقى من عند ليلى او المفروسة اصلنا جيران وبنود بعض علطول
واحسان بيسلم عليكى وبيقولك ابقى تعالى زوريه فى الهوسبتل بس ما تنسيش الشيكولاته

المـــفـــــــقــــــــوعـــــة مــرارتـهــا يقول...

الكلام إلك ياإحسان أفندي إديها من ده كتير وأتوصي بالهدايا الصفرا ياإما الست شفقة هاتوديك علي السرايا الصفرا

mostafa rayan يقول...

مش عارف اقولك ايه ربنا يستر

Unknown يقول...

>>السلام عليكم
يا ستي والله العظيم حاطط المدونة بتاعتكم في المفضلة عندي على ثفحة المدونة دوري عليها بالراحة هتلاقيها اسمها شفقة وإحسان ولا أنا غلطان شوفيها بهدوء وحدة وحدة وابقس ردي علي..
تحيتي

حبيبـــــــة القمـــــر يقول...

يانهار يانهار
ايه النصايج دي
هو متجوز ايه بالزبط
جودزيلا ولا ام اربعه واربعين

دا كتيررررر

الرجاله كده هتتنطط ياشفقه ياختي

انا بقولك اهو

وقد اعذر من جنزر وفلسع من فلسع

عودي للنصايح الميه ميه اللي تخليهم يقولوا حقي برقبتي

شفـقــة و إحســــان يقول...

المفقوعة
وحشتينا اوى ....بس بقولك ايه كلام فى سرك احسان فى السرايا بقاله مده وكل ده بسبب انه مش عايز يجيب هدايا صفرا فصفرتهاله انا ....ايه رايك بقى فى اختك شفقة؟؟

شفـقــة و إحســــان يقول...

مصطفى
منورنا يا درش
اعمل انت بس بالنصايح الفظيعة دى وان شاء الله ربنا يستر وابقى قولى على النتيجة كام كام

شفـقــة و إحســــان يقول...

كاتب مصرى
خلاص براحة يا عم ...ما تزقش شفتها
ناس ما تيجيش الا بالعين الحمرا

شفـقــة و إحســــان يقول...

حبيبة القمر
منورانا فى سماءنا الصافيه
وبعدين يا قمر الرجاله كده كده بتتنطط بلزمة او من غير لزمة وبعدين اعذريهم عندهم حق اصلهم عاملين زى اليويوه عارفاه اللى بيتنطط لما تحركيه من الاستيك....ههههه

Ahmed Al-Sabbagh يقول...

هههههههههههههه

هو فى كدة ؟

نصايح جامدة جدا

تحياتى

احمد

عيله مفتريه سابقا يقول...

بصى يا شفقه يا حبيبتى

انا ضحكت قوىىىىىىىىى من نصايحك

بس انا عايزة والنبى اسأل سؤال

هو يعنى لما هى الاخت مراته مزهقاه وقرفاه فى حياتو ومش عجباه وتخينه وبالبلا الازرق اتنيل على عينووووووو وخطبها وقعد يحب فيها ويقولها امتى اليوم اللى هنتنيل ونتجوز فيه

مدام هى وحشه وتقرف وتافهه وتخينه وكل حروف التاء دى

آه يانى ..انا بقيت مفقوعه خلاص

بصى يا حبيبتى حكاية الكوباية دى بسيطه خالص ..امال لما بيكون واقف قدام الميه ويقول ادينى اشرب
ده يبقى ايه واصل انا ال ايه راجل وممسكش الكباية بأيدى امال ياختى بيمسكها برجله

بالله عليكى ياختى تقولى نصايح بقى للجيل الجديد من الرجاله ده

بس يا شفقه مش عايزة اكون محبطه ..بس انا مخنوقة منهم

سلامى يا قمر

شفـقــة و إحســــان يقول...

احمد الصباغ
منور ومشرف
وبعدين بتقول هو فيه كده؟ وابو كده كمان ولا انت مش متجوز ولا ايه
على العموم ادينا اديناك فكرة بس انت اتجوز وتوكل على الله بس متبقاش تدعى عليا

شفـقــة و إحســــان يقول...

عيله مفتريه جدا
نورتينا ...ايه يا بنتى الافتراه اللى انتى فيه ده....وبعدين هيكون يعنى اتنيل واتجوزها ليه ....ياختى يحمدوا ربنا هو فيه جواز اليومين دول ومش كفايه اننا ساكتين على الكوبايه اللى بيرموها فى الحوض ...كمان هيتامروا....

مواطن مصرى نايم يقول...

انا معنديش مشكله ناى اساعد مراتى
فى اى شئ
دى حتكون الشوق الشوف
اكيد لازم تتدلع
بوست جميل
و بلوج رائع

eslam

ٍSOU يقول...

دى نصايح للضحك على العقول ...لايا شفقة ..لا و الف لا لالالالالالالالا.. لقد اصبحتى من انصار العدو ... انتى بتديهم نصايح يضحكوابيها علينا و احنا اكمننا حونينيين و قلبنا رهيف هانصدق و ناخد مقلب فى نفسويتنا ....
ربنا يسترها معاك يا احسان :)) (وش مطلع لسانه)

ادم المصرى يقول...

انا عن نفسى بحب اغسل موعين واروق الشقه واشغل مكنسه واعمل اكل واعمل كل حاجه حتى لو كنت لسه جى من العمل وتعبان بردو دى بقت هوايا انا حببتى مراتى هشلها فى عنيا بوست حلو اوى

الحمقاء المضلله innominate x يقول...

