الأحد، 17 أغسطس 2008

هى دى مصر يا هبلـــــــــة


كنت قاعدة كالعادة بناكف فى سى احسان افندى وقعدين نتخانق على تحويل القنوات هو يقول ميلودى وانا اقول الافلام لحد ما كلمتى نزلت المرة دى وقلت فى سرى مقولتى الشهيرة .........يقطعك يا منيل ويورينى فيك يوم ما تفهموش غلط اقصد يبقى موديل زى بتوع الاغانى....... اللى بيترقصوا مع المطربات

وشوية واحنا بنتفرج على مولودى اصلى بدلعها سمعت اغنية موثرة جدا اغنية " العسيلى ومى سليم "يبقى انت اكيد اكيد فى مصر" ياااااااااااااااااه اغنية تقطع القلب وتخلى الدمعة تفر من عين الواحد .... ممكن كمان الواحد لو سمع الاغنية دى وجنسيته مش ايجبشن يتمنى يكون اوبشن اقصد...... ايجبشن يعنى مصرى


يا سلام عليكى يا مى انتى والعسيلى وانتم بتغنوا وتاكدوا بالفاظ التوكيد اللفظى .........يبقى انت اكيد اكيد فى مصر

انا بصيت لاحسان ولقيته متاثر اوى وعمال يقطع فى المناديل من كتر البكاء .....وقعدت اقول الله عليكم عندكم حق واللهى ورجعت كده......... فلاش باك لوراء


يا سلام كده لما الواحد يصحى كل يوم من الفجر ويقف فى طابور العيش يزق ويتخانق ويضرب على قفاه ياه حاجة هايلة خالص......... ده بالنوسبه للرجالة ويا سلام بقى لما يضربوا بعض بقفص العيش حاجة مش ممكن

اما بالنوسبة للستات .........يا سيدى عليهم وهن ماسكين فى شعور بعض وعمالين يقطفوا ولا الملوخية وكل واحدة ماسكة التانية من الجلابية طمعانة فيها وهاتك يا تقطيع وفى الاخر الفرن تقفل وتقولهم شطبنا بتوع التموين قايلين لحد الساعة 12 ...اه 12 ودقيقة نكون بعنا الدقيق فى السوق السوداء طبعا بكده تبقى انت اكيد اكيد فى مصر
ولا يا سلام بقى لما تروحى السوق وكل يوم تلاقى الحاجة عمالة تغلا......... ولو بس حبيتى تسالى او تستفسرى عن سبب الزيادة تلاقى بتاع الخضار......... وشه اتقلب ولا بوز فردة جزمة.... ويقولك واحنا مالنا يا ست مش عاجبك ما تشتريش يلا هوينا وورينا عرض كتافك......... ولو حبيتى تستعرضى وجبتيله جوزك وحبيوريلهانه بيلعب فى الجيم وانه من حاملى اثقال الكوز ابو جبس...... ممكن يحدفكم بالخضار او يديكى بالميزان فى وشك وساعتها لازم تتاكدى.....ان انت اكيد اكيد فى مصر


لما تروح تركب ميكروباص........ وتلاقى السواق على اخره وهايقوم يضرب الركاب وكل شوية يقول الاجرة يا افندى انت وهو ما تلموا مع بعض يا فتاح يا عليم ......ويبص للستات ويقول ما تخلصين يا ست انتى وهى ما تفك يا خوانا مع بعض الواحد لسه ما استفتحش ده اول دور..... وفجاءة تلاقى واحد سألوا وقالوا الاجرة كام يا اسطى انا نازل المحطة اللى جاية وهو يرد يقول وكانه بالع حمار جرى ايه يا فندى الاجرة موحدة .....وتنزل من العربية وانت قرفان وعايزة ترمى نفسك تحتها تلاقيه كاتب على ضهرها.......... عضة اسد ولا نظرة حسد .....وساعتها تحس انك كنت فى جنينة الحيوانات مش فى عربية يبقى انت اكيد اكيد فى ميكروباص مصر


الاتوبيسات يا سيدى عليها لما تشوف اتوبيس الناس اللى راكبين فيه اكتر من سكان مصر وكلهم فوق بعضهم والكرسى قعدين فيه دورين واللى واقفين رجليهم متشعلقة ......والرجالة قاعدة والستات واقفة والسواق كل شوية يفرمل ولا اللى مركب بهايم........ والناس تقع فوق بعضها وتقول للسواق........ حاسب هنا يا اسطى ويعمل نفسه اطرش وما يرضاش يقف فى المحطة يعنى واخد الناس رايح راجع طول الخط " اصله حقانى بيديهم بحق التذكرة .....يبقى انت اكيد اكيد فى باص مصر"


لما تروحى تقدمى لوظيفة بعد عشرين سنة من التخرج ويشوفوكى يتغموا ويقولوليك .....فوتى علينا بكرة وكانك بتاعة اللبن وتلاقى واحدة داخلة الانترفول وحاطة فول ميكب وطعمية ميكب وناكشة شعرها ودهنه وشها 2 كيلو سايبس ولاكيه ولابسة المحزق والملزق ومبينة الركبة......... وعاملة فيها ولا هيفاء وتافهة... وبتتكلم من وراء سنانها ويحترموها ويقبلوها من غير انترفول كده تبقى طعمية ومقلية وبكده تبقى......... انت اكيد اكيد فى مصر


