حــــــــرامية فى جمــــــعية خيرية

وحشتونا بجد اوى اوى اوى بس ياريت ......تسامحونا على البوست ده ....طبعا انتم عارفين الحالة فى البلد عاملة ازاى وان انا واحسان ........عواطلية من زمان.

ومش لاقين شغل..... والحالة والظروف اضطرتنا اننا نكون ضمن تشكيل عصابى لخطف الاطفال على الانترنت

والتشكيل ده كانت بتتزعمه..... ايناس "نهر الحب" ومعاها..... نسمة اختها..... وداليا "اهو ده عيبه"..... ودعاء "ربع ضارب" وسارة "محاولات البحث عنى" وماما امولة"الزمن الجميل"

وطبعا لما ايناس عرضت علينا اننا نبقى ضمن التشكيل الخطير ده ......احنا بدون تفكير وافقنا

اكيد انتم عارفين الاطفال بتتباع بكام دلوقتى........ ولا يا سلام بقى لو خدنا العيل من دول وفصصناه حتت وبعناه اجزاء .......وكل عضو لوحده
وعلى فكرة احنا مش طمعانين فى فلوس بس ..........لا كمان احنا بنساعد الدكاترة والمرضى المحتاجين للاعضاء دى علشان نرتقى بالمستوى الصحى فى البلد

طبعا زعيمات العصابة والتى تراسهم ايناس............ كانوا محضرين الخطة قبل التنفيذ باسبوع ودارسين المكان كويس ......والموقع ومعاهم خريطة محدد فيها كل حاجة
والمكان كان دار ايتام ببورسعيد....... والدار فيها 60 طفل يعنى شوفوا انتوا بقى الطفل .......يتباع بكام

المهم اننا اتفقنا مع ايناس .......وحددنا ساعة الصفر
واتجهنا الى بورسعيد فى اليوم والموعد المحدد....... ولكن احنا روحنا متاخرين شوية ولقينا ايناس منتظرانا هى وداليا





واول ما شافونا قالوا"احنا سعداء جدا بانضمامكم معانا " .....وان احنا بقينا من افراد العصابة
وطلبوا منا اننا نلبس اقنعة واحنا داخلين على الاطفال "تموية يعنى"علشان محدش يعرفنا

وكان برضوا من ضمن افراد العصابة ....... الصباغ"ابو المخاليل" وخالد "همس الحب" ومحمد"ابن حجر العسقلانى" ودول كانوا بيتفقدوا المكان

وبيشوفوا غرف الاطفال...... والمناور والشبابيك ..... وازاى نقدر نخطف الاطفال ونهرب بيهم بدون ماحد يحس
وايناس طلبت مننا اننا نلعب مع الاطفال........ ونشغلهم ونلهيهم فى اى حاجة
لحد ما بقية افراد العصابة يحضروا وكمان .........علشان الاولاد ما يشكوش فينا

وقعدت ايناس ....وداليا ....ودعاء.... وسارة .....ونسمة يشوفوا الهدايا واللعب ويلاعبوا الاطفال
وانا ....وحوكة"سونة سابقا" قعدنا نلعب معاهم...... ونغنى اغنية " يا لعبو لعبو " علشان نهد حيلهم ونعرف نخطفهم........ بس العيال ايه....... كانت دماغهم مصفحة ولا ياثر معاهم حاجة

وشوية وجه عسقول......... معاه شاش..... وقطن...... وميكركروم .......لزوم اى اصابات

ولما بدانا نهجم عليهم ......حس بينا طفل منهم وهو ...عبد الرحمن
كان عفريت راح اوام جاب منشار........ وقال اللى هيتحرك منكم هقطعه حتت
ماشاء الله اظاهر ان الدار بتعلمهم ازاى يدافعوا عن نفسهم بادوات النجارة
ولما بدا يهجم علينا....... عور نفسه يعنى كان فيه مصابين

وشوية لقينا ........بنوتة اسمها رحمة عمالة تبصلنا .......ومستغربة وقالت لنا ......انتم مجانين ولا ايه؟؟؟
يعنى مالقتوش غيرنا ؟؟؟؟ما العيال المتشردين اد كده فى الشارع مالقتوش الا الغلابة اللى زينا

