الثلاثاء، 16 فبراير 2010

هـــابى " فــــول انـد طــاين " داى


هابى فالنتين داى طبعا ماكانش ينفع تمر المناسبة دى من غير ما اجى
واقولكم كل سنة وانتم مفلتنين
وطبعا يا بخت اللى اتفلتن
واااحسراتاه على اللى متفلتنوش زى حالاتى

انا فى اليوم ده بيبقى ليا طقوس خاصة
بصحى من النوم فايقة ورايقة
ورقيقة على غير العادةيعنى قبل عيد الحب بيوم كده بجيب 3 كيلو رقاق
وبقعد اكلهم لوحدى تحسبا لليوم ده
وببعد عن تقشير البصل وتفصيص التوم وخلافه
علشان الراجل ميطفش ويقول ....يا فكيك من الهدية
المهم انه فى اليوم ده بيبقى فيه روقان
واغانى ورومانسية عالية اوى
طبعا هى موجودة فى كل الايام وكلكم شاهدين على كده
بس فى عيد الحب الفولت بيعلى حبتين
شوية افتح التليفزيون الاقى اغانى حب
" بحبك وانا كمان" .....كل كلمة حب حلوة قلتهاله"
افتح الراديون الاقى اغانى مفرفشة ومنعنشة
وبرامج عن عيد الحب وكلام جميل عن الرومانسية
والمذيع قاعد يهرج ويرسم على المذيعة
وهى ولا هى هنا
والمخرج عمال يبصبصلها ...... ويسبلها مع الاغانى يمكن تفهم
وهى مدياهم الطرشة وعمالة تقرأ.... الاس ام اس
رحت نطه من مكانى
وقلت وانا ماليش نفس ولا هى مسدودة
ورحت داخلة مصحيه احسان وكلى رقة
ونعومة اظافر اصلى مدخلتش المطبخ يومها

انا:احسان....سونسون ايه يا حياتى مش ناوى تصحى ولا ايه؟؟
دى مصر كلها النهاردة فى الشارع والناس كلها بتحتفل

احسان: وانا مالى ومال مصر تحتج ولا ماتحتجش؟؟
اذا كان انا ماحتجتش يوم ما اتجوزتك

سيبينى نايم وحلى عن قفايا الساعة دى ....انا نايم متاخر
انا : بقول بتحتفل مش بتحتج
انت بتحلم انك نايم فى ميدان التحرير وحواليك مظاهرات ولا ايه؟؟
فاكر نفسك سعد زغلول
وايه كمان " حلى عن قفايا دى ؟؟
ايه يا سونسون الالفاظ الغريبة دى؟؟
وانت شايفنى بكلم ميكانيكى حلى... واربطى
اصحى بقى بلا كس
ل
حسان:" اف" .. يا شيخة روحى اركنى بعيد
فى ايه يا ستى هو الواحد مايعرفش ينام فى البيت ده؟؟
انا: يا حبيى اصحى النهاردة يوم مختلف عن بقية الايام
احسان: ليه يعنى بليل جه قبل الصبح ايه يعنى ...يوم زى اى يوم
شفقة: يا بيبى النهاردة عيد احسان: " بيبى مبروك يا شفقة انتى حامل وكمان هتسميه عيد؟؟مش كنتى تاخدى رائى الاول
انا: حامل ايه وعيد ايه يا احسان؟؟
وهوا انا جيبالك سبوع! انا بقولك
انت ...... يا بيبى
تعبير وكناية عن حبى... ومشاعرى الجياشة

احسان: يعنى انتى مصحيانى يا شفقة علشان تدينى درس فى اللغة العربية
كناية.... واستعارة روحى...روحى يا شيخة
واذا كنتى عايزة تبقى جياشة روحى اتطوعى من بكرة

واهو تريحينى وتسيبينى انام
وياريت لو تطوعى فى الاسلحة والذخيرة
يبقى ربنا بيحبنى

انا : اقولك عيد .........تقولى اسلحة وذخيرة
الهى يرزقك برشاش صاحبه اعمى
ماشى يا احسان
قال اقول للراجل بيبى.... وكناية
يقولى عربى ... وجيش خلاص اجرب اقولهاله بالعنجليزى
اصله تعليمه فرانكوارب