لما تروح اى مصلحة حكومية وتلاقى الرجالة عاملين يقراوه الجرايد .......والستات قاعدة ترغى وتقشر بصل ولما تقوليلهم من فضلك عايزة اخلص الورق وتقولك مش فاضين ولما تتحايلى عليها شوية وتبوسلها البروكة وتحن عليكى وتقولك ........هاتى دمغة والذى منه.......وعلشان تمشى الموضوع تقومى تديهم فى اسنانهم بقشيش وتقولك ماشى اهو حق كوباية الشاى تبقى انت...... اكيد اكيد فى مصالح مصر


لما تروحى مدرسة حكومية تقدمى لاولادك فيها........ وتلاقى الفصل فيه ابتدائى واعدادى وثانوى والمدرس ما بيشرحش ويقولك بصوت اخنف ابنك مش نافع يا مدام ما بيفهمش ومحتاج درس خصوصى

ولما تحبى تقدمى فى مدارس خاصة فيخدوكى على الهادى......... وشوية شوية تلاقى المصاريف عليها مصاريف نضافة والات موسيقى والعاب وكل شهر هنبنى جامع لا المدرسة عيد ميلادها والناظرة بنلملها علشان ولدت وهنجيب حاجة للعيل وفى الاخر تلاقى ولادك ما بيعرفوش الالف من كوز الدرة يبقى .........انت اكيد اكيد فى مدارس مصر


لما تروح تصيف فى جمصة وتحس انك عملت انجاز ومفيش زيك... وتتفاجىء بناس بتصيف فى مارينا وعاملين يبنوا فى شاليهات وقصور علشان يروحوها شهر فى السنة .......وناس تانية مش عارفة حتى تشم الهواء فى بلكونة بيتهم ومش لاقيه تاكل مش تشترى مايوه.......... وناس تالتة رايحة تصيف وعاملة تسال يا ترى ايه الموضة السنة دى المايوه ولا البكينى القطعتين ويا ترى بتستخدموا الصن اويل علشان يحميكى من الشمس ولا لا ؟؟ وفى غيرهم مش لاقى تمن الزيت اللى تطبخ بيه يبقى...... انت اكيد اكيد فى مصايف مصر


لما الواحد يزهق من نفسه........ ويحس انه خلاص عايز يولع فيها ويحب يفك شوية ويدخل سينما ويلاقى الشباب واقفة طوابير وهتقطع بعض على شباك الافلام اياها........ وشباك الافلام الهادفة معلهوش ولا نفر........... وتسال اشمعنا الفيلم ده اللى مكسر الدنيا؟؟ وتلاقى الاجابة اصله فيلم مناظر....... وتدخل تلاقى كل واحد رجله فى قفا اللى قدامه.... وعمال يتف عليك اللب يبقى انت اكيد اكيد فى سينما مصر


لما تلاقى واحدة ماشية فى الشارع لابسة خيمة ومش باين منها الا الجزمة....... وتلاقى واحد رزل عمال يعاكسها ويغتت عليها ويقولها يا مزة ايه الحلاوة دى ........وهى تتف فى وشه يقوم يبتسم لها....... ويقولها براحتك يا جميل بكرة يا حلو تروق وتميل تقوم تديله بالشبشب لحد ما يبان له صاحب يبقى .......انت اكيد اكيد فى شوارع مصر


لما تحب تروح تتفسح فى اى جنينة وتاخد معاك المدام تحدفها هناك..... وتشممها هواء فاسد وتلاقى الجنينة اتقلبت بقت غرزة وناس عمالة تشيش وتحشش....... وفى الاخر تتجرجر انت وهى فى البوكس....... لحد ما تعترف بالغصب انها مش مراتك يبقى انت اكيد اكيد فى حدائق مصر


لما تلاقى الستات واقفين فى البلكونات عمالة تجيب سيرة فلانة وعلانة وام ترتانة.......... واللى اتجوزت واللى بارت واللى يكلمهم نص كلمة .....يحدفوه بالزبالة من فوق يبقى...... انت اكيد اكيد فى حوارى مصر


لما تلاقى شاب طويل وعريض ووسيم وابن ناس كويسين ومتعلم ومعاه ماجيستير......... وسارح بشربات وفنلات ويقولك اكل العيش اللى ما بقاش موجود الا بالطوابير وفى الاخر تساله امنية حياتك ايه يقولك اهاجر واموت بر ارض الوطن يبقى انت اكيد اكيد فى العتبة بتاعة مصر


اعتقد اننا حسرنا كل المميزات وفعلا فعلا اكتشفنا بعد البوست ده ............اد ايه احنا بنحب بلدنا ومش عايزين ابدا نتحرك منها واد ايه الواحد""" مصر""" على حبها

واسيبكم مع النجم ........احسان زعبله وسمعنى اغنية "محمد فؤاد" ***يعنى ايه كلمة وطن***



شفقة

هناك 92 تعليقًا:

مواطن مصرى نايم يقول...

لا معلش عندك one غلطه
الاغنية انا حاططها فالبلوج عندى
و هى غناء
محمود العسيلى
و مى سليم
و محمد كيلانى

بس يا شفقه يا ختى انا عارف ان كل اللى انتى قلتيه ده يوقع شعر صوابع الرجل مش الراس بس
و من حقك تنسى مين اللى بيغنى الاغنية

بوست جميل يا شفقه
ربنا يقدرنا و احنا واقفين ف طابور العيش

اقولك حاجة سر و الله يا شفقه العيش بيجى لحد عندنا و عمرى يا ختى ما وقفت طابور
تخيليى الحقد اللى ممكن اكون فيه من البشر
اصل جارنا صاحب فرن
ههههههههههههههههههه
(وش مطلع لسانه)

بوست جامد
الله ينور
تحياتى
اسلام

عالم ماريونت يقول...