حبتين كمان لقينا بنوتة "نورهان"هجمت علينا وقالتلنا عوووووو ........قال يعنى بتخوفنا يمكن نتراجع ونكش

وفجاه الصباغ.........اتهور هو.... وخالد وكان معاهم كورة راحوا حدفوها على البنت وهبدوها على الارض وعسقول مسك ولد منهم وكتفه

واحسان راح ماسك بنوتة ....ولافف ايده حوالين رقبتها علشان ماتصرخش.... وتفضحنا
قال يعنى...... قلنا نطلع بعيل ولا اتنين.... حتى يجى على المشوار اللى دبيناه ........من مصر لبورسعيد

وانا وبقيه زعيمات العصابة
قعدنا ناخد الهدايا .....والحلويات ونلم فيهم ونحط فى شنطنا ....... اهى حاجة ما تخسرش
لكن للاسف ملحقناش نهرب واتمسكنا

ورحنا القسم كلنا ...... وكام قفا ........ على كام شلوت ......... وفين يوجعك

وشوية ولقينا ناس اصحاب ايناس من بورسعيد جايين يشوفونا
كتر الف خيرهم وجايبين معاهم .....عيش وحلاوة
هما محمد الكتاتنى ......وجاسر مدونة"شباب روش طحن"....... وصاحب مدونة عقل مكركب ......ولما معرفوش يعملوا حاجة

خالد....... بقى اقترح اننا نكلم بابا ابو خالد نستنجد بيه
واتصلنا بيه لقيناه مع حرمه وابنه خالد .......كانوا فى مشوار برغم من ان ابو خالد منقطع بقاله فترة عن عالم التدوين وكان واحشنا جدا جدا
الا انه الله يكرمه ويخليه لينا يارب متاخرش عنا ....وحضر بصحبة المدام وابنه خالد
وفورا ضمنَا فى القسم .......بعد ما اتعملنا محضر....... بعدم التعرض للاطفال

اما الوحيد اللى فضل مقبوض عليه هو........ الصباغ
بتهمة الشروع فى اللعب مع سبق الاصرار والترصد .....وفضلنا مستنيينه ادام باب القسم كلنا
ولقيناه خارج بيركب البوكس وبيشنق نفسه ...... لانه مقدرش يستحمل الفضيحة
وقرر الانتحار ادام القسم

احنا لما شفنا كده جرينا كلنا .....خفنا نلبس تهمة والوحيد ....اللى قال انا هستنى مع عمو الصباغ
لما اعرف هيعملوا معاه ايه ....... وكمان طلب منه صورة تذكارية ادام القسم....... هو خالد ابن بابا ابو خالد
الوحيد اللى طلع شهم وجدع ورجولة

المهم اننا جرينا اوام...... قبل ما يتقبض علينا تانى
وركبنا المعدية ......اوم ايه بقى واحنا بنجرى
البت ايناس ....ودعاء ......زقوا داليا .......اظاهر كانوا متغاظين منها وعايزين يخلصوا منها
ووقعت داليا على الارض واهو ده كان عيبه
ودلوقتى داليا بقت اسم على مسمى "اهو ده عيبه"

حتى المعدية نفسها من نحسنا عليها وعلشان الحرام ما بيدومش عملت بينا حادثة بسيطة
وخبطت فى الرصيف .......وعرفنا ان تانى يوم ما كنا هناك ان المعدية عملت حادثة وخبطت فى باخرة بنميه
وتوقف سير الملاحة....... واغلقت قناة السويس نص ساعة
طبعا عرفتم اد ايه احنا نحس ..........ونحسنا البلد بحالها
حتى الاجرام نفسه فاشلين فيه

المهم ان ماما امولة ......الله يبارك لها ويخليلها اولادها
خدتنا معاها بورفؤاد نستخبى هناك ........وعزمتنا ...... انا طبعا احم احم شفقة هانم وسونة جوزى...وداليا...... ودعاء .....ونسمة....... وسارة....... وبابا ابو خالد واسرته....... وعسقول .......وخالد
على اكلة سمك وجمبرى لاننا كنا..... واقعين من الجوع