انا : سونة يا حبيبى النهاردة الفالنتين داى
احسان: طين وهى ناقصة طين يا شفقة
مهى متهببة خلقة
يعنى ده وقته؟؟
انتى شيفانى نايم فى الغيط!
انا: يـــــــــــــــــــا مصـــــيبتى يا خـــــــــــــــــــرابى
شوية ولقيته صحى ولبس وقالى انا نازل
قلت بس اكيد هيخرج يجبلى هدية ...ويعملهالى مفاجاة
وقعدت ادعيله
ربنا يخليك ليا يا سونة
بس ياريت تبقى تستغلا كده فى الهدية
وتحسسنى بقيمتى الثمينة
يعنى لو حتة الماظ او ساعة دهب او بروش ...يعنى

وبينى وبينكم دماغى قعدت تودى وتجيبيا ترى هيجيب ايه؟؟
هيشتريلى ايه فى مناسبة زى دى؟؟
وقلت لنفسى لازم اخرج انا كمان اعمل شعرى
واغير تسريحة شارلى شابلن دى

واشتريله هدية الفالنتين
واجى اعمله مفاجاة
انا كمان
واهو برضوا يبقى تعبير عن مكنون مشاعرى بس بلغة تانية يمكن يفهمها
ولو انى معتقدش

خرجت وقعدت ابص حواليا ناس يمين..... وناس شمال
كله بيحتفل بعيد الحب
الدنيا كلها دباديب وقلوب حمراء وورد احمر
مصر كلها كانت حمراء فى اليوم ده
وكأن الناس بتتلكك على اى حاجة عدله تفرحها

وكل واحدة ماشية متشعبطة فى قفا اللى جنبها
عمالة تفليه
وهو يسبلها بعنيه فرحان بالتفلية
بينى وبينكم انا بقيت مفروسة اند متغاظة
بس قلت يلا هو الواحد هياخد زمانه
وزمن القفا
وبعدين انا حياتى وروحى بيشتريلى هدية
يعنى مش اى حد
المهم انا بقيت محتارة اجيب دبدوب ؟؟
لا ..مش معقول هيبقى كده عندى دبدوبين فى البيت
الدبدوب.. واحسان وانا معنديش مكان يساعهم الاتنين

لا خلاص اجيب جاتوه
اصل احسان طفس وبيموت فى الحلاويات
ولا اقولك يا بت يا شفقة بلاش ليجيله السكر ويفطس منى
والبس تهمة
وابقى مطولتش لا بلح الشام ولا عنب اليمن
ابقى طولت جوافة مصرى
بس خلاص مفيش غيره
شوية شموع على شوية ورد احمروتروحى كده تعملى جو فى البيت
وتولعى فيه باللى فيه
وقلت فى عقل بالى اكيد سونة لما ارجع هلاقيه
يا اخــــــــــــــــــــواتى .............هتجـــــــنن
يا خـــــــــــــــــــراشى
قلب بيهفهف وهيقف من الفرحة يا ترى هيجيب ايه؟؟
ايه ايه؟؟

ورجعت البيت وقعدت اولع الشمع
وطفيت النور ومليت البيت كله ورد احمر
واول ما سمعت احسان طالع على السلم
استخبيت وراء الباب
وقلت اعملهاله مفاجاة
واول ما دخل اتخض
ولقيته بيكلم نفسه زى المجانين
احسان: ايه ده هو النور قطع ولا ايه ؟
شكلك خنسرتى فلوس الكهرباء يا شفقة
وايه الحمار ده كله هو احنا زارنا ابو لهب
ولابيتنا بقى يوم القيامة ولا ايه ؟؟
شكلك يوم مش فايت يا شفقة
قال عيد حب قال
واحنا لاقين نأكل
وراح فاتح النور لاقانى ماسكة وردة وبقوله
هـــــــــــــــــــابى فـــــــــــــــــــــانتين داى يا حبيبى
راح بصيصلى ومبرق
ولقيته شعره منكوش وعينيه مقفولة وهدومه حمرا و مبهدلة وراح قايلى

احسان: ورد احمر يا روقانك
انتى تشترى ورد ......وانا اتقطع فى الشوارع
طيب كنتى جبتلنا لحمة حمراء
بدل الورد الاحمر
وبدل ما نشم نأكل
بالذمة مش كانت تبقى اطعم؟؟
خصوصا فى الازمة اللى احنا فيها