لازم اسلام ياخد التعليق الاول مني لغاية ما اقرا؟
انتي عندك حق في كل اللي قلتية
بس مش عارفة لية كان نفسي الاقي بارقة امل؟
حتى في الكوميديا السودا اللي كاتباها
تحياتي

Lobna Ahmed Nour يقول...

ده ظلم بجد يا شفقة

يعني انتي استعرضتي 12 حاجة جميلة

بتخليكي تحبي مصر

ونسيتي اهم حاجة ؟!!!!!!

التلوث

التلوث بجميع اشكاله !!

واذا كان كل شيء ملوث فانت اكيد في مصر

اهلا بيكي في مصر

Amgad يقول...

ايه الروعة دي لا بجد انتو هايلين اوي
ايه كل المظاهر اللي في مصر دي
فاتكو بس لما تيجي تاكل لحمة تلاقيها لحمة حمار لا مؤاخذه هههههههههههههه
المهم
نسيت اقولك
اغنية اكيد في مصر دي شيرين مش فيها دي بتاعة العسيلي ومي سليم وواحد اسمو الكيلاني
اما شيرين فغنت مشربتش م المسيسبي
وادعوكي لقرائة اللينك ده
http://amdoga.blogspot.com/2008/06/blog-post_26.html
اما بخصوص

لما تلاقى واحدة ماشية فى الشارع لابسة خيمة ومش باين منها الا الجزمة....... وتلاقى واحد رزل عمال يعاكسها ويغتت عليها ويقولها يا مزة ايه الحلاوة دى ........وهى تتف فى وشه يقوم يبتسم لها.
اختلف معاكي في لفظ خيمة
ولكن فكرتيني بواحده عرفتها من علي النت وبتيجي مصر
المهم كنت بكلمها في الموبايل
بتقولي عن اللي بتعانيه في مصر
فتقولي يوم راكبة بسكلتة في المعمورة
وجه خمسة ولد -يعني خمس اولاد- راكبين عربية واحد نزل بيقولي ممكن اخد بسكلته
يعني هوا ايز ايه
قولتله ن....نفسك يا ...ص-لفظ خارج-
والله قالته كده
قالي انتي اسال -يعني عسل-
قولتله انا بشتمك تقولي انتي اسال
بجد كنت مصدوم جدا
ولكن قولتلها هي دي مصر

maiosha يقول...

ههههههههههههه
لا يا شفقة انتى بجد بجد دمك زى العسل
انتى خلتينى أحب مصر أكتر وأكتر

مصر هى مرات أبويا
هى اللى أكلتنا لحمة حمير وقالت انه بيزود الذكاء

البلد الوحيدة اللى تلاقى فيها رجالة كبار بكامل لياقتهم وأراهنك لو لاقيتى واحد فى أى بلد تانى بيجرى بكل سرعتة ورا الإتوبيس وهو ماسك بطيخة تحت باطة ولما يوصل للأتوبيس يتشعلق فى الباب بصباع واحد
صباع واحد شوفى اللياقة شوفى الرشاقة

مصر مصر .. يبقى انت اكيد فى مصر

Asmaa mahaba يقول...

ههههههههههههه انتى يا شفقه جالك حول هى شرين اللى بتغنى اكيد فى مصر شرين بتقولك مشربتش من نيلها
انا قولتلكم رشحونى رئيس جمهوريه وانا اوصلكم العيش دليفرى وفوقيه باتون ساليه واننين كرواسون
انتوا حرين بقى

Lady E يقول...

اقولك ايه يا شفقة
كل الحاجات دي وعليها حاجات تانيه طفشتني من مصر مؤقتا
لأن لو كنت قعدت اكتر من كده كنت هتجنن
عندك مثلا التعليم الفظيع في جامعات مصر ولا كامبريدج
وكمان السلوكيات في الشارع المصري
وحاجات تانيه كتير
بس بيني وبينك مصر في قلوبنا وبرغم قسوتها علينا بس برضه بنعشقها وبنحن ليها لما نبعد عنها

صباح الصباح يقول...

دلوقتى بقى الوطن كدبة كبيرة.. بقى اقطاعية للحيتان وبقى انعدام الضمير هوة الاساس.. ومابقاش تفرق ابدا الانسان محترم او لا.. المهم معة كتاكيت كام (اصدى فلوس)
بجد بجد.. يبقى انتا اكيد فى مصر.. المنكوبة

Mony يقول...

مش عارفة اضيف اي حاجة تانية علي اللي قولتية يا شفقة ياختشي

اهه هم يبكي و هم يضحك


دمك سكر حتي في سرد المصائب



بس حلوة "هي ديه مصر يا هبلة"

جديدة

Mony يقول...

مش عارفة اضيف اي حاجة تانية علي اللي قولتية يا شفقة ياختشي

اهه هم يبكي و هم يضحك


دمك سكر حتي في سرد المصائب



بس حلوة "هي ديه مصر يا هبلة"

جديدة

شفـقــة و إحســــان يقول...

مواطن مصرى نايم
ماشى يا عم اسلام لازم الفضايح دى لا يا عم ده انت تنام احسن وعلى العموم انا صلحت ال one غلطة
ويا ريت بما انك عندك واسطة وبتعرف صاحب فرن تبقى تجبلنا كل يوم بجنية عيش

شفـقــة و إحســــان يقول...

