الأربعاء، 8 أكتوبر 2008

الدنيا من غير ستات..... ما تتعاش

اولا هبدا الحلقة بتاعتى بمقولة قراتها لاخ مؤلف بتقول" فلتحيا الستات ولتسقط الشنبات"
ومن موقعى هذا احب ابلغكم .......باننى سوف اقوم بمظاهرة سلمية
هتسير من المهندسين
الى ميدان الحلمية وسانادى فيها تحيا الستات ولتسقط الشنبات

وماشى يا سى احسان انا هوريك ......قال ايه الباشمندس الاسطى احسان...... نزل بوست من ورايا بيفتقد فيه الاخت المرحومة الصايعة المتشردة اللى مش لاقيه حد يلمها ودايرة على حل شعرها الست هانم العزوبيه قصر الله عمرها
طيب تعالوا نحلل حروف كلمة عزوبية.....هتلاقى العين يعنى عره والزين زفت .....والواو واطيه......والباء بوظان.....والياء يع .....والهاء ههجم عليها واوريها شغلها بس سيبونى عليها

اوكيه ولا تزعل يا احسان ده انا بكتب البوست ده مش علشان ارد عليك
لا علشان كمان اعزيك وانزلك نعى....... فى مدونتى فى الفقيدة الغالية ام اربعة واربعين

بس علشان تعرف انها مشاركة وجدانية وكتابية منى وكمان ناوية انزلك النعى .....فى ربع عمود و3 كلمات فى جريدة معارضة وهاكتب فيها
طــــــــــــظ فى العزوبية ولا عزاء للسيدات

بقى يا راجل افتكرتك قاعد تكتب فيا
غزل صريح عفيف من بتوع الحاج احمد شوقى
او بيتين حلوين كده من بتوع سى قيس
والناس الحلوة بتوع الشعر الجاهلى
اتاريك لا كتبت بيتين ولا حتى حتة ارض او ربع فدان درة

قال ايه قاعد يعيط على العزوبية
بقى يا ناس ده كلام هى الدنيا من غير ستات تتعاش؟؟

ايوا اوعى حد يفتح بقه ويقول اه ولا نفس ولا كلمة.....ولا تنتوفة حرف واحد يطلع .......طيب لو تخيلنا ان الدنيا مابقاش فيها الجنس اللتيف الزريف الحونين احم احم الهو عظمتنا
تفتكروا شكلها كان هيبقى ايه؟؟
اكيد كانت هتبقى معمصة ومنكوشة وحافية وسوداء وحالتها بالبلاء

ده حتى لو تمعنا ودققنا النظر شويتن....... هنلاقى ان الدنيا نفسها مؤنثة ......الجنة مؤنثة.....كل حاجة حلوة على وزن التانيث اه....خدوا بالكم تانيث مش نسانيس

اما كل حاجة متعبة ومكعبرة ومدمرة على وزن شنب
عندكم مثلا.........عذاب يا ساتر
قهر.... يارب الطف ذل ....يا خرابى ربنا ما يورهولنا قرف.... وهو الواحد ناقص كل ده على وزن مذكر
طيب تخيلوا...... كده لو الرجالة فى الدنيا لوحدهم من غيرنا
هتبقى ازاى...... انا قعدت اتخيل
شوفوا بقى لو الواحد مسافر وركب طيارة ملقاش مضيفة يا خرابى الحال هيبقى ازاى....... محدش هيسافر او يبقوا يشوفولهم جمل يسافروا بيه مسيرة عامين
اصلا وهى الطيارة تبقى طيارة من غير المضيفة؟؟ طيب مين اللى هيقدملك الاكل ......ساعتها هتطفحوا غصب عنك ولا مين اللى هيربطلك الحزام اكيد هتسيبوا مفكوك وتقع على وشك وتريحنا
امال تفتكروا وقوع الطيارات ده بسبب ايه ؟؟؟
ده علشان بيكون الطيار مش مركز فى عدم وجود المضيفة وطبعا بيحدث خلل

وربكة فى الخطوط المهوية" الجوية" ويسبب وقوع الطيارة وموت الناس غرقا او ارتطاما او حرقا


ويا سلام بقى لو مبقاش فيه دكتورة ست .......وخاصة امراض النساء يووووووه الدنيا كانت اتقلبت راس على عقب وماحدش يقول وماله ما كفاية الدكاترة الرجالة
هرد واقول لا عندكم فى الصعيد والارياف...... مثلا لو ما كانش فيه دكاترة ستات ما كانش حد هيخلف اصلا
ومش هيبقى فيه نسل من اصله
ولو حد فكر يقترح ان المدام تولد عند دكتور....... شوف انت يا بوى ايه اللى عيحصلك ويحصله ده لو قدرت تقترح الاقتراح ده اصلا وما انضربتش برصاصة طايشة



ولا الممرضات اه تخيلوا المستشفيات من غير ممرضات هتبقى عاملة ازاى
ولا الحجر الصحى..... ده الواحد بيروح المستشفى عامل نفسه عيان علشان الممرضة تديله الدواء
شوف بقى لو الممرضة بقت بقدرة قادر ممرض ......بايده اللى زى المرزبة يديك حقنة يتوبك تروح مستشفيات تانى
ويحببك فى الموت بدل العلاج...... وساعتها هنستبدل لقب "ملائكة الرحمة" بابليس



طيب نيجى للمدارس شوف لو المدرسة من غير مدرسات
الواحد مش هيدخل عياله المدرسة اصلا ........وهيشغلهم فى جراج ... ايون
علشان دى الحجة...... اللى كل شوية الراجل رايح جاى بيها على المدرسة وبسببها بيدفع مصاريف اد كده

وبعدين هى المدرسة تبقى مدرسة من غير ست الناظرة والميس
ولا يا سلام بقى على مدارس اللغات..... والفرنساوى
اللى طلعت موضة جديدة دلوقتى والناس ما بتدخلش ولادها الا المدارس دى
طبعا فى فرق لما تلاقى الميس بتنطق الفرنساوى زى البسكوتة
ولا لما تقول جملة............sil vous plais يا سيدى بقها بينقط عسل
كمان تلاقى الولاد مجتهدين وبيذاكروا طول ما الميس موجودة ......وتلاقى التلميذ من دول متنح وفاتح بقه وقاعد يسمع الدرس وبيرطم لغات وبيعمل الهوم وورك
وشعلة نشاط ورايح جاى عينه فى الكتاب
ومابياكلش الا العيش الفرنساوى ويشرب فرنساوى...... ويقرا فرنساوى كل ده علشان خاطر عيون الميسز .....او المدام بالفرنساوى