انا: ده ايه اليوم المدهنن ده؟؟
لــــــــــــــحمة حمــــــــــراء
اجيبلك ورد.... تقولى لحمة!
ده كده ما يبقاش عيد حب
ده يبقى عيد طفـــــــاسة ومجــــــــاعة

احسان: طبعا ما انتى ولا انتى هنا
ما لو كنتى عرفتى انا جبتلك ايه...... كنتى جبتى اللى انا قلت عليه
انا: "بشغف" ايه جبتلى ايه يا حياتى يا نور عينى؟؟
احسان: جبتلك حاجة غالية اوى من غلاوتك والنعمةانا وكلى تفاؤل .....وابتسامة للحياة .....ايه هى يا حبيبى ؟؟
بصيت لقيت الراجل جايبلى انبوبة بوتاجاز حمراء
ملفوفة فى ورق هدايا ومبسوط على الاخر
وبيقولى" هـــــــــــــــــــابى فــــــــــــــــــــول دااااااااااااااااااى"

شــــــــــــــــــــــــــــفقة

هناك 80 تعليقًا:

just waiting يقول...

ههههههههههههههههههههههه
فعلا في ظل الازمة دي ماينفعش غير انبوبة بتوجاز
لما الشمس تروح وميبقاش في ظل لأي حاجة اهو ضل احسان احسن من ضل الحيطة :)

just waiting يقول...

ايه دا انا اول تعليق
يلا اهو حجزت التاني كمان

just waiting يقول...

يلا مش مشكلة والتالت كمان
يمكن الاقي عريس يعجب بتعليقي واعمل فيه زي ماشفقه بتعمل في احسان

خواطر شابة يقول...

اه هو انسان عملي وكما كلف خاطره وجابها حمراء عايزه ايه أكثر من كده من الراجل حرام عليك ههه
هابي فلانتاين داي وكل سنة وانتم بتحبوا بعض
تحياتي لك

شفـقــة و إحســــان يقول...

Just waiting
ضل حيطة ! هو انا صرصار ولا ايه
لا خلينا فى احسان احسن ولو ان ضله بيجيب ضربة شمس

شفـقــة و إحســــان يقول...

Just waiting
تانى تعليق هو احنا هنفضل نتلكع ولا ايه كده الناس مش هتلاقى كراسى

شفـقــة و إحســــان يقول...

Just waiting
عريس انتى جاية تدورى عندنا على عريس
مش هتلاقى الا عتريس هو احسن واحد مناسب عنده كشك وعفشة ميه ينفع
والنبى ده لقطة

شفـقــة و إحســــان يقول...

خواطر شابة
راجل عملى ايه ونظرى ايه هو احنا فى كلية هندسة
قال كلف خاطره قال طيب كان كلف ايده بدل خاطره وكان بحبحها شوية

ستيتة يقول...

لأ يا شفقة انتي ملكيش حل
هههههههههههههههههههههه
ربنا يسعد قلبك
اجمل جزء ان كل واحدة ماسكة واحد بتفليه
لأ انا بضحك بهستيرية

ونعم الرجال احسان بيه
هي الحياة ايه غير انبوبة وحلة وفول وشوية ملح فوق بعض :)

Baskouta يقول...

بوست تحفة
ايه السكر ده
لا بجد ...هههههههه
انبوبة في الفلانتاين
دي اخر صيحة في الهدايا
عموما هو جاب حاجة تنفع البيت
يعني هو عمل فالنتاين للبيت مش ليكي
بس بجد اسلوبك تحفة
انا اول مرة عندك بس عجبني موت اسلوبك

تحياتي البسكوتية

غير معرف يقول...

للاسف ولحسن الحظ انى جيت هنا
للاسف لانى معرفتش المدونه من قبل كده
وحسن الحظ انى اخيرا عرفتها
عجبانى جدااااااااا فكره المدونه المشتركه بين زوجيين وربنا يسعدكم دايما
اما بالنسبه للزلانطاين
فحلو اوى الحوار بصراحه موتنى ضحك
والراجل عداه العيب جاب لك انبوبه
اهم واحسن م البروش
احمدى ربنا
تحياتى لكم

mostafa rayan يقول...

يوة يا شقفه الراجل كان بيعمل معاكي واجب يعنى انت مش شايفه الازمه
لكن ماقلتلناش بعد كده دخلت عملتِ اللحمه ولا ايه ؟
هههههه
تحياتى لك ولاحسان الجميل

sony2000 يقول...