يوميات نائمة فى الارياف
معلش متزعليش المرة اللى جاية هتلاقى بارقة عمر مش امل
اما بالنسبة للكوميديا فمعلش هى سوداء لانها فى حالة حداد على المرحوم البنى ادم

شفـقــة و إحســــان يقول...

unique
معلش مش مهم التلوث ما انا استعرضت حالة التسوس واعتقد ما فيش فرق بينهم

شفـقــة و إحســــان يقول...

amgad
ماشى يا عم يارب نكون عجبناك اما بالنوسبة للحمة فدى شرحها يطول ده اذا كنا بناكلها اصلا

محمد فاروق الشاذلى يقول...

الأغنية مش بتاعت شيرين
ونسيتى تقولى فى البوست كمان:
إن بلدنا بتحبنا جدا لدرجة إنها مش عايزانا نمشى منها واللى بيمشى بيموت غرقان على شواطئ اليونان وإيطاليا أو فى العبارات بتاعت ممدوح إسماعيل.
يبقى إحنا كمان لازم نحبها ونتمسك بيها زى ما هى بتتمسك بينا

شفـقــة و إحســــان يقول...

miuosha
اى خدمة يا ستى بس بصى انا عايزاكى تموتى فيها مش تحبيها بس

شفـقــة و إحســــان يقول...

سومة مجنونة فى بلد عاقل
ماشى يا سومة وبعدين اشمعنا انتى جالك جنان يبقى انا كمان جالى حول ما هو كل ده من تاثير حب مصر
وبعدين انا هرشحك ولا تزعلى بس لو ما جاليش الباتون سالمون لحد البيت هصطادك

شفـقــة و إحســــان يقول...

lady e
يا شيخة فى قلوبنا ايه ورجلينا ايه ده الواحد من العيشة هنا جاتله سكته قلبية والنبى يا شيخة ما تشوفلناش تطفيشة معاكى بس مش مؤقتا

شفـقــة و إحســــان يقول...

صباح الصباح
معقول الكلام ده الوطن كدبة كبيرة طيب ممكن حضرتك تقولى مساحته كام فدان
اما بالنسبة للكتاكيت فانا عندى كتكوتين واحد اصفر والتانى احمر تفتكر مدى احترامى يكون اد ايه؟؟

شفـقــة و إحســــان يقول...

mony
اياكى وان عارفة لو ضيفتى حاجة هوريكى بس ايه رايك مش حلوة بذمتك ؟؟
مش هى دى مصر يا هبلة؟؟

(المهاجر الى الله) يقول...

مدونة رائعة وكتير جميلة وخصوصا البوست الاخير ده صحيح انا او مرة ازور المدونة لكن مش هتكون اخر مرة
البوست ده خلانى اشعر فعلا انى اعيش فى مصر (ام الدنيا)
ادعوكى لزيارة مدونة عيون على هذا الرابط
ww.eyuon.blogspot.com
وشكرا

Ahmed Fahmy يقول...

ههههههههههههه
مصر بخير يا جماعة
ماتقلقوش من حاجة خالص
كل حاجة هتبقي بيس و طبيعية و الناس هتعيش و تنام و تاكل مرتاحة و هتتجوز و تشتغل كمان زي باقية خلق ربنا
و طبعا الكلام ده ف المشمش ان شاء الله
يبقي انت اكيد اكيد في مصر
يبقي توقع الاسأ دائما
تحياتي

شهد الكلمات يقول...

طب تعرفي يا شوشو ان الميني باص ابو جونية و نص بيبقي زحمة جدا و علبة سردين عن الاوتوبيس

تسلم ايدك يا قمر

تحياتي

Desert cat يقول...

انا مش بقف فى طابور العيش بيجى لنا لوحده هو وباقى الاغراض من فطار وغدا وخلافه ... بس كنت بشوف الطابور ده وانا فى طريقى كل يوم حتى ده حرمونى منه ونقلوا كشك التوزيع
بالنسبة للميكروباصات فده بشوف بنفسى واكتر حاجه بتغيظنى انك تلاقى واحد راكب من الصبح والسواق قاعد يجعر 10 ساعات على الاجرة وهو مش يدفع غير وجاى ينزل ومش يكون معاه فكه كمان وياحبذا لو ورايا معاد ومتاخره ببقى عايزة اقوم اخنقه
تحياتى

Noha El-arabi يقول...

لا طبعا انا شايفة ان اغنية مشربتش من نيلها اكثر تأثيرا خلتني ابطل اسمع اغاني
احمدك يا رب
:)

blue-wave يقول...

هههههههههههههههههه
والله بوست راااااااااااائع
فعلا
معاكى حق
لما تلاقى كل حاجه غلط ووحشه
يبقى انت اكيد فى مصر:))

الإتربي اللولبي يقول...

لما تلاقي ريس مؤبد من 30 سنه يبقى انت أكيد في مصر

لما تلاقي حكومه نظيفه رشيده منظفه جيوبك و مرشده أحلامك يبقى انت أكيد في مصر

و كتيييييييييييييير من ده

ربنا يخليكوا على الجمال ده

دويتو هايل انتي و إحسان

تحياتي

سلام عليكم

Lady E يقول...