اما بقى لو الميس رحلت وجابوا بدلها مدرس
تلاقى اسمه بقى خوجة....... والعيال مش عايزة تروح المدرسة..... وما بيذاكروش وكل يوم حجة علشان ما يروحوش المدرسة وعلطول عندهم مغص ودوخة
ولو اجبرتهم يروحوا المدرسة ينطوا من فوق السور وحالتهم بالبلاء حتى الاكل ما بياكلوش
ويقاطعوا العيش البلدى مش علشان الزحمة
لا علشان بينافس العيش الفرنساوى



نيجى للسوق...... الواحد بيروح المحلات اصلا علشان البياعات
بيبقى نازل يتفرج وبسببها بيشترى....... ده ممكن الواحد يدخل المحل يخرج شاريه كله وماضى كمان على شيك على بياض
والواحد يخرج منشكح وحاسس ان الحياة حلوة ولذيذة وكلها تجديد

اما لو ما فيش ستات..... هتلاقى المحلات فاضية مفيهاش مانيكان ستات
كله رجالة ولا يلاقى بياعة يعاكسها و يقعد واقف ادام المحل ساعة
او يدخل يقيس طول اليوم كبيره ينزل يتفرج خمس دقايق وما يشتريش..... وبكده نبقى ساهمنا فى عدم انتعاش وازدهار الصناعة اللى هى اصلا مزدهرة ومنتعشة ويحدث انقلاب فى الغرفة التجارية
وبكده يبقى يا عينى على اصحاب المحلات



الجامعة اه بقى لما السنة الدراسية الجديدة بتبدا....... تلاقى الواحد من دول نشيط وشايف نفسه ومتلمع على الاخر وواقف يوم قبلها ادام المرايه ونفسه مفتوحة على المذاكرة والسيكشن والمحاضرات
كل ده علشان رايح الكلية وهيقابل صحباته وزميلاته البنات
وتلاقى التزام بالمواعيد و الكافتيريات مليانة على الاخر والطلبات على ودنه ........ طبعا عندهم حق ما هو من غير البنات والزميلات مش هيبقى فيه عرض ازياء ولا ديفليهات
وتلاقى الطالب من دول نفسه مقفولة من المذاكرة وحضور المحاضرات طيب بذمتكم تجيله نفس ازاى والجامعة كلها شنبات

وطبعا للسبب ده واملا فى ارتقاء وتقدم المستوى التعليمى والجامعى
بدئوا يفتحوا جامعات خاصة وفى نفس الوقت متخصصة
كلها عروض ازياء وديفليهات ......علشان الطلبة نفسهم تتفتح ويخلصونا ويذاكروا شفتوا اد ايه الستات مهمين



نيجى للمواصلات ...... وخاصة الاتوبيسات والميكروباصات لما يكون فيهم ستات
تلاقيهم امم والناس شوية شوية تنط من الشباك وضرب يمين وضرب شمال والتذاكر شغالة على ودنه
والدنيا زحمة

اما لو كانت المواصلات من غير ستات واعتزلوا النزول من البيت هتلاقى الدنيا رايقة صحيح .....بس ما فيش تذاكر والاتوبيسات فاضية والميكروباصات بتنش
وماحدش هيركبهم بعد كده وهو اصلا الرجالة بتركب المواصلات دى ليه ......مش علشان توصَل لا علشان توصل بفتح الكلمة
وبكده.....حال البلد هيدمر اقتصاديا وهيزيد معدل وجود السيتى كاب



نيجى للفن والسينما والمسرح...... طول ما فيهم ستات الناس تدخل الفيلم وشباك التذاكر يعدى وتلاقيه بالضرب ولا طابور الجمعية
اما لو مفيش ستات من اصله .....مش هيبقى فيه ممثلات ولا افلام ولا انتاج وما حدش هيدخل يتفرج والسينما والمسرح هتبقى ضلمة
وبكده صناعة السينما هتتضرب هتتضرب



ولا الشعراء والادباء ......دول بقى لو مبقاش فيه ستات هيختفوا وينقرضوا خالص من الوجود او يغيروا شغلتهم بقى ويلفوا بربابة يغنوا عليها
ما هما عندهم حق هيكتبوا شعر فى مين ؟
ده غير انه مش هيبقى فيه الهام ولا شاهين ولا ملهمين



نيجى بقى لاخر حاجة وهو البيت فمن غيرنا هيكون خرابة ايون خرابة بيسكنها النمل والعنكبوت والصراصير
وساعتها ابقوا نضفوا...... وامسحوا........ واغسلوا ...... يعنى من الاخر هتسيبوا شغلكم وتتجهوا للعمل الحر مكوجى .....غسالة..... او طباخة
وبكده تبقوا تستاهلوا طالما عايزين
العزوبية



كلمة اخيرا ليك يا سى احسان ما تبقاش تنسى ان فى مقولة شهيرة بتقول" وراء كل عظيم امرأة" وابقى سلملى على العزوبية
شفقة

هناك 97 تعليقًا:

Miss. Sosa يقول...

البنات البنات الطف الكائنات

اديله يااختي اديله هههههههه

رجالة ناكرة للجميل .. لازم كدا من آن لاخر تنقحيه علشان ماينساش

بس ايه الابداع ده الجنة مؤنثة والعذاب مذكر ههههههه

بس الاسبلينج طاش منك عزوبية بالزين مش بالراء (الراء رمة) خليها الزين زبالة او زريبة كناية عن حياتهم قبل الجواز :))

تحياتي يا قمر

غروب يقول...

ههههههههههه ازيك يا شفقه هانم وحشانى والله

انا بضم صوتى لصوتك ومش جايه العزاء

ومن هنا بقوووول

يا نساء العالم اتحدوا قال عزوبيه قال
مش كفايه الازمه اللى البنات فيها

ههههههههههههههه

تسلم ايدك يا قمر

kochia يقول...