هههههههههههههههههههههههههه
ضحكت كما لم اضحك من قبل
بجد هي دي الرومانسيه ولا بلاااااااش
قالك بدل هدايا ودباديب ومصر بتبقي فاليوم دا ضربه حمار كان الاهلي انتشر مبنا
وياريت مره تذوري جامعه القاهره فالذلانطين تتفرجي
الحمد لله بجد ان اليوم دا جه فالاجاذه لان تجربتي السنه اللي فاتت اليوم ده مكنش حلو خالص
تخيلي كدا وانتي قعده لوحدك وكلهم تنييييييين تنييييييين
بيبقي موقفك ايه بس انا ثابته علي موقفي الي ان يأذن الله
تقبلي مروري وتحياتي

عاشقة القمر يقول...

ههههههههه
مهيم حمراء
كل سنه وانتي طيبه يارب يجعل ايامك كلها حب

لــــ زهــــــراء ــــولا يقول...

هابى فالنتين عليكم
ايه الحوار الجامد اوى
مش قادره اعلق لان كلامك بجد تحفه تحفه
اكبر ابقة وروووووووود حمراء لكم
واجمل الامنيات بالسعاده والحب

شاب فقرى يقول...

هههههههههههههههههههههه

ههههههههههههههههههههههه
اسلوب الكتابة بيحمل موهبة ما شاء الله
بحب اجى هنا كتير
وبعدين حد طايل الانابيب
دا شيما بنت خالتها فى البيت عندهم وسايبه مصر عشان مش عارف جوزها يجيب انبوبة
وانتى ما شاء الله
جوزك راجل ملو هدومه ربنا يقويه كمان وكمان جايب لك انبوبة بوتاجاز
ربنا يخليكم لبعض ويحفظكم يارب
وتتهنوا وتعيشوا فى سعادة
شاب فقرى

Lady E يقول...

ههههههههههه يا نهار ابيض انبوبة حمرا ياه ايه الرومانسية دي كلها

افتكرت دلوقتي مقولة أقصر طريق لقلب جوزك معدته :)

هابي فازلين داي :)

ربنا يجعل كل أيامك حب وورود حمرا ودباديب :)

hana يقول...

هههههههه
ياربي طب وحد لائي دي هدية واووواووووي

ههههههههه
كل سنه وإنتم دايماً بحب وسعادة

ريمان يقول...

السلااااااام عليكم
ههههههههههههههههههههه
انبوبه بتوجاز احسن من مفيش

ههههههههههههههههه
حلوه حلوه
يلا كل سنه وانتوا مع بعض
وربنا يجعل ايامكم كلها حب ف حب

لــــ زهــــــراء ــــولا يقول...

جمييييييييييييييييييييييييييييييييل تسلم الايادي اسلوب رااااااائع كل عام وانتم بخير

سواحة يقول...

تصدقى انا فى شى لله
قولت فى عقل بالى و انا هاريه نفسى بوستات قرديحى منغير صور:-))
الا شفشق بقالها فترة مفرجتناش على اخر الصور :-)))

مكذبتيش خبر و البوست نزل
تصدقى انتم من الناس الى كنت بحكد عليكم فى اليوم ده :-))) بقولها بصراحة اكذب يعنى و قولت زمانكم بتتمشوا فى المولد و خبط القله بالخرطوشة و جابلك دبدوب :-))
بس يظهر حك ثلج فى السكة و ماكملش لحد عندكم :-)) و عينى غصبن عنى بقت برده عليكم:-)))

بس احلا حاجة اول ما شوفت الصورة الى قبل الاخيرة و هاتف خبط فى عقلى احسان باشا جبلها انبوبة
و قد كان:-)))))))))))))))))
بس سؤال الانبوبة لونها احمر اوعى يكون دم :-(( اصلك خضتينا عليه

يارب تكون كل ايامكم هابى فول اوبشن داى :-))) و فول بورد داى و فول اوتوماتك داى :-))و كل الفولات داى

مهموهة أحمد يقول...

هههههههههههههههههههههههههههههه
يا لهووووووي يا شفقة هانم
انا ميتة من الضحك و الله على القصة دي

بجد ربنا يقويكي على سونا بيه
بس هو بردو راجل واقعي و جابلك حاجة نادرة اوي الايام دي و المفروض تفرحي بيها اوي يا حبي
هههههههههههههههههههههههههه

ربنا يخليكم لبعض
و الهدايا بجد و لا تسوى شوية حنية او كلمة حلوة من الراجل لمراته

ربنا يسعدكم كمان و كمان يا رب

تقبلي كل حبي و تقديري

قيس بن الملووووح يقول...