اما عن احمد الصباغ

فقد تم التحفظ عليه....... وحاليا بيلف المحافظات كعب داير فى عربية الترحيلات"اللى انتم عارفينها طبعا" وان شاء الله يتم الافراج عنه قريبا ..........ما لم يكن مطلوبا على ذمة قضية اخرى

وياريت تدعوله وتبقوا تسالوا عليه

شفقة

عـيــــــد "فــرخــــة" ... وعـيــــد "شـمـعـــــــة"

وحشتوني بجد
بقالي كتير ماقعدتش على الكي بورد ولا كتبت بوستات
وده بصراحة راجع لسببين
الأول
شوية انشغال في التحضير لمشروع جديد من مشاريعي الفاشلة
والثاني
هما الكلمتين الحلوين اللي قالتهم شفقة في حقي يوم عيد ميلادي

للسببين دول أخدنا هدنة من لعبة القط والفار
اللي بنلعبها أنا وشفقة هانم على المدونة دي


بس أنا إكتشفت أن الهدنة دي من طرف واحد
وإني اتضحك عليا وعملت هدنة مع نفسي
وإن شفقة هانم بتتبع معايا اسلوب "إضرب ولاقي"
خصوصا بعد البوست الأخير بتاع الأكل والطبيخ
واللي بيه مسحت كل الكلام الحلو اللي قالته في حقي في البوست اللي قبله
لذا أشهدكم جميعا بأني سأنتقم
وأني أحتفظ بحق الرد
وخليني أرد عليها هنا أحسن ما أرتكب جناية في الحقيقة
ولا أكتم في نفسي لحد ما أطق أموت
وعموما أنا مش هادوش دماغكم بالرد عليها دلوقتي
أنا بس هاحكيلكم حقيقة اللي حصل
يوم عيد ميلادي اللي فضحتني بيه ده
وبالمرة هاحكيلكم عن يوم عيد الحب كمان
وانتوا أحكموا بقى


إحم إحم
بصوا بقى
الحكاية بدأت من يوم 8 أكتوبر
اللي هوا المفروض يكون عيد جوازنا
بس في اليوم ده وبسبب آخر بوست كتبته بتاع العزوبية
كان هيتكرر معانا اللي حصل للسادات
زي مادخل التاريخ يوم 6 أكتوبر
خرج برضو من التاريخ والدنيا في نفس اليوم
والحدق يفهم !!

المهم
عدوا اليومين دول بسلام
والميه رجعت لمجاريها بعد ما كانت طافحة ع الآخر

وفي يوم 13 أكتوبر
الساعة اتنين بعد نص الليل
وانا لسة باخد وضعي على السرير واتغطى
فاجئتني بسؤال غبي وهيا مبتسمة
انت هتنام ؟؟
رديت وأنا مستغرب السؤال
ومستغرب أكتر الإبتسامة البلهاء
إنتي شايفة إيه ؟؟
قالتلي لأ إستنى .. قيس ده الأول
فتحت الدولاب طلعت منه قميص أبيض جميل
وهي عارفة ذوقي في الألوان
وقالتلي
القميص ده جايباهولك علشان عيد ميلادك .. بس شاكة في المقاس
قلتلها : يا ستي هدية مقبولة .. حتى لو طلع ضيق هأخسله مخصوص
كفاية انك فاكرة عيد ميلادي ونزلتي دورتي ونقيتي وإشتريتي
قالتلي : لأ ده علشان تلبسه يومها بس .. هديتك لسة حاجة تانية
قيست القميص وكان فعلا ضيق
ونزلنا تاني يوم نبدله
كل القمصان اللي في المحل مش جاية على مقاسي
بقت مش فارقة الألوان ولا الموديلات
أي حاجة المهم تيجي مقاسي
مافيش
لغاية ما صاحب المحل زهق مننا وإدانا فلوسنا
قلنا حلو خالص
ندور براحتنا في المول كله
ويبقى قدامنا تشكيلة أكبر والإختيار أوسع
بس كانت نفس المشكلة موجودة في كل المحلات
يا إما تكون الموديلات شبابي أوي
من أم ألوان عجيبة وترتر لميع وحاجات من دي
لفينا .. دوخنا .. تعبنا .. جعنا
دخلنا منطقة المطاعم
دفعنا ثمن القميص في
2 وجبة فروج من عند الطازج
ولما ماعجبهاش طعمه كملنا في كنتاكي
يعني من الآخر هديتي اتبدلت ... بفرخة