بصراحه لو في واحد محتلج النصائح دي عشان يمشي حاله يروح يمووووووووووووووووت أحسن

Eman Henaish يقول...

أول زيارة :)
بصي يا شفقة يا حبيبتي انتي أدي كورسات
مش مجرد نصايح
ده انتي ماشاء الله موسوعة :)
بجد البوست جاااامد
تحياتي

غير معرف يقول...

ههههههههههههههه
لااااااااا
جامده نصايحك
بس انتى كده مخبطه فينا عالاخر
ولا ايه النظام

ههههههههههه
بس بجد تحفه

سلامى
:))

koukawy يقول...

اهم من ده كله يبص لنفسه في المرايا لو لقا نفسه واد محصلش يبقي يتكلم
تلاقيه هو كمان اقرع و بكرش و ريحته وحشه و دمه تقيل
يصلح من نفسه و بعدين يتكلم

Asmaa mahaba يقول...

هههههههههه دا لما الراجل يفطس ويموت عمره ما ينفس تفتوفه من الكلام دا
اه تعالى شوفى الخناقه اللى فى المدونه عندى يمكن تعجبك
تحياتى ليكى سومه_87

شفـقــة و إحســــان يقول...

lمواطن مصرى نايم
يا عم اصحى بقى .....هو لسه فى حد بيقول الكلام ده....شكلك عامل فيها اللمبى واللى هتتجوزها هيبقى اسمها نوسة وتقعد تقولها الشوق الشوق وبلوبيف بلوبيف
على العموم نورتنا كتيييير

شفـقــة و إحســــان يقول...

sou
منورة جبهة العدو.....ايه يا بنتى ضحك على العقول ايه مش لما يبقى فيه عقل اصلا ! وبعدين هو احنا حد يقدر يضحك علينا ....عيب تقولى كده ...ده ان كيدهن عظيم ولا ايه؟

شفـقــة و إحســــان يقول...

ادم المصرى
لا اكيد انت مش مصرى.....يا بخت حواء اللى هتشيلها فى عينيك بس سؤال رفيع
لو حواء طلع مقاسها اكبر من عينيك هتعمل ايه؟

شفـقــة و إحســــان يقول...

الحمقاء المضلله
ايه يا بنتى الاسم اللى يجيب غبى ده.....وبعدين موت ايه هتقضى على الراجل من اولها؟
شرفتى ونورتى .....وحدوه ولا دايم الا وجهه

شفـقــة و إحســــان يقول...

eman
منورة يا ايمى
بس انا يا بنتى مش بدى كورسات لانها صغيرة لا تتوافق مع عقليتى البتنجانيه المستفزة انا بدى كنبات وترابيزات وانتريهات حاجة تليق بوضعى

شفـقــة و إحســــان يقول...

shyma
ايه يا شيما انتى فاكرانى شاكوش وهتلبسينى تهمة من اولها خبط ايه ومسمرة ايه ....انتى عندك ورشه نجارة؟؟

شفـقــة و إحســــان يقول...

koukawy
ايه يا بنتى الاسم اللى بيكاكى ده
وبعدين اقرع ايه وبكرش ايه هو بطيخة؟

شفـقــة و إحســــان يقول...

سومة المجنونة
مش ناوية تعقلى بقى....؟؟
وبعدين بهدلتينا تفافة ده بردوا كلام ناس مجانين؟
ومش ناوية تبطلى خناق ؟؟اهو انتى كده يعملوها الصغار وبعدين يجروا على شفقة واحسان علشان يفضوها

حنين.. يقول...

جميل اووووى موت جدا البوست. بس قوللى هو انتى معانا ولا معاهم.......... اانتى ايه موقععك با الظبط, تقبلى مرورررررررررى....... فى انتظار المزيد...... من عالم المتزوجين

شفـقــة و إحســــان يقول...

حنين
منورنا والله يا حنون
انتى عايزة تعرفى ايه موقعى بالظبط .....موقعى لا محل له من الاعراب

سوسا ومودى يقول...

ههههههههه
يا شوشو
أنا شهدت بدايه المدونه بتاعتكم وماشيه معاكى خطوة بخطوة
مدونتكم واااااااو
وهم
والنصايح ديه أنا حطيتها حلقه فى ودنى وحطبقها على أبن الحلال أن شاء الله
ده أن شوفت وشوه أصلا

zOzO يقول...

ههههههههههههههههههههه

المدونه بتاعتكم عجبتني

ربنا يخليكوا لبعض

وبعدين غير جوزك مش بيعمل ده

بابا صعب انه يعمل حاجه والله

عموما ربنا مش يحرمك منهم

شفـقــة و إحســــان يقول...

سوسا ومودى
ازيك يا قمر.....اشمعنا بقى مدونتنا واو متنفعش راء ولا تاء ايه حبك فى حرف الواو اكيد فى سر؟؟
وبعدين بلاش تحطى النصايح فى ودانك اصلها تقيله شوية وممكن تاخد ودانك وتقع

شفـقــة و إحســــان يقول...

zozo
منورنا والله
ومحتاجين دعواتكم ان ربنا يخلينا لبعض
لاننا بقينا بنشد فى شعر بعض

رئـــــيسـة حزب الأحلام يقول...
أزال المؤلف هذا التعليق.
الجواز و سنينه يقول...

ههههههههههههههههه
ايه اللى انتى بتعمليه فينا ده
هههههههه
ضحكتينى موز موز موز