نحن في حاجه الي رأيك في مشاكل القراء بمدونة "دقات قلب بعد الخمسين"
مع خالص تقديري

غير معرف يقول...

هههههههههههههههههه

حتى الانابيب غليت :D

شفـقــة و إحســــان يقول...

ستيتة حسب الله الحمش
معقول يا دكتورة انا مسالة صعبة اوى كده وماليش حل شكلك مالكيش فى الرياضة امال الدكتوراة بتاعتك فى ايه؟؟ اوعى تكون فى حتى
وبعدين انا علشان خاطرك وخاطر احسان هفتح مطعم فول وطعمية
امال وهو الحياة ايه غير انبوبة وحلة فول وشوية ملح

شفـقــة و إحســــان يقول...

Baskouta
وحياتك يا بسكوتة دى اخر صرخة مش صيحة اصلى انا من بعد الهدية دى صوتى راح

شفـقــة و إحســــان يقول...

رحلة البحث
طيب بالنوسبة لاولا وثانيا والنبى كنت هتعرفنا وتيجى عندنا ازاى لما انت مقضى الحكاية هاى واى ... رحلات وسفر وكمان مش اى رحلات دى رحلات بحث
طبعا لازم نتوه منك
بجد ربنا معاك
اما بخصوص انها مدونة مشتركة فده علشان نوفر احنا اصلنا فقر خالص وشحاتة
وبعدين ايه حكاية البورش دى ؟؟
لعلمك انا خريجة زراعة قسم درة عويجة مش خريجة لومان بس للامانة عندى سابقة واحدة

شفـقــة و إحســــان يقول...

mostafa rayan
واجب ايه وهوم وورك ايه احنا فى اجازة نص السنة
اما بخصوص اللحمة فبتسلم عليك وبتقولك سمعنى اغنية بودعك

شفـقــة و إحســــان يقول...

sony2000
بس بذمتك وبينى وبينك كده مزعلتيش انه اليوم ده جه فة نص السنة
اعترفى انا شايفاكى
واكيد الحقد والغل على العالم اللى بتفلى بعض دى كان واضح اوى صح
لا اوعى تفهمينى غلط مش حقد عليهم لا
حقد على التفلية ولا ايه؟؟
هههههههههههههه
وانا من موقعى هذا اناشدك ان تثبتى على موقفك وما تتحركيش خالص بس انا مش عارفة انتى ثابتة ليه؟؟
هو انتى لابسة جزمة فيها غرة ولازقة فى الارض
نورتينا يا قمر

شفـقــة و إحســــان يقول...

عاشقة القمر
المهم حمرا!
لا وضحى تقصدى ايه لنفهمك غلط
ههههههههههههههه
كل سنة وانتى طيبة انتى والقمر

شفـقــة و إحســــان يقول...

لولا وزهراء
بس الاول اعرف مين المتحدث الرسمى باسم المدونة ؟؟
لولا ولا زهراء؟
علشان اعرف مين فيكم اللى عايزة تعلق وجاية تعلق مين بالظبط
اوعوا يكون احسان اموتكم
ههههههههههههههههههه
مفناش من كده

شفـقــة و إحســــان يقول...

شاب فقرى
طالما بتحب تيجى هنا كتير والقاعدة عندنا مريحة يبقى بعد كده هتدفع حق المشاريب
اه احنا مش فاتحينها سبيل
وبعدين يا فقرى تلاقى شيما سابت البلد طفشانة من جوزها مش من الانبوبة انت اوام هتلزقها فى الانبوبة
عموما الانبوبة بريئة من افعالنا
اما بخصوص ملو هدومه فانت فكرتينى باغنية قديمة كانت بتقول " حلو ومدلع من يومه "

شفـقــة و إحســــان يقول...

Lady E
ايه يا ليدى احنا هنق ولا ايه
امال ما كانش فازلين يعنى كنتى عملتى ايه فينا ؟؟
بقى النق على الفازلين امال لو كان جيل ولا زيت دابر املا كنتى ولعتى فى المدونة

شفـقــة و إحســــان يقول...

hana
مالك مبسوطة اوى كده بالهدية واو وماو
دى انبوبة يا امى مش ازازة برفيوم
فكرتينى بشيرين فى المتزوجين لما فرحت بالزير
وقالت واو حاجة اورجينال خالص
عموما عقبالك لما تلاقى الانبوبة اقصد اللى يجبلك الانبوبة

غير معرف يقول...