ايه الكلام الكبير ده
ادي الكلام ولا بلاش
لازم كدة تفكريه وتعرفيه عشان يبقي فاهم
اصلهم ساعات مش بقدروا

تحياتي

Mona Shereif يقول...

ههههههههههههههههههههه
انا معاااااااااااااااااكى قلبا وقالبا
تعالى يا محمد اقراااااااا

شفـقــة و إحســــان يقول...

miss sosa
وحشتينى يا قمر بس ايه رايك ؟؟
اما بخصوص الاسبيلينج فاعذرينى اصلى كنت متغاظة وعايزة افش غلى فكتبت اى حاجة بس الغلط مردود

شفـقــة و إحســــان يقول...

saso
منورة يا قمر وبعدين ياختى انا اخاف اضم صوتى لصوتك لحسن يكون عندك انفلونزا ولا تعدينى فى الاحبال الصوتية وانا ماحيلتيش غيرها صوت وبس

شفـقــة و إحســــان يقول...

kochia
معلش الكلام كبير بس ده علشان السيز بتاع الخط خليته على 16
ههههههههههههههههههه
وبعدين هما مش ساعات بيقدروا لا دول علطول وحياتك وبلاش تتاثرى بصباح فى اغنية ساعات ساعات

شفـقــة و إحســــان يقول...

sometimes
حسستينا اننا جوه كتاب بقلبا وقالبا دى بس ياريت القالبا يكون على مقاسى
وبعدين تعالى هنا قرى واعترفى وانهارى مين محمد ده؟؟

EMMY BABY يقول...

هههههههههههههههههههههههههههههههههههههه

كل ده رد على بوست العزوبية ياخرااااااااابى ان كيدهن عظيم صحيح

بس انا معاكى طبعا فى كل اللى قولتيه هى الدنيا تبقى دنيا من غير ستات

طب والنار تتملى ازاى :))


طبعا هنستنى بوست من استاذ احسان رد على البوست بتاعك يقول فيه البنات البنات صراصير البلاعات ههههههههههههه

بس بجد بوست لذيذ وطعمه حلو خالص وسكر زيادة

تحياتى

ايمى

Desert cat يقول...

هو البوست طويل وانا جبته على نفس واحد بس الحقيقه يستاهل النفس الواحد
اوعى تفهمى غلط مش كنت بشرب منكر فى مدونتك
كنت باخد نفس عميق شهييييييييييق وطلعت الزفير وانا فى اخر سطر
الحقيقة الرجالة دول ناكرى جميل ولا يستحقوا تاء التانيث فى حياتهم ابدا
قارفينا تحرشات ومبهدلينا معاكسات
وفى النهاية يقولوا لك العزوبية

سمر الشافعى يقول...

هههههههههه جدعه يابت ياشفقه هانم انتى اديلو متسكوتيلوش

ال عزوبيه ال

والنبى يبقى منظرهم ايه دول من غيرنا

يالهوى موتنينى من الضحك على منظر العيال وهما الصبح مش عاوزين يروحو المدرسه والنبى ياماما الاستاذ وحش اوىىىىىى واللى منهم هيروح يعنى يقعد يكب وينام او يعد الدقايق امتى الحصه المنيله دى تخلص بقى

والنبى المواصلات يبقى ليها طعم من غير المين حلوين كدا على وش واحد ايده طويله والتحام طبقات الشعب الكادحه مع بعض

المهم منتظرين رد سى احسان هنشوف هيقول ايه

mohamed ghalia يقول...

فعلا هنروح فين من غير البنات هو إحنا هنلاقى حد يزهقنا فى عيشتنا من بعدهم
هههههههههه.
ربنا يخليهم لينا.
كل سنة وحضرتك بخير
تقبلى تحياتى

Asmaa mahaba يقول...

لوووووووووووووووووووووووووولى اديله يا ابلتى شفقه قال بيقولك حقلق من صداقتك لسومه لتعلمك تربيه الوز على مين دا انتى اصلا استاذه فيه ههههههه
الى الامام يا وزه هههههههه خرطتيه واكلتيه
اشوف فيكم يوم يا رجاله استنى بقى اما اروح واجى تانى
فاصل وعظيمه يا شفقه يا اهل النعم

Asmaa mahaba يقول...

يا بنتى احنا دا احنا نسمه
دا احنا ورورد كدا برياحينها
دا احنا النص الحلو وما دوننا سواء
نحن نحن ومن بعدنا الطوفان
وانا وانتى ورقصنى يا جدع
غمض عينك يا احسان عيب كدا
بعدين دا رقص ايقاعى وانا والاخت شفقه بتحتفل نكدونا علينا بقى واقرفونا

ojg يقول...

ايوووون
انا قلت استوحاله تسكتي وتسيبي حقك المهدور
يا حبيبتي من غيرنا يلوصوا
وبعدين قولي لإحسان بيه
ان هو لما كان اعزب
كان بيتشيك عشان مين؟؟
عشان برضو يعجب الستات
هما دول الرجاله
مالهمش غير الجواز هو اللي يمشيهم ع العجين
:))
البوست دمه تحفه يا شفقة هانم

ahmed_k يقول...

هههههههههههههه
والله دمك سكر
بس مش شايفه إنك منحازه للستات أوي
بصفتك منهم
أنا بقى أقولك
لو مافيش ستات في الوظائف كانوا مازاحموش الرجاله في الشغل وكانت الوظايف حتبقى موجوده بوفره وسلاسه
ومكانش في بطاله ولا عجز موازنه ولا تضخم
والمواصلات من غبر الستات كانت حتبقى رايقه ومافيش إشارات مرور تقف بالساعات ولا عطله ولا تأخير مواعيد
والطيارات منغير مضيفات كان الطيارين إنتبهوا لشغلهم وركزوا فيه ومتحصلش حوادث وخسائر والذي منه
والمحلات منغير بنات كان الناس ركزوا في اللي بيشتروه ومحدش يخمهم لا في السعر ولا في الجوده هههههههههههههههههه

أيه رأيك أكمل ولا بلاش ؟؟ هههههههه

والعزوبيه إنتي ترجمتيها غلط
والصح هو :
ع = عز
ز = زلابيا
و = ورد
ب = بهويه
ي = يااااااااسلاااااام
ه = هواء منعش

آدي المعنى الحقيقي ههههههههههههه

سلاااااااااام

momken يقول...
أزال المؤلف هذا التعليق.
محمد فاروق الشاذلى يقول...