نيجي ليوم 15 أكتوبر
اللي هوا المفروض يوم عيد ميلادي
وأنا راجع من بره وفي طريقي للبيت
لقيت شفقة ماشية في الشارع وفي ايدها علبة كبيرة
واضح انها التورتة
ميلت عليها ... إتخضت لما شافتني
وقالتلي : انت حرقتلي المفاجأة
ده أنا طالبة التورتة دي من يومين
ورايحة جاية على الحلواني وهوا بعيد
ومش راضية أقولك تعدي انت عليه وانت راجع
وفي الآخر ... تحرقلي المفاجأة ؟؟
وعزمت فلانة وفلان وعلانة وعلان
(ورصتلي لستة أسامي يادوب تكفيهم الصالة المغطاة)
وعمالة أأكد عليهم وانا باعزمهم ان ماحدش فيهم يكلمك ولا يقولك
وفي الآخر ... تحرقلي المفاجأة ؟؟؟
قعدت تكرر حريق المفاجأة دي لدرجة اني شكيت
لأكون أنا اللي حرقت مجلس الشورى ولا حاجة
وطبعا عدى عيد ميلادي ولا أذكر من التورتة غير اني نفخت في الشمع
وإختفت بعدها بدقايق كل ملامحها داخل أفواه المعزومين (بالهنا والشفا)
طبعا ده كان بسبب التكدس السكاني اللي كان في بيتنا يومها

نيجي بقى للهدية
حزروا فزروا كانت إيه ؟؟؟
شفقة هانم حبيبتي كانت جايبالي موبايل
آه والنعمة
ومن أبو تليفزيون وراديو وشاشة تاتش
وعلى الرغم من ان الأوبشنز اللي فيه عيالي حبتين
بس كان أحلى مافيه انه بخطين وهيوفر عليا شيل جهازين
قلتلها : أنا عارف الأجهزة الصيني دي .. إمكانياتها كتيرة وسعرها رخيص
قالتلي : صيني إيه بس هوا أنا معقولة هأجيبلك تليفون زي بتاع الولد اللي شغال معاك ؟؟
لا يا حبيبي .. التليفون ده كوري .. وده بقى اللي الصين بتقلده .. ده حتى نوكيا
قولتلها : نوكيــــا ؟؟؟
نعم ؟؟؟
وريني العلبة كده
لقيته فعلا مكنوب عليه نوكيا N99i
والجهاز نفسه مكتوب عليه انه صناعة كوري
بس لفت نظري إن في كوريا محو أمية زينا
لدرجة إنهم صنعوا موبايل زي ده
وفي الآخر ماعرفوش يكتبوا إسم بلدهم صح
كوريا مكتوبه كده"KORIA" مش"KOREA"
بسرعة كلمت واحد صاحبي عنده محل موبايلات
وعرفت منه إن الجهاز ده أساسا صيني وبيتباع بـ600 جنيه
وسين من التجار بيعمله علبة وبيطبع عليه من جوا صناعة كوريا أو اليابان
علشان يبيعه بضعف التمن
والهانم فعلا كانت جايباه بـ 950 جنيه
تاني يوم رحت رميته للمحل اللي شفقة هانم اشترته منه وأخدت ثمنه
وطبعا مالحقناش نروح البيت بالفلوس دي
الهانم إشترت كرسي كمبيوتر جديد
وغيرت مراية الحمام
وشوية حبشتكنات كده في البيت
وراحت فلوسك يا صابر