ههههههههه

جوزك ده راجل جدع انه قدر يتحصل على انبوبه في الوقت ده

دي اغلى من الماس :)

هابي فلانتين .... وربنا يخليكوا لبعض

تحياتي

شفـقــة و إحســــان يقول...

ريمان
ايه يا ريمان الكروتة دى؟؟
بقى بذمتك الانبوبة احسن من الياميش اقصد مفيش؟
هو احنا فى رمضان وانا مش واخدة بالى ولا ايه؟؟

شفـقــة و إحســــان يقول...

لولا وزهراء
تاااااااااااااااااانى
اخ منكم خيلتونى بس لو اعرف انتى مين فيهم
انتم تؤام ولا ايه

شفـقــة و إحســــان يقول...

Wanda
ايه يا بنتى النق عينى عينك كده يا ساتر على الحقد
وبعدين ايه حكاية فول اوبشن....وفول اوتوماتيك....وثلج
انتى بتشتغلى فى عمر افندى قسم اجهزة كهربائية ولا ايه
مال اليوم قالب معاكى جهاز العروسين ليه

شفـقــة و إحســــان يقول...

الوفية للابد مها احمد
ايه يا مها هتزعلينى منك ليه
راجل واقعى ايه وبتاع ايه حسستينى انه من مدرسة احمد شوقى ولا مدرسة ابوللو
يعنى انبوبة وواقع لشوشته امال لو ماكانش واقع كان جاب ايه المنظم بس؟؟
وقال حاجة نادرة هو جابلى انتيكة يا بنتى
اعمل فيكى ايه.... اعمل فيكى ايه؟؟

شفـقــة و إحســــان يقول...

قيس بن الملوح
امال فين رائى ليلى يا قيس
عموما انا هاجى بس ربنا يستر من رائى

شفـقــة و إحســــان يقول...

مستخلص افندى
الانبوبة غليت انت مش معانا على الخط ولا ايه؟؟
شكلكم كده عندكم غاز
وش بيحقد

شفـقــة و إحســــان يقول...

فتاة من الصعيد
هوا انا جدع
انتى اكيد بتهزرى وتقصدى انها اغلى من الاناناس مش الماس

أميرة الأحلام يقول...

هههههههه اسلوبك جميل جداا
في سرد الاحداث
بجد روعه
وبعدين ماتزعليش ده اختار حاجه من الحاجات الي عامله ازمه في بلدنا الايام دىوجبهالك هديه
بس هو جابها منين علشان الناس الي مش لاقينها
هههههههههه
بجد موضوع حلو جدا
وكل ثانيه وانتم بخير وفي حب وسعاده

MaNoOoSh يقول...

عارفة لو مكنش لافف الأنبوبة في ورق هدايا
وكمان لو مكنش اختار لونها أحمر

انا كنت عملت فيه عمايل بالانبوبة دي

بس طلع ذكي
مش خسارة فيه طبق الفول
هههههههههههههه


ربنا يخليكو لبعض يا قمر

سواحة يقول...

يعنى الصراحة زعلتكم يعنى:-((
اقولكم منكنتش بحكد خالص و مش فاضية احكد اشاشا و كنت بنقيلى جزمة حمراء مش انبوبة حمراء :-)))))))))))))))

قروا و اعترفوا بقى انتم الاثنين بتحكدوا عليا فى الثلج
كحد دبل
ادى الجو بقى دافئ اهو و الثلج بيسيح و بينزل على دمغتنا من اسطح العمرات و البلكونات
افهم بقى زعلتم مين فيكم علشان الواحد يمشى فى المخاطر بالشكل ده ؟؟

خلاص مش ححكد خلاص :-))
و جهاز العروسين (لو عايزين تعيدوا التجربة من تانى عليا :-))
و خذوا عندكم بقيت قدرة الفول
فول زايس
فول تايم
فول باك
فول سكرين

:-))))

رحــــيـل يقول...

هههههههههههه
دايما ايامكم مختلفة

وبعدين الحق عليه يعنى بدل ما يجوعك مع ان انتى كان ممكن تطبخى على الشمع اللى انتى مولعاه واهو يبقى استفدتى منه برضه ياشفقه
:))
بدل ماينور على الفاااضى

اقصوصه يقول...