والنعمة حذرت إحسان لما قريت البوست وكنت خايف عليه من نتايج البوست اللى فات ده وادى النتيجة.
ياترى تقرير الطب الشرعى بعد البوست اللى فات قال ايه ؟؟؟

كلمة لاخويا إحسان بك: حاول تصلح الغلطة اللى فاتت دى بسرعة ونزل بوست جديد مليان كلام حلو عن فوايد الجواز احسن تقرير الطب الشرعى اللى جاى هايكون فيه جملة واحدة (ضرب افضى الى موت).

Hossam يقول...

hahahahahahahahha
تحفة اوى كلملامك
يا ريت تعدى على ميدان لبنان عشان اضملكم صوتى
هههههههههههههههههه
بجد بوست جميل اوى
سلام

mostafa rayan يقول...

طبعا يا شقفة انا اوافقك في هذا الرأي ملعون ابو العزوبية يا شيخة
بردة الراجل بيحتاج لست تكون معاه اوكد ست مش رجالة في صورة ستات زي اللي بيطلعو في التلفزيون ومايبطلوش شتيمة في الرجالة
بس ياشفقة في حاجةبردة مهمة عايز اقولها واختم بيها هذا التعليق
- هههه حلوة دي -
الدنيا من غير رجالة ..خنيقة جدا وزبالة
صح ولا ايه

بنوتة يقول...

ايوة كدة يا شفقة
وريه
احنا نعمل مظاهرة على الأخ احسان دة
وأنا معاك فيها

شفـقــة و إحســــان يقول...

emmy
ايه يا بنتى احنا هنلطم من اولها وبعدين بقولك ايه احسان مين ده اللى بتسالى عليه انسى يا ماما ده راح المستشفى من زمان

شفـقــة و إحســــان يقول...

desert cat
ايوا كده خديه على نفس واحد بس اوعى تفطسى والبس قضية
وبعدين يا كات شكلك بتركبى اتوبيسات
خفى من ركوب المواصلات وانتى ماتلاقيش لا معاكسات ولا تحرشات

شفـقــة و إحســــان يقول...

سمر
فكرتينا بالالقاب والبهوية اللى خدتها من زمان وراحت على ايد احسان
وطبعا المواصلات ما يبقاش ليها طعم من غيرنا بس سؤال هو انتى كنتى دوقتيها؟؟

شوية قهوة يقول...

جمدة اوي
خليك كدة جمدة
وافي في وش اي حد يقول كلام غير كدة
وبعدين انتي مش محتاجة تقولي مبررا
ده لو مكنش فيه ستات مكنتش بقى الحياة حلوة ابدا

شفـقــة و إحســــان يقول...

mohamed
ايون كده قر واعترف بالحقيقة
وهى الحياة تكون حياة من غيرنا
بس انت غلطت غلطة كتابية انت كنت تقصد هى الدنيا تبقى دنيا من غير ما حد يفرحنا ويسعدنا مش يزهقنا
اعدل كلامك امال

شفـقــة و إحســــان يقول...

سومة المجنونة
ايوا كده ادينى فى زغاريد وسلام جمهورى
احنا لازم نبنى دولة لوحدينا
وبعدين سيبك من كلامه ده انا قريب هفتتح عشة لتربية كافة الطيور والحيوانات والبهايم وعايزاكى معايا

شفـقــة و إحســــان يقول...

سومة
على فكرة نسيت اقلك ابقى تعالى نروح فيسكو احسن
لان احسان بيبص علينا واحنا بنرقص

شفـقــة و إحســــان يقول...

ojg
ايون هما فعلا من غيرنا ولا حاجة زى الشماعة اللى من غير هدوم .....والراس اللى من غير طرطور
ووالحلة اللى من غير غطا
والجلابية ام رقع ومبقعة ومنقطة
هاهاها اه انا ماسيبش حقى اوبدن حلوة اوبدن دى؟؟

شفـقــة و إحســــان يقول...

ahmed k
ايه رايك بقى انى منحازة جدا جدا جدا وهخلى المظاهرة تمتد من المهندسين لحد الغردقة
وبعدين شكلك كده ما زعلتش علشان انا متحيزة لا علشان الشنب

شفـقــة و إحســــان يقول...

momken
سامعة كده حد بيتريق ويقول بوستات طويلة
اه طويلة اصل احنا ناس محافظة وقبل كده قلت احنا مش من بتوع المينى
ولو حضرتك معترض على الطول وبتاخد اجازة خميس وجمعة مخصوص ابقى اعملك بوست كلمتين وبس او يا دوبك اكتب العنوان

شفـقــة و إحســــان يقول...

قلب مصرى
ايوا كده خليك مع اخوك احسان لانه محتاج حد يقف جنبه اليومين دول لحد ما تظهر نتيجة الطب الشرعى وادعوله

شفـقــة و إحســــان يقول...

hossam
بس كده انت تامر ياريت تقلنا تحب نعدى عليك الساعة كام كمان ولو تحب تنادى عليك من تحت البيت ما فيش مانع وهنخليك انت اللى تقود مسيرة المظاهرة

شفـقــة و إحســــان يقول...

mostafa
ايوا كده بدانا نجمع اصوات من الجنس الخشن
وخليها علينا يا سيدى الدنيا من غير رجالة خنيقة وزبالة
بس يسمعوا الكلام

شفـقــة و إحســــان يقول...

بنوتة
ايه يا بنوتة انتى جايه تهدى النفوس ولا ايه؟؟
اما بخصوص المظاهرة فما تقلقيش خااااااالص اختك قامت بيها لوحدها

Unknown يقول...

طبعا من غير بنات او ستات مش هيكون في دنيا أصلا

من غيرنا الجنس البشري ينقرض

في الوقت اللي من غيرهم نستنسخ ونعيش الحياه زي الفل
(:

صدى الصمت - عاشقة الورد - يقول...

والله أحلى كلام وأجمل دفاع عن المرأة وحقوق المرأة
أحييك وأقف جانبك بشدة وتحيا نون النسوة

princess يقول...