عدى عيد ميلادي بحلوه ومره
وجينا لعيد الحب
وما أدراك بعيد الحب
ده كان يوم مشهود السنادي
شفقة هانم قبلها بيوم كانت موريانا ليلة كوبيا
مانمناش فيها إحنا الإتنين بسبب ضرسها
وبعد فشل كل المسكنات والمضادات والمضمضة
ولغاية الولد بتاع الصيدليه مازهق طلوع ونزول بشنط الأدوية
توصلنا إلى مخدر موضعي (سبراي)
والحاله هديت بحلول ساعات الصبح الأولى
وكان ميعادنا مع الدكتور في نفس اليوم
وأنا من كتر الخروج للشارع ولباب الشقة بعد دفا اللحاف
جالي برد في المعدة بكل أعراضه اللي انتم عارفينها
لدرجة اني ماقدرتش أنزل أروح معاها للدكتور
راحت لوحدها لدكتور الأسنان
وبعدها كانت المفاجأة
تخيلوا بعد كل المعاناه دي الهانم ترجع وجايبة في ايديها إيه ؟؟
ولا برتقال ولا ليمون ولا أعشاب للمعدة ولا حتى علبة دوا
الهانم داخلة عليا بدستة جاتوه وشمع لزوم عيد الحب
آه والله
زي ما بأقولكم كده بالظبط
( تنهيـــــده )
طبعا قضينا الليلة على أضواء الشموع
وأنا بأتكتك من البرد بسبب حرارتي المرتفعة
وبأتوجع من ألمغص اللي في بطني
وهيا من وجع أسنانها على نفس واحد
آه ... آه ... آه
مش مهم كل ده
المهم اننا كنا بنتوجع على ضوء الشموع
بالذمة شوفتوا جنان كده قبل كده ؟؟
أما بالنسبة للجاتوه
فهو جاري تحنيطه في التلاجة
كما فعل أجدادنا قدماء المصريين



هيا دي كانت حكايتي بمنتهى البساطة
من عيد جوازنا لعيد ميلادي لعيد الحب
علشان تعرفوا انه مابيمنعنيش عنكم غير الشديد القوي
والقوي دايما فيه الأقوى منه
وخبرني بالله عليك
ماذا تفعل لو كنت مكاني ؟؟؟

ملحـوظــــة :
أخدتوا بالكم إن أنا ما طلعتش من عيد ميلادي غير بفرخة الطازج ؟؟؟
علشان كده سميته "عيد الفرخة"
وما إستفدتش يوم عيد الحب غير بالشموع الي كانت مدفيالي الأوضة وأنا عيان ؟؟؟
وعلشان كده سميته "عيد الشمعة"
الملحوظة التالتة ان عيد ميلادها قرب هي كمان ... وربنا يقدرني على رد جمايلها الفظيعة دي

ولكم تحيــاتي
قبل وفـــــاتي
على يد مراتي
إحســــــــــان

هتطبخى يعنى هتطبخى

وحشتونا بجد معلش بقى اصل تورتة عيد الميلاد خدت............... وقت طويل عقبال ما اكلناها
اصلها مش بتزورنا كتير .......وبينى وبينكم
بقالى فترة كده قاعدة متنحة لسى احسان عمالة اتفرج عليه.............. وهو بياكل واتحسر على ايام زمان لا كان فيه..... كرش ......ولا ترهلات .......ولا شحومات

وسرحت كده شوية ايام الخطوبة .......ايام ما كان احسان يجى يزورنا وجايب معاه بوكيه ورد ....اما دلوقتى ما يدخلش الا بكوارع وممبار وفخدة لحمة

ولا لما كنا نعزمه على الاكل...... كان يجى ما يرضاش ياكل ابدا ويقولى اصلى شبعان
ده كفاية البصة فى عينيكى....... ونقعد نتحايل انا وماما علشان ياكل ونحط اللحمة ادامه يقول ....ابدا مقدرش اكل ويسيب طبقه مليان

و كان يقعد ياكل فى خمس دقايق ويقطع على مهله بالشوكة والسكينة

ولما كان يسالنى انتم عاملين اكل ايه النهاردة....... واقول مثلا مسقعة يقولى الله بموت فيها
دى تلاقيها جنان علشان عمايل ايديكى