كفاية ان مصر فيها ناس رائعين زيك يا شفقة علشان احب مصر وتبقى في قلبي

وفي حاجات كتير لو بعدتي عن مصر هتحسي بيها مثلا

واحدة بتشتري منها الخضار تدعيلك دعوتين حلوين

لو حصل لحد حاجة بعد الشر في الشارع الناس كلها بتساعده

انا متأكده انا مصر جميلة برضه بالرغم من اي حاجة

TIMMY !! يقول...

بص .. قصدي بصوا .. قصدي .. بصيا :)

يعني انظرا .. بصيغة المثنى :)

أنا بصراحة زهت و جالي إحباط من اللي بشوفه في البلد دي ..

يعني لسه كنت بخلص أوراق المعاش لوالدي ...

تلاقيهم لازم يخبطوكا كام مشوار .. و مل ورقة تخلص من حته .. طب ليه ما تخلوش الحاجات جنب بعضها ؟؟ و تقولوا على كل حاجة مرة واحدة و تبقى الحاجات المطلوبة محددة ..

و الي زاد و غطى إن مكتب المعاشات في المشلحة دي .. كان في الدور الأخير .. الدور الخامس ..

مش عارف ليه ؟؟؟ هم مش عارفين إن الناس لما بتطلع معاش بتبقى خلاص تعبت و جابت آخرها ؟؟ ما يحطوه في الأدوار الأولانية ..

علشان كده انا قررت أعيش بالحكمة القائلة : كن علبيطا ترى الوجود جميلا ..

-----------
و شكرا على زيارتكم ليا
نورتو االمدونة انتوا و العائلة السعيدة :)

و أنا سعيد جدا بمروركم ..

و بتعليقكم المشجع ...

تحيتي لكما ..

و ما تحرموناش من طلتكم البهية

☼♫♪ عمــاد الدين يــوسف ☼♫♪ يقول...

هههههههههههههههه
اه يحقدكوا انتو زعلانين ان اللميعه بيلمعوا اومال هيكلوا عيش منين .. ينهار منيل ولا عايزينهم ينزلو طوابير العيش بتاعتنا .. إخص عليكو هو ده رد الجميـــل ؟؟؟
ويبقـــى انت اكيد في مصــــر

عيله مفتريه سابقا يقول...

امال يا شفاشق لو كنتى سمعتى مشربتش من نيلها
كنتى عملتى ايه؟

كنتى روحتى اتفرجتى على الحمير والامؤاخذه الدوجس والبهايم وهى سومينج ان ذا نيل

شكلك بصيتى من وش القفص بس

انزلى بقى بالتتر واتفرجى

صيف سعيد عليكى مهبب عليهم

سلامى

MY FATE يقول...

بعد كل اللى قرأته وشفته فى بلادنا المحروسة مش قادرة أقول غير كلمة واحدة
مصر هى أمي
نيلها جوا دمي
بس اللى ماسكها واحد على طول سارقها
وربنا يخلى الشعب اللى ساكت وعمال فيها عبيط
مصر مصر مصر
وعلى رأي الشاعر
"شوفنا مجنون حكم بلد جنبنا * وشوفنا خاين فى بلد جنب جنبنا * وشوفنا سفاح كان على مرمى بصرنا * لكن حكم الحراميه ماحصلش الا عندنا

كل ستين سبعين سنه يعدوا * تلاقى كل البشر ماتوا واتهدوا * وجه غيرهم وغيرهم يمشوا ويعدوا * واحنا فاكرين ان اعمارنا هيتمدوا * ورضينا بالذل عشان شوية ايام يتعدوا

اموت فى السرير ولا وانا عايم لايطاليا * ولا احلى فى تلج اوكرانيا * لا غرقان فى عباره فى الميه * طب محروق فى اسيوط او المنيا * او ماشى فى قطر درجه تانيه * دبرنى يا ريس واسيبلك الدنيا

تلاتين سنه من غير حروب * ولا مشاكل ولا رمى طوب * والفقر برضو مكتوب * وحسنى خربها تخريب مخراب فهو مخروب "
وكفاية كده بقي
سلام

حـــــدوتـــــة يقول...

السلام عليكم

حرام كفاية اوى كده
انتو لو جبتو ميزة كمان
انا ممكن يحصلى حاجة

سلالالالالالالالالالالالالالالالالالالالالالالالالالالام

صدى الصمت - عاشقة الورد - يقول...

من الواضح يا شفقة إنك دارسة مصر كويس قوى بس نسيتى تقولى إحنا قد ايه مبسوطين بالأسعار الرخيصة قوى لكل حاجة بنشتريها فى مصر والحمد لله المرتبات مكفية وفايضة وبنتبرع بالباقى للجمعيات الخيرية

شفـقــة و إحســــان يقول...

المهاجر الى الله
اهلا نورت المدينة وميرسى كتير على ذوقك وابقى تعالى المدونة ماتوهش

شفـقــة و إحســــان يقول...

ahmed fahmy
على العموم يا احمد احنا لو قلقنا فعندنا منوم وعلى فكرة الدنيا لسه بجهينه مش بخير

شفـقــة و إحســــان يقول...

شهد الكلمات
سردين ايه يا بنتى ؟؟انتى جعانة ولا ايه؟؟ ولا شكلك كده دخلتى حلقة سمك مش مدونة

شفـقــة و إحســــان يقول...

desert cat
احنا هنكدب من اولها ونفشر قال الاغراض بتيجى لوحدها قال ليه هى عارفة السكة طيب ازاى وانتى فى الصحراء ولا احتمال بتجيلك على ضهر نملة

شفـقــة و إحســــان يقول...

nohe
ليه بس يا نونة بطلتى تسمعى اغانى انتى المفروض كنتى تبطلى شرب وبكده تكون حققتى الغرض الاساسى من الاغنية

شفـقــة و إحســــان يقول...

blue wave
منورنا يا دكتور بس احب اصححلك حاجة .....انا معايا فكة مش حق

شفـقــة و إحســــان يقول...