احلى حاجة الرد جيه فى الجون ههههههههه
احسن عشان الرجاله تحرم تشطح بخيالها كده:)
تحياتى

سندس وأمل يقول...

لالالالالالالالالالالالالالالالالالالالالالالالالالالالالالالا

حرام كل ده علشان الراجل قال إنه

بيودع العزوبية أمال لوكان ناوى

كنت عملتى فيه إيه...........

آه ربنا يكون فى عونك يا أستاذ إحسان

..................ويامدام شفقة

آه.....علشان مش تزعلى بس.....

...................................

يسقط الرجال وتحيا النساء......

أى خدعة ....علشان الواحد يرجع

لأصله برده......

دول خسارة فيهم الى إحنا بنعمله

يا أختى ....والنبى خسارة ..أى والله

خسارة.."تأكيد أصلى حاسه إنك نفسك

تقطعينى ......."

بس برده الراجل مش عمل حاجه.....

............لألأده عمل حاجات...

شفتى أنا معاك إزاى ........"سندس"

مواطن مصرى نايم يقول...

لا بقى
انا مع احسان
و تضامنا معه شكلى حنزل بوست تضامن معاه
اه يا رجال العالم اتحدوا
هههههههههههههههههه
النار مؤنثة و النعيم مذكر
(وش مطلع لسانه)

احسان يا خويا عندك حق يا كبير
و الله انا كنت معترض عليك البوست اللى فات
لكن طلعت متعذب يا عينى

بالراحة على احسان يا شفقه
الراجل طيب و فحاله و مش بتاع مشاكل
هههههههههههههههههههه

بوست جميل اوووووووووى

soulmate يقول...

بصراحه انا قريت تقريبا معظم البلوج البوستات الى فيه دمها خفيف جدا وبصراحه الاسلوب بتاعكو انتو الاتنين اكتر من رائع ولو على الانحياز للبنات فانا فى شدة الانحياز بس مش مهم فى الزمان ده انى انحاز او منحازش المهم ان حد يسمع ويقدر مش يقولك الست هيا نص المجتمع وصوتها يا ريت يفضل مش مسموع طول عمرها

غير معرف يقول...

ندعوكمللأشتراك فى برنامجنا الأذاعى وهو عن النت والمدونات ويذاع يوميا من الأذاعه الرئيسيه لمصر ...
كافة التفاصيل فى مدونتنا وموقعنا
المدونه
http://netonradio.blogspot.com
ويمكن الدخول للموقع من رابط بالمدونه
ويهمنا سماع آراءكم فى الأسئله المطروحه فى المدونه لأذاعتها
ويسعدنا ان نشير فى برنامجنا الى هذه المدونه الساخره
تحياتنا واطيب التمنيات

Unknown يقول...

الجنة مؤنثة فى الجوووووووووووووووووون هو دة الكلام وانا وراكى طبعا ومعاكى فى اى مظاهرات او اى مصلحة بس اول ما يبقى فيه لبش انا مع الرجالة طبعا ساعتها

شفـقــة و إحســــان يقول...

esraa
تسلمى يا قمر هو ده الكلام عايزين من ده كتير حبة كلام مجعلص كده يموتهم استنساخ وانقراض هو ده الكلام والا فلا

شفـقــة و إحســــان يقول...

صدى الصمت
منورة يا قمر بس مش عارفة ليه لما قريت تعليقك حسيت انك من المجلس الاعلى للمراه
صح؟؟

Mafrousa يقول...

هههههههههههههههههه
مدام بومبادور شفقة هانم
ههههههههههههههههه
إيه اللى انتى كاتباه ده...انتى بتسيحي لإحسان بيك على الهواء مباشرةٌ
هههههههه
و بعدين احنا كده يا ستات...عنينا فيه و نقول إخيه
ههههههههههههههه
يا حبيبتى فيه كلمتين انا عاوزه اقولهوملك على جنب كجه من غير ما حد يسمعنا
الدنيا اللى مافيها رجاله...مش دنيا عمرانه
امال مين حيتعب و يشقى و يجيب لنا الفلوس؟؟؟؟

كـــيــــــــارا يقول...

ههههههههههههههههههههههه


عسسسسسسسسسسسسسسسسسسسسسل ياشفقه

هو ده الكلام

ال عزوبيه ال

هما يقدروا يقولوا عاوزين عزوبيه

امال ليه بيتقدمو ويدفعوا دم قلبهم عشان بس يتجوزوا

سيبك يابنتي ده كلام حلاوه روح لكن هما روحهم في الستات :)

شفـقــة و إحســــان يقول...

princess
انتى نسيتى تقولى جه فى اى جون الاهلى ولا الزمالك؟؟

شفـقــة و إحســــان يقول...

سندس وامل
اخ منك اخ كده برضوا تتضامنى معاهم شكلك هيطلع راجل فى الاخر وبكده هخرجك من رابطة يا نساء العالم اتخمدوا"اقصد اتحدوا"

شفـقــة و إحســــان يقول...

مواطن نايم
ماشى يا اسلام انت صحيت بقى وفوقت عليا طبعا ما انت راجل ولازم تتضامن معاه
على العموم بما ان النار مؤنثة فاحسان بيسلم عليك منها وبيقولك ان العذاب لذيذ موت وعقبالك

شفـقــة و إحســــان يقول...

مشمشة
منورة يا شجرة الفواكة وتسلم الايد اللى كتبت التعليق الحلو ده واحب ابشرك بانك خلاص بقيتى عضوة معانا فى الرابطةمش رابطة البصل
لا يا نساء العالم اتحدوا

شفـقــة و إحســــان يقول...

البرنامج الاذاعى
اهلا ومرحبا بيكم فى مدونتنا اللوذاعيه
انا دخلت المدونة بتاعتكم بجد هى هايلة وفكرتها حلوة اوى اوى بس يا ريت لو تشيلوا حكاية اسم المستخدم والباسوورد علشان الواحد يقدر يعلق

شفـقــة و إحســــان يقول...

enjy
بقى كده يا جىجى عايزة تهربى اول ما يبقى فيه لبش وتسيبى اختك لوحدها هى دى المجدعة برضوا؟؟
عموما اذا حصل اى لبش فده طبعا هايكون مننا احنا مش منهم ما تخافيش

شفـقــة و إحســــان يقول...