واللهي احسان ده مبدع

وهداياه مبتكره :)

Unknown يقول...

ههههههه
بنت انتى بتجيبى الكلام دا منين
انتى بتعملى روقاق فى الفول داى يالهوووتى
ههههههههههه
ربنا يسعدك ياقلبى يارب

شفـقــة و إحســــان يقول...

اميرة الاحلام
يا بنتى انا اسلوبى جميل لانى بلبسه فيونكة وبحطله ميك اب وخدا بالك
وبعدين يعنى هو مالاقش الا ازمة الانابيب ما البلد عندنا كلها ازمات
طيب كان جاب دهب مهو كمان كان فى ازمة وعمال يعلى ويعلى
وبعدين لو كل عيد حب فكر هيجبلى ازمة ايه يبقى مش هخلص
وعلى السنة اللى جاية الاقيه جايبلى دستة حريم وبيقولى ازمة بطالة
وحبيتين يقولى ازمة عنوسة
خدى عندك بقى مش هنخلص

شفـقــة و إحســــان يقول...

MaNoOoSh
بقى لما لف الانبوبة فى ورق هدايا وجابها حمراء بقى ذكى ؟؟
امال لو كان اخترعها كنتى قلتى عليه ايه "عبقرينو"
ده كده ما يبقاش ذكى لا يبكى بتاع انابيب "مخزنجى"

شفـقــة و إحســــان يقول...

Wanda
ايه مالك بتكلمى كده ليه يا خرابى انتى طقم سنانك وقع ولا بتسننى؟؟
ايه الهتمان ده واحنا ناقصين وبعدين ابقى كلمينا لما تبقى ترجعى من بلاد الجليد اللى انتى فيها دى
وبعدين ايه كمية الفول دى يا بنتى ده الواحد ينهق بعد كده
ويبقى فووووووووووول تنك

شفـقــة و إحســــان يقول...

رحيل
كده برضوا يا رحيل بقى احنا متخلفين؟؟
ايه شايفانا ناكشين شعرنا ومطلعين لساناه
انا عن نفسى لسه موصلتش للمرحلة دى
كمان ينور على القاضى ؟؟
احنا لسه مرحناش المحاكم لكن قريبا لا تقلقى ومش هنور على قاضى واحد بس
لا على المحكمة كلها

شفـقــة و إحســــان يقول...

اقصوصة
احسان منــــــــــــدع !
معلش يا اقصوصة اصل الحنفية بايظة وبتمطر كتير

شفـقــة و إحســــان يقول...

نهر الحب
منين ده يا نهر انا بجيبه من الفرن نفسك فيه ولا ايه؟؟
ده قرص بتتباع فى الفرن تعرفيه؟؟
طعمه حلو موووووت
لما اجيلك هجبلك معايا كيلو وانا جيالك قريب
وبعدين لو معملتش رقاق فى الفول داى امال هعمل ايه؟؟
اصلى انا بحشى الرقاق فول امال هحشيه لحمة واكلف احسان
ودى تيجى برضوا

Asmaa mahaba يقول...

ههههههههههههه ملكيش حق يا شفقه الراجل عملى وبيفكر فى الصالح العام المره دى انا حقف مع احسان معلشى بقى

غير معرف يقول...

عفوا للتأخير
السنة كلها حب مادامت بين شفقة و إحسان

غير معرف يقول...

عاجباني القناة الجديدة و أغنية الراجل ده هيجنني

ليس فقيرا من يحب يقول...

ههههههههههههههههههههه

مجنونه يا شفقه

الراجل عملى اهوة وعارف ازمه الغاز

اللى احنا فيها

غلطان يعنى

ههههههههه دمك عسسسسسسسسسسسل

شفـقــة و إحســــان يقول...

سومة المجنونة
وحياتك يا سومة الطالح العام مش الصالح
وكمان بتخونينى وتقولى هقف معاه طيب خليكى بقى فى طوابير للصبح

شفـقــة و إحســــان يقول...

sonnet
عفوا للتاخير!
وانت حاجز تذاكر قطر؟
وبعدين نسيت تضيف على السنة كلمة كبيسة

شفـقــة و إحســــان يقول...

sonnet
اتفضل القناة وصاحب القناة ميغلوش عليك بس واللى يرجع فى كلامه!