الاتربى اللولبى
احنا دويتو هايل حسستنى انك دخلت مسرح مش مدونة بس على العموم اهو كله مكسب الهم تدفع حق التذكرة ولا الفرجة ببلاش ؟؟
عموما الفرجة مش ببلاش بس كلامك اللى يودى فى داهية هو اللى بلاش

شفـقــة و إحســــان يقول...

lady e
ايه التفاؤل والانتماء الفظيع دى
بس احب اعرفك ان الست اللى بتشترى منها الخضار وبتدعيلك دعوتين ده علشان انتى دفعتلها حقه وعرفت تدبسك فيه وهو بايت
اما الراجل اللى بيقع والناس بتساعده ده علشان ما يتهمش حد منهم ويتجروا من قفاهم
وهنيلك يا فاعل الخير والثواب

شفـقــة و إحســــان يقول...

timmy
منور بصى بقى يا سيدى بصيغة المفرد المذكر
اهم حاجة انك تكون عملت بالحكمة القاتلة وماشى عليها تمام
كن عبيطا ترى الوجود جميلا
بس يا ترى فعلا بيبقى جميلا ولا مهطولا؟؟

شفـقــة و إحســــان يقول...

المحرر الصحفى والشاعر
ياريت تبقى تعرفنى انت حررت ايه بالظبط لان فيه كتير من الدول لسه محتلة ويا ترى شاعر بايه ؟؟ بالاسى ولا الحزن ولا الاحباط ولا الاكتئاب
كمان احب اعرفك اننا مش حاقدين على اللميعة لاننا اصلا عندنا محل جزم وبنلمع كل يوم

شفـقــة و إحســــان يقول...

عيلة مفترية سابقا
ممكن اقدم على كورس لغة عند حضرتك شكلك هايلة فى اللغات الحيوانية ماشاء الله
واحب اقولك انى بصيت على " فيس القفص "وقفا القفص "والبودى كله ما سيبتش منه ولا بارت
سى يو

شفـقــة و إحســــان يقول...

my fate
منور فى بلد الكوسةوالبسبوسة مش المحروسة
مصر هى امنا كلنا بس مش عارفين بابا يبقى مين؟؟
وعلى كده كمان طلعنا كلنا اخوات من الام
بشكرك كتير على الشعر الهايل

شفـقــة و إحســــان يقول...

حدوتة
ايه انتى متضامنه مع حركة كفاية ولا ايه؟؟
خلاص يا ستى مش هنجيب ميزة
ايه رايك لو سميناه ميزو مش كده احلى ؟؟

شفـقــة و إحســــان يقول...

صدى الصمت
منور من غير ما تتكلم
انا فعلا وبلا فخر دارسة مصر كويس جدا اصلى خريجة كلية الحياة المهببة قسم الازبكيه
اما بالنسبة للاسعار فطبعا هايلة وعلى رايك المرتب بيكفى وبنصيف فى بورتو مارينا...... وان شاء الله هنفتح جمعية خيرية وقد نوهنا عنها فى البوست اللى فات شفت بقى المرتب بيكفى ازاى!

Empress appy يقول...

ههههههههههه يا لهوز على الاغانى الا كله كوم وعماد زعرور والسعد المجنون ده كوم تانى

محمد فاروق الشاذلى يقول...

ونسيتى تقولى فى البوست كمان:
إن بلدنا بتحبنا جدا لدرجة إنها مش عايزانا نمشى منها واللى بيمشى بيموت غرقان على شواطئ اليونان وإيطاليا أو فى العبارات بتاعت ممدوح إسماعيل.
يبقى إحنا كمان لازم نحبها ونتمسك بيها زى ما هى بتتمسك بينا

Unknown يقول...

انت قلتى كلمة حكمة احنا حسرنا المشكلات مش حصرنا لا حسرنا انا فعلا متحسرة..........لما تلاقى شباب زى الورد متحسرين ومتكبلين ومخنوقين وطهقانين يبقى انت اكيد اكيد فى مصر

دنيتى الجميله يقول...

انا بحب الغنوة دى جدا
وبعد البوست بحب مصر اكتر واكتر
اصلى مش هلاقى حلاوة اكتر من كده ولا بلد اجمل من كده

سمر الشافعى يقول...

هههههه انتى بتقولى فيها طيب والله العظيم فى برنامج على مولدى دى اتفرجت عليه مره كان هيجيلى استبحس وتخلف عقلى ومرارتى هتتفقع كانو عالبحر فى مارينا وبيسالو عن موضه المايوهات قطعه ولا قطعتين هااااااا الاجابه ايه طيب توافق ان مراتك تلبس مايو ولا لا بقيت اقول الرررحمه ايه العبط دا ياناس

كل سنه وانتى طيبه ياهانم

غروب يقول...

ههههههههههههه مش ممكن انا لسه داخله عالم المدونات من يومين والحمد لله انى صادفت المدونه دى ف البدايات لانها حلوه اوووووووووى ضحكتنى جداااااااااااا استمرا يا شفقه ويا احسان .....وهى دى فعلا مصر...