واحدة مفروسة
منورة ووحشتينا
وبعدين ايه مدام بمبار دى شايفنى محشية رز
وبعدين تعالى هنا بقى الدنيا من غير رجالة تبقى مش عمرانه كده برضوا تشمتيهم فينا
لا بقى دى تبقى عمرانة ونص واللى مش عمرانة تبقى من سكان الصحراء و6 اكتوبر واحنا مالنا بيهم
وبخصوص الفلوس احنا بس نقول يا شغل واما قعدناهم فى البيت وقبضنا احنا ما بقاش انا

شفـقــة و إحســــان يقول...

كيارا
يسلم قلمك وتعليقك هو ده الكلام والا فلا
دول بيتنفسوا ستات يا بنتى ده احنا الاوكسجين

FreeKiller يقول...

كله كويس
ماشي
الا المدرسات و الموظفات ف الشؤون
دول مفتريات

yoyo يقول...

ههههههههههههه اسمحى ليا الاول طبعا ومعاك الباشمهندس الاسطى على حد قولك انت مش انا ههههههه اعبر لك عن اعجابى الشديد بالمدونة فيها روح جميلة وخفة دم اجمل

وكمان باعتذر انى اتاخرت فى زيارة مدونتكم الجميلة

اه والنبى يا اختى هى الدنيا من غير ستات تتعاش
كل شىء جميل مؤنث على حد قولك والله هما االلى مش حاسين بالنعمة اللى هما فيها

هههههههههههههههه عسل والله وانا بقول حوادث الطيارات دى منها

تنكسف على رجالة يا خراشى يادى الفضيحة مش عندنا حريم تنكسف على دكاترة ردالة ههههههههههه

اكيد طبعا احنا الميسات ( هاتكلم بالنيابة عن الزميلات هههههههه) بحكم انى مس انجليزى يعنى شوفى كدا بقى لو مستر راجل يعنى هو اللى بيطنق الكلمات مثلا ولا حتى هو اللى بيشرح انما المس خفة كدا وجمال حتى حاجة تفتح النفس برضه


انا بضم صوتى معاك والمفروض كلنا نتحدى كدا ونعرفهم ايه قيمتنا اصلهم ساعات بينسوا نفسهم يا اختى جنس نمرود بقى ههههههههه
اه صحيح احنا نعمل رابطة بقى ههههههههه ونختار زعيمة ومساعدة واعضاء وكدا هابقى اشوف الموضوع دا

تقبلى مرورى واعجابى الشديد

تحياتى
يويو

غير معرف يقول...

انا مش فاهمة هما عايزين ايه يبقوا قبل الجواز هايتجننوا ويتجوزوا وبيبقى حالهم حال
نيجى بعد الجواز يحنوا لحياتهم قبل كده

بس حلو كلامك قوى
عرفنا ان ورانا ستات

Beram ElMasry يقول...

الاعزاء ، شفقة هانم واحسان بك
ربنا يجعله عامر وبيوت المحسنين عمار
بتقول" فلتحيا الستات ولتسقط الشنبات"
هذا مغلوب على امره وفى مرمى قذف القباقيب
والناس الحلوة بتوع الشعر الجاهلى
كانو جهله ومع المعيز سارحين ولا توجد مواجهة صريحة تفتكروا شكلها كان هيبقى ايه؟؟
على النعمة اهدا واجمل
وركب طيارة ملقاش مضيفة يا خرابى الحال هيبقى ازاى...
مش اذا وصلت --- انها طيارة
مع خلص تحياتى

غير معرف يقول...

هههههههههههههههههههههههه
على فكرة أنتى هلكتينى من الضحك
يا عينى على سى إحسان أكيد دلوقتى قاعد ميت فى جلده منك

بس قشطة إيديله إيديله

قال عزوبية قال

شفـقــة و إحســــان يقول...

freekiler
حلو اوى كله ماشى دى يعنى على كده مفيش حد قاعد؟؟
وشكلك كده طلع عينك من الشئون

شفـقــة و إحســــان يقول...

yoyo
هاو ار يو يا ميس؟؟
ايه رايك فى العنجليزى؟؟
عموما احنا اتشرفنا بيكى جدا ويسعدنا انضمامك الى الرابطة بتاعتنا يا نساء العالم ارفعوا الحلل

شفـقــة و إحســــان يقول...

bos bos
من ساعة ما قلتى عرفنا ان ورانا ستات وانا عمالة ابص ورايا لما اتهلكت وقوع على وشى وبرضوا مش لاقية ستات

شفـقــة و إحســــان يقول...

beram
منور يا شاعرنا الكبير بس انت بيجعله عامر دى حسستنى انى بقدم طبق اليوم فى برنامج يجعله عامر مع شفقة عامر
وياريت بقى لو بيتين حلوين كده فى حق اخواتك الغلابة الستات

شفـقــة و إحســــان يقول...

انا ودماغى
اللى بيموت يا بنتى بيموت فى التربة مش فى جلده الا اذا كان عنده لحمة زيادة
وبعدين بطلى تشتغلى عند بتاع اللبن لحسن اثر عليكى

son's egypt يقول...

السلام عليكم
ده انتي شكلك شايلة كتير
بس انا احب اقول حاجة
ان الراجل والست الاتين بيكملوا بعض
يعني الراجل لا يقدر يستغني عن الست ولا الست تقدر تستغني عن الراجل

ابراهيم بكر يقول...

رغم انى الموضوع فتح منك الا ان الموضوع يشد القارئ والعرض ممتع على الرغم من اختلافه مع مافيه من افكار

د/ رامي شهاب الدين يقول...

ههههههههههههههه


واحد وواحد .. يبقوا إتنين

الحب كلمة .. من حرفين

من بنات حوا .. هنروح فين

هنروح فيييييييييييين؟؟



الموضوع ظريف أوى رغم طوله

دمتى بكل الحب والود .. تحياتى

دنيتى الجميله يقول...