شفـقــة و إحســــان يقول...

ليس فقيرا من يحب
مجنونة شايفانى خلل للدرجة دى وناكشة شعرى وباكل اللحاف؟
وبعدين هو اللى يحس بازمة الغاز اليومين دول بيطلقوا عليه"قبطان" مكنتش اعرف

Lady E يقول...

انا جاية أقول

الله يسهلو يا شفقة :) نياهاهاهاها ضحكة شوريرة

شفـقــة و إحســــان يقول...

lady e
يسهلو ايه يا بنتى انا خلصت امتحانات ودراسة من زمان
وبعدين انتى هتعمليلى فيها الاشكيف المخيف

morgana يقول...

كل عيد حب وانتو طيبين:)

والله عمل اللي عليه وزياده
وجاب اغلي حاجه اليومين دول

شفـقــة و إحســــان يقول...

morgana
اللى عليه وزيادة تبقى قهوة
بقى بذمتك الانبوبة اغلى حاجة على كده الاطباق بقى ليها تمن

عايش... ولكن !!!! يقول...

بصفتى راجل
انا هقف مع احسااان :)
هو عمل اللى عليه :)) وبدون تحيز
بجد دمك خفيف جدااااااا من زمان مضحكتش كده

صدى الصمت - عاشقة الورد - يقول...

ههههههههه
طب والله الراجل دة مظلوم معاكى
دى أحلى هدية ممكن حد يشتريها فى عيد الحب
تحياتى

شفـقــة و إحســــان يقول...

عايش ولكن
بصفتك راجل اهلا وسهلا وربنا يسهلك طالما هتقف مع احسان
دانت هتتهرى طوابير
وبعدين ايه حكاية زمان دى انت مولود من سنة كام؟؟

شفـقــة و إحســــان يقول...

صدى الصمت
بذمتك مظلوم يا لومة
ده ظالم.... وقاهر النساء كمان
بقى دى احلى هدية؟؟
طيب عقبالك لما نباركلك على هدية عيد الحب وتكون طشت غسيل
وبرضه ساعتها هقولك احلى هدية

ameen يقول...

هههههههههههههههههااااى


هى هى هى هى هى

والله ما قادر ارد
هههههههههههههههه

شفـقــة و إحســــان يقول...

ameen
هى مين؟؟
انت جاى تدور على حد تايه عندنا فى المدونة ولا ايه؟؟
نورتنا

مي يقول...

كل سنة وانتوا طيبين يا احلى رمز للحب
وكل انبوية وانتى بخير يا شفقة ياختى ربنا يعينك
تحياتى

مسكات طبيعيه يقول...

هههههههههههههه
احلى هديه
على فكرة مدونتك عجبانى اوى جميله جدااااا

كيكى عوووووو يقول...

حسان: " بيبى مبروك يا شفقة انتى حامل وكمان هتسميه عيد؟؟
حد برضة يصحى الراجل على خبر زى ده
شوفتى فى النهايه جابلك انبوبه وعايز يخلص منك
ههههههههههههههه
شفقة بجد بجد بوست مميز جدااااااااااااا
عاجبنى وكيفنى اوى اوى
وعلى فكرة بحلم بيكى كتير
وحشتينى يارخمه

شفـقــة و إحســــان يقول...

مى
تقصدى تقولى يا احلى رفس للحب
اصل احنا رمز للحصينة

شفـقــة و إحســــان يقول...

مسكات طبيعية
ما تغلاش عليكى المدونة يا قمر
بس بما انها عاجباكى فاسمحيلى استغل الموقف واطلب عشرين مليون جنية استرلينى
طبعا موافقة صح

شفـقــة و إحســــان يقول...

كيكى
وهو برضوا يقدر يخلص منى دانا شفقة الله والاجر على الله يا عو
واخض مية راجل
وبعدين ايه كيفنى دى يا كيكى وانتى داخلة غرزة يا امى ؟؟
حسستينى انى فاتحة قهوة مش مدونة
اتنين شيشة يا واد يا رمة

غير معرف يقول...

مصــــر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
أرجو من كل من يقراء هذا أن يزور مقالات ثقافة الهزيمة بالرابط التالى
www.ouregypt.us

قلم رصاص يقول...

هههههههههههههههه

بوست جميل اوي

لأ واييييييه
الصور تجنن والله

كل سنة وحضراتكم طيبين

في امان الله