حلوه كمان قصه سماح في البوست اللى فات غريبه اوووووى عموما نكمل قراءه بااااى

غروب يقول...
أزال المؤلف هذا التعليق.
شفـقــة و إحســــان يقول...

appy
منورة يا قمر ومعاكى حق الطمى كمان وكمان على الاغانى النص كم

شفـقــة و إحســــان يقول...

قلب مصر
معلش اظاهر انها لاذقة بغرا وامرنا لله

شفـقــة و إحســــان يقول...

enjy
منورانا وقلبى معاكى ربنا يشفيكى يارب وترجعلنا بالف سلامة
بس انتى فكرتينى باغنية حسرة عليها يا حسرة عليها

شفـقــة و إحســــان يقول...

دنيتى الجميلة
منورة وعلى العموم انتى هتلاقى حلاوة ومربى وعيش فينو

شفـقــة و إحســــان يقول...

احمد كجول
منور واحنا اللى حصلنا الشرف وان شاء الله نزورك ونجيب معانا شيكولاتة

شفـقــة و إحســــان يقول...

سمر الشافعى
معلش يا سمر براحة على نفسك ...هى الحياة بقت كده يا مايوه تو بيس يا بلاش تعيس"تعيش"

شفـقــة و إحســــان يقول...

saso
اهلا اهلا اهلا نورتينا وشرفتينا ونورتى عالم التدوين

Zanooba (Zeinab sab9n) يقول...

ههههههه بجد بجد مدونتكوا تحفة تحفة تحفة يا شفقة يعني أنا حطتها في المدونات المفضلة و دمكوا زي السكر ..بس يعني يا شفقة يا أخطي مينفعش كده لازم تشيلي الندارة السودة من على عنيكي يعني مثلاً الشوارع مش نديفة إيه المشكلة أحمدي ربنا أنه في مصر في شوارع موجودة ..أهي أحسن من العشش و الخيام و لا إيه با أختي !!
أما طابور العيش ده حبيبي يعني أنا من ضمن أحلامي إني أنول هذا الشرف أني أقف في طابور العيش و أجرب الضرب على القفيان و الشتايم و أقرطف راس اللي قدامي و اللي ورايه يا حلولي يا حلولي :) بوست جميل أوي و مدونة رائعة مستنية جديدكم ....
السلام عليكم

بذرة امل يقول...

ههههههههههه
بوست جامد ياشفيقة
انتوا زى العسل بجد
يبقى انت اكيد اكيد فى مصر
مصر دى عالم كاريكاتيرى
نورتى مدونتى واتمنى انها مش تكون اخر زيارة

jessy88 يقول...

هو فعلا يبقي انتى اكييد فى مصر بس الجملة الاصح يبقي انتى اكيييد بين المصريين يخربيتهم فاضحيننا فى كل مكان دول لو راحوا المريخ هيبقوا بنفس الاخلاق صدقونى المشكلة مش فى مصر المشكلة فى المصرييييييييييييييييييييين

رحــــيـل يقول...

لالالالا بجد ده انتى مخلتيش
تفسير رائع بجد للاغنيه
اللى كل ماحد يسمعها يحس انهم بيحكوا عن بلاد ماففوق القمر

هنقول ايه
غير انك اكيد اكيد فى مصر

امل يقول...

السلام عليكم
انا عارفه ان الحاجات دي كلها موجودة
بس كل اما أقرا عنها أحسن ان قلبي واجعني كأني أول مرة اعرفها
ربنا يلطف بينا
تحياتي

ShimaaMahdy يقول...

معكى فى كل كلمه و فعلا الحاجات دى بتحصل

لكن تخيلى برضه بحبها و لسه عندى امل (:

. يقول...

نورتونا يا جماعه
و شكرا ليكم

kareem azmy يقول...

دي زيارتي الأولى لمدونتكم
حلو البوست ده
و الغريبة اني لسه امبارح كنت بتكلم و اتناقش مع ناس اصدقاء بيقنعوني اننا احسن بلد في العالم و ان التقدم اللي في الدول الغربية ده و لا حاجة

لاء و ايه كمان البلاد التانية دي وحشة
و اكبر دليل ان عندهم مافيا
انما بلادنا امان امان و مفهاش مافيا

انا والله كنت عاوز اقولهم ان فيه مافيا
بس مش رضيت اقولهم فين
هههههههههههه

سعيد بزيارتكم
صديقكم الجديد
كريم

الدرعمي يقول...

السلام عليكم

يبقى انت أكيد أكيد في مصر


كل سنة وأنتم طيبين

ورمضان كريم



آدم

جوجو يقول...

السلام عليكم

ليكم تاااج عندى

قررت أكون عانس يقول...

هههههههههههههههههه

انتى احسن لك تنتحرى وترمى من نفسك من فوق السجادة

ويغتت عليها ويقولها يا مزة ايه الحلاوة دى ........وهى تتف فى وشه يقوم يبتسم لها.......

ايوة فى مثل بيقول ان الرجال_مش كلهم..اغلبهم بس_ زى طابع البوسطى كل ما ....كل ما يلزق اكتر:)

وظائف أون لاين يقول...