سكر سكر انتى مش ممكن
ربنا يخليلنا مظاهراتك السلميه
ومش هنروح العزاء طبعا
فكرتينى فى الكلام عن المدرسات
بنتى فى اولى ابتدائى وبنت اختى فى kg1
فطبعا بتروح تسأل عليها قال يعنى كبيره
وراجعه توصفلى جمال الميس وحلاوتها وميكياجها روعه يا ماما روعه
ادى التعليم وجماله يا شفقه تخيلى من غير مدرسات
هههههههه

سارة درويش يقول...

ويا سلام بقى لو مبقاش فيه دكتورة ست .......وخاصة امراض النساء

ههههههههههههههههههههه

انتى نسيتى ان مافيش ستات هنبقى عايزين امراض نسا ليه
هههههههههههههههههههه

وربنا انتى زي السكر يا شفقة وبموت فيكى

ايوة كده اديله ماترحميهوش

مش انت مش ناقص لسعان يا سي احسان ههههههههههههههههههه انا بهدى النفوس

مـجـنـووون يقول...

أختي الغاليه كم يسعدني تواجدي في مدونتك الرائعه

***********************


ههههههههههههههههههه

والله موت من الضحك ، مش علشان المقال يضحك ولكن علشان الحاجات إلي قولتي أن البنات بتعملها مشفتهاش قبل كده خالص
أنتي وخده فكرة غلط علي الرجاله ، مفيش ست بتعمل لزوجها إلي بتقولي عليه ده
ويعني من الأخر ( الرجاله ماتت في الحرب ) ههههههههههههههه

وبعدين لو الستات بتعمل الحاجات دي كلها ، والله أنا حطالب أن الستات تكون أحسن مننا وهي إلي تمسك البلد بدل الرجاله ، علي الأقل حال الناس حيتحسن شويه


وحتلاقي الرجاله نزلين الشوارع وبيهتفوا في مظاهرات حاشده ويقولوا ( فلتحيا الستات - الراجل من غير ست زي الحمار من غير بردعه ههههههههه - الستات الستات وأحد غيرهم مينفعناش )

وحتلاقي أحزاب كتيره تطلع زي
حزب الستات الديمقراطي
وحزب الستات المسلمين
وحزب الستات الأشتراكي
وحزب شيل الواد من الأرض الواد حياخد برد ودا طبعا حزب الأقليه والي هم الرجاله ههههههههههههههه

هههههههه هم يبكي وهم يضحك

معلش أنا لسه وأكل فلافل يعني كاني شارب كيلوا حشيش ههههههههههههه

ملحوظة : أنا عمري ما شربت السجاير ومحبش ريحتها خالص

تقبلي جنوني
مجنووون

Unknown يقول...

السلام عليكم ورحمة الله وبركاته
ايوة كده ياحبيبتى
نورت المدونة (واسكتى)
العدا واتاريه كاتب
الحاجات دى من وراكى
وانا اقول ازاى ساكته !!
بس اديكى رديتى وخلصتى تاركك
الاهو فين الاستاذ احسان صعبان؟؟
زى ما بقى يقول إن ده اسمه.

Mony يقول...

هههههههههههه


بوست زي العسل و الله


كده التفاهم ولا بلاش


هو ده الحوار الحضاري


اخبارك ايه دلؤتي بعد كتابة البوست ده


و اقول احسن اخبار احسان ايه؟؟


يا تري ايه اللي حصله؟؟؟

غير معرف يقول...

هههههههههههههههههههههه

زى السكر

و عزوبيه عزوبيه

هم اللى خسرانين مش احنا

ههههههههههههههههههههههههههه

šσяšαяαα يقول...

ماشاء الله ماشاء الله

اييييييييييييييه دا كله ايييييييييييييييييه دا كله

هو دا الرد التومام المعتبر
مع انى واخدة على خاطرى منك انك جايبة سيرة الصراصير بشكل مش ولابد

والستات دول بصرف النظر انهم بيفرسوا احيانا الا انهم برضو طيببين وولاد حلال وتقدرى تشبهيهم بالكريم شانتيه اللى عالتورتة اللى من غيرها مايبقاش للتورتة طعم وتترمى للقطط
ـــــــــــــــــــــــــ

نوت صوغنونة

انا بشكرك جدا بجد على مرورك عندى والبلاعة منورة دايما بوجودك

ماتزعليش انى مش بتابع اوى بس شوية لخبطة وربنا يعديها على خير
دعواتك

وسلامى لاحسان بك الشربينى:)

زهرة الجنة يقول...

هههههه
ردك جه في الجون يا شفقة
ولا هدف ابو تريكةهههه

ايوا كده ونان استغربت ازاي البوست ده نزل من غير ما تقطعيه
ال عزوبية ال

شفتي الرجالة كلهم بياكلوا وينكروا زي القطط هههه

خليه هو بقي يطبخ ويغسل عشان يعرف العزوبية علي حق
ههههههه

تحياتي ليكم

momken يقول...
أزال المؤلف هذا التعليق.
شفـقــة و إحســــان يقول...
أزال المؤلف هذا التعليق.
شفـقــة و إحســــان يقول...

sons egypt
عرفت منين انا شايلة كتير؟؟
بس عندك حق دانا شايلة يجى 700 طن وزيادة

شفـقــة و إحســــان يقول...

hinger
منور المدونة ومعلش بقى الموضوع فتح منى لان بقه كان كبير اوى وما عرفتش اقفله
وكمان كان بيشد القارىء لانى بينى وبينك حاطة مغناطيس على المدونة واللى يعرف يخرج يبقى يقابلنى

شفـقــة و إحســــان يقول...

د رامى
منور العيادة بس شكلك كده مدرس رياضة مش دكتور

شفـقــة و إحســــان يقول...

دنيتى الجميل
منورة وبشكرك
بس استفسار صغير لاحسان بيه مدرستك بنتك فين والمدرسة بتكون موجودة الساعة كام؟؟

شفـقــة و إحســــان يقول...

سمو الاميرة سارة
منورانا فى القصر بتاعنا وسعيدة جدا انك بتموتى فيا مع انى من حاشيتك بس يلا خليها عليكى

شفـقــة و إحســــان يقول...

مجنون
منور السرايا الصفراء
بس احب اقولك ان الستات لو مسكت البلد والاحزاب هتعيشوا فى خير ورخاء ونعيم مفيش زيه ..... ومش هيبقى فيه لا ديون ولا معونة ولا الكلام الفاضى ده...... طبعا لان انتم عارفين الستات اد ايه مدبرين ومش مسرفين وهينشفوها على الاخر لحد ما يمشوكم انتم والبلد على العجين ما تلخبطهوش

شفـقــة و إحســــان يقول...

norahaty
ازيك يا جمر كيفك؟؟
الاستاذ احسان صعبان تاويته فى البلد بعد ما خلصت تارى وشربت من دمه
الثار ولا العار يا بنيتى

شفـقــة و إحســــان يقول...

mony
احسان بيه بقى عال العال وبسبب الحوار الحضارى ساب المدونة واصبح خواجه فى التاريخ اد الدنيا

شفـقــة و إحســــان يقول...

maganolia
على رايك عزوبيه عزوبيه هما الخسرانين واحنا الكسبانين يا شيخة بلا وجع دماغ وهم

شفـقــة و إحســــان يقول...

sorsaraa
معلش يا سوسو اعذرينى على كلامى على الصراصير اصلى مش من هواة البلاعات
ماينفعش نمل او دبان يعى ارحم شوية
بس تعليقك عاجبنى اوى اوى طبعا احنا زى الكريمة

شفـقــة و إحســــان يقول...

زهرة الجنة
منورة يا قمر بس شكلك كده اهلاوية قديمة
وبخصوص المطبخ والغسيل علم وجارى التنفيذ

شفـقــة و إحســــان يقول...
أزال المؤلف هذا التعليق.
شفـقــة و إحســــان يقول...

momken
اوكيه ولا تزعل اعلق على كل سطر
بخصوص الاريفة..... اعتقد ان مناخير حضرتك هى اللى بايظة لانى مفيش اريفة ولا حاجة
اما بخصوص اجازة الوضع ....انا افضل ابقى اقولك البوستات هتنزل امتى بعد الولادة احسن ويفضل بعد ما العيل يكبر علشان الفترة دى بتكون متعبة حبتين ومش هتبقى فاضى
ثالثا انا اهو ما سيبقتش ولا حاجة فى التعليق ......واذا كنت علقت على السطر الاول فده لان هو اللى مسك فيا وحلف ما سيبه الا لما اعلق
اما بخصوص احسان ......فبيسلم عليك وبيقولك مالكش دعوة بعونه لحسن بتوجعه
تحياتى

shoshta_ joker يقول...

السلام عليكم
انا شيماء مدونة جديدة من قريب يعنى........بجد حلوة اوىىىى طريقتك فى البوست يا ابلة شفقات لو تسمحيلى يعنى اقول كده ........ عوزة اتعرف عليكى
شكلك جمده اوىىىىى حلو اوىىى البوست ده ربنا يخليكى لينا وللستات علشان تخدى حقنا
دول اساسا حيموتوا علشان مش لقين يتجوز جين يقولوا عزوبية .... احنا حنفشر باه ... لما يلاقوا يتجوزا يبقوا يتكلموا اساسا........ خنقنا فى الشوارع من كتر المعكسات وفى الموصلات من كتر النظرات بلاش ارف .... وجين يقولوا عزوبية ولما يتجوزا يتامروا وياعدوا يتحكموا فينا ... يلا منهم لله....... حنعمل ايه هههههههههه . ما الدنيا برده متنفعش من غيرهم.. نستحملهم ومنهم لله .

شهد الكلمات يقول...

ستنتنتنضموا الاذاعة المحلية الي اذاعة البي بي سي

هنا البي بي سي ان ان اااان
هنا البي بي سي ان ان اااااااااان
هنـــــــا البي بي سي
بقي للمدونين جروب ع الفيس بوك يا رجالة

شرفونا و نورونا بالزيارة و المشاركة
جروب خمسة تدوين
http://www.facebook.com/group.php?gid=31035659947

جروب لكل المدونين و محبي التدوين
هانلعب و نناقش و نعمل نشاط اجتماعي
عايزة حماس و نشاط و الاقي ناس بالميات و الالف واقفة علي باب الجروب عايزة تدخل
يالا مش ها كتر مستنياكم هناك

تحياتي

كيكى عوووووو يقول...

ههههههههههههههههههههههههه
هههههههههههههههههههههههه
اسكتى يا شفقة ياختى اسكتى دة احنا كلنا معبين اسكتى دة الواحدة دلوقتى كانها انبوبة وانفجرت...بس اوعى من شظايا الانفجار
هههههههههههههههههههههه
بقى همة بقى فاتحين الجامعات الخاصة علشان كدة ؟
امممممممممممممممممممممممممم
قولتيلى بس انا بعمل عروض خيم ديفلية عندى..
ههههههههههههههههههههههه
ولا الكلمة الى قولتيها بالفرنسوى دى تجنن ياختى والله...افقدتنى توزانى وانا بتخيلها وحاطة روج احمر فاقع وماسكة كيش كشرى ياسلاااام على قمة الرومازية وقتها
الله الله بجد
وايوة كدة مستكتيش لاحسان بك قال منزل بوست للعزوبية قال وانا صدقت ان حد مات بجد
عموما مش جاين نولع فى النفوس لا جاين نولع اكتر واكتر
وعموما سماااااااااااااح
سمااااااااااااااااح
سمااااااااااااااااااااااااااح
وخدة بالك انتى هاااااااا
سمااااااااااح يا ختى انتى قلبك كبير
وفعلا الدنيا من غير ستات متتعاش
فلتحيا الستات
عووووووووووووووووووووووو

أبو يحيى يقول...

ومن أنكر حقكن

فرسولنا الكريم وصانا بالقوارير

وايضا قال عليه الصلاة والسلام

استوصوا بالنساء خيرا

وظل يردد بابي هو وامي قبل موته

الصلاة الصلاة وما ملكت ايمانكم

حقكن محفوظ

بل انتن صانعات الرجال

فهمسة في اذنكن

استوصوا باولادنا خيرا

وربوهن كما امركن الله

وفقكن الله

momken يقول...
أزال أحد مشرفي المدونة هذا التعليق.
دعاء مواجهات يقول...

ازيكوا ياقمرات

كل دة بتحتفلوا بعيد الميلاد

عاوزين جديد بقى

تحياتى