عزيزى المدون .. عزيزتى المدونة


جائتنى فكرة عمل هذه المدونة عندما وجدت أن اغلب المدونين من الشباب واغلب المدونين اما طلبة بالجامعات أو منتظرين للوظيفة بعد التخرج وحتى المدون الذى وجد وظيفة فأنه يحصل على راتب بسيط


ولأننا كمدونين نجلس على النت بالساعات


فاننى فكرت وبحثت عن وسيلة أستطيع من خلالها زيادة دخلى وتوفير المال عن طريق النت وقلت لماذا لا نستفيد نحن معاشر المدونين من النت مادياً ومالياً


ومن هنا جائت فكرة هذه المدونة


فقمت بجمع بعض البرامج وبعض المواقع التى نستطيع من خلالها أن نتحصل على المال عن طريق العمل على النت ( بزنس أون لاين ) وعلى فكرة الموضوع بسيط ومجرب قبل ذلك وسهل ولكن يحتاج للصبر والأنتشار


والتفاصيل والشرح بالصور وكل المعلومات عن المشروع موجوده بالمدونة


يا رب الفكرة تعجبكم


ويا رب تشتغلوا وبلاش كسل وبلاش نقول مفيش شغل


الشغل موجود بس أون لاين

زيزو الشقى يقول...

دى اول زيارة وبأذن الله مش هتكون آخر زيارة
مدونتى تنور لو زرتينى
اتمنالك التوفيق
والنجاح
تحياتى
احتراماتى

سلاااااام

شفـقــة و إحســــان يقول...

zanooba
منورة يا زنبنب......وبعدين يا روحى انا ما اقدرش اشيل النضارة السوداء لانها بتخلينى ما شوفش الحاجات المنيلة اللى فى دنيتنا وكمان علشان لسه ما خلصتش الفيلم مع احمد مظهر اصلى بقوم بدور نادية لطفى

شفـقــة و إحســــان يقول...

بذرة امل
الحمد لله انك لسه عندك بذرة احنا بقى فقدنا الامل خالص ومابقاش عندنا الا عمر
كمان شكلك كده بتحبى رمسيس بتاع الكاريكاتير

شفـقــة و إحســــان يقول...

jessy
انا ما فضحتهمش ولا حاجة هما الا فاضحين نفسهم بقولك ايه دول ما ينفعش معاهم المريخ كبيرهم زحل

شفـقــة و إحســــان يقول...

رحيل
اى خدمة تفسير شفقة واحسان للاغانى الهابطة الملبية قريبا بالاسواق وعلى سى ديهات مضروبة

شفـقــة و إحســــان يقول...
أزال المؤلف هذا التعليق.
شفـقــة و إحســــان يقول...

امل
عارفة قلبك بيوجعك ليه؟
علشان البلد اصبحت مستشفى كبيرة فيها كل الامراض لكن ما بتعالجش ولا مرض

شفـقــة و إحســــان يقول...

shimaa
منورة خلى عندك امل وعمر ومامتهم وباباهم وفى العائلة كلها

شفـقــة و إحســــان يقول...

aliaawwe
انت اللى نورت مش شايف النور ولا ايه
ده عمانه

شفـقــة و إحســــان يقول...

kareem
هى فعلا احسن بلد فى العالم بس فى الكوسة ده احنا واخدين فيها الجايزة التقديرية
وابقى قول لاصحابك على المافيا بتاعة احمد السقا وهما هيقتنعوه

شفـقــة و إحســــان يقول...

ادم
منور بس المرة اللى جاية تجيب معاك حواء ولا انتم زعلانين ولا ايه
وكل سنة وانت طيب

شفـقــة و إحســــان يقول...

جوجو
ميرسى يا قمر بس انا مش عايزاه فالصو اه انا احبه الماظ
ايه رايك انا قنوعة صح

شفـقــة و إحســــان يقول...

قررت اكون عانس
لا لا لا لازم ترجعى فى قرراك امال الرجالة تقرف فى مين بس
كمان احب اقولك انى عملت اكثر من محاولة انتحار من فوق السجادة لكن دايما الشراشيب كانت بتنقذنى

شفـقــة و إحســــان يقول...

وظائف اون لاين
ميرسى على الوظيفة ربنا يخليك اول واحد يجبر بخاطرى انا والمسكين احسان من ساعة ما دونه اخيرا لقينا وظيفة وهقبض وهنعدى الفقر ولا الحوجة والشحاتة

شفـقــة و إحســــان يقول...

زيزو الشقى
منور وان شاء الله نكون اصدقاء وتزورنا علطول بس ما تبقاش تيجى بايدك فاضية

كـــيــــــــارا يقول...

بجدددددددددد تحفه انا في البدايه بجد اسلوبك يموت من الضحك

نيجي بقي للبوست

انا مش هقولك ان مصر مش فيها عيوب بس مش بالشكل اللي مصورينه ده

انا من مصر برده لكن الحياه مش كلها كده اكيد في ميزات

كمان مصر ملهاش دعوه اللي له دعوه هو الناسس اللي عايشين جوا مصر هما اللي بيقدروا يتحكموا في كل شي

لكن مصر مجرد مكان
نحن ليه
نشتاق ليه

انا مش بقول شعار
انا مصريه
وبحب بلدي
مش شيفاها بالشكل ده لاني بالفعل عاشقتها

تحياتي كيارا

غير معرف يقول...

بجد بجد بوست كئيب جدا

هى دى مصر

بس ان شاء الله يكون فى امل

عاشان انا عايشه للامل ده

فى يوم الحال يتحسن شويه و ممكن يتغير

بوست دمه خفيف ايوه ... بس فيه حاجات كتير اوى سلبيه

و دى زيارتى الاولى للمدونه

فى اوائل ايامى فى عالم التدوين

بجد مدونه رائعه

تحياتى ..

magnolia

Gihad N. Sohsah يقول...

ويلكم تو ايجيبت