ولما يجى يزورنا يقول....... الله ريحتكم باينة من على السلم ولا اللى داخل محل حلويات
طبعا ما انتى اللى عاملة بايديكى الحلوين دول...... والصوابع اللى عايزة تتاكل

اما دلوقتى ........يا ختى عليه راجل تشوفوا التامير والصوت اللى جايب اخر الشارع .........ولو رجع مالقاش اكل ولا لو فتح التلاجة ولقاها فاضية تبقى مصيبة

وينادى عليا " ايه ست هانم فين الاكل ؟؟اكل نفسى ولا ايه؟؟

فين مصروف البيت يا ست .....؟؟خدتيه ودتيه على الكوافير ولا ايه نهارك مش فايت

وساعات تلاقيه كل شوية ينادى عليا فين الاكل ؟؟ اقوله انت مش لسه واكل يقولى......... انتى هتجبيلى من بيتكم ؟؟
جعان عايز اكل
اقوم اسد بقه باى حاجة

وشوية يقولى اللى بعده فين الحلو؟؟ خلصينا الواحد حاسس انه هفتان

اقوم ابص له بصه غدر واقوله .....هفتان طيب تعالى كلنى احسن

وساعات يرجع من بره يقولى "انتى طابخة ايه النهاردة ؟؟ اقوله مسقعة ولسه مكملتش الكلمة يهب فيا..... ويقولى انا راجل شقيان ..تعبان مسقعة ايه

اللى هاكلها انا عايز "امح "على اللحمة وبمجرد ما ارد واقول مفيش..

عينكم ما تشوف الا النور...... وودانكم ما تسمع الا كل مصيبة ودبش وكلام متنقى ......مع حرمان من المصروف
ولا لو شم ريحة تقليه ......يوووه

اليوم ما يعديش ويقولى .......ايه يا هانم الريحة دى ....... ويحسسنى انه ولا اللى بتتوحم ولو الشوربه كانت دسمه شوية يهلل ويزعق ويرفس السمن كتير

شكلك كده متعرفيش يعنى ايه شوربة .........روحى بيت ابوكى اتعلمى وابقى تعالى اطبخى
ونقعد للصبح فى محاضرات ومهاترات طبيخية لحد ما يروح فى النوم

بصراحة فيه رجالة ........بيجيلهم حالة صرع مغولى فى الاكل بعد الجواز
ومش عارفة نفسهم بتتفتح على ايه ........اظاهر ان الخناق والمشاكل الزوجيه بتخليهم طفسين

المهم يا ستات المستقبل......... خلوا بالكم كويس من عرسانكم وعليكن بمراقبتهم والبحلقة ليهم وهما بياكلوا

بس بقولك ايه انتى وهى ده يكون من تحت لتحت يعنى ما تخلهوش يحس انك بتراقبية بدل ما يجيله تلبك او مغص معوى وتلبسى انتى وعينيك الموضوع

ولا تلاقيه بيقولك انتى باصالى فى اللقمة اللى بطفحها
ويقوم حادف الشوكة والسكينة فى وشك والواحد ما يضمنش العواقب ..اه

بصى يا ستى انتى تعزميه على الغدا ولا اقولك خليها عشاء علشان يبقى اوفر .....وما تغرميش كتير

واول ما يبدا ياكل ويحط ايده فى الطبق

خدى بالك كويس .......وشوفيه يا ترى بياكل زى الناس العاديين فى خمس دقايق
ولا اقعد نص ساعة زى الناس الخارقة للطبيعة؟؟

لو لقيته بياكل وبيخلص فى وقت مناسب وبيهتم يقولك رايه فى الاكل

كده يبقى انسان معتدل وطبيعى وتمسكى فيه بايدك وسنانك وعلى الماذون طيران

اما لو قعدتى تزغوريله ولقيته بياكل واحدة واحدة... وتاته تاته وعلى مهله على الاخر
ولا اللى مورهوش حاجة وقعد فى الاكل حاجشتاشر ساعة

وتساليه خلصت يقولك ومستعجلة على ايه ....هو احنا ورانا حاجة ؟؟ ويقعد يمزمز
ويمصمص ويسال على المقادير علشان هيروح يجربها

ده لازم تطرديه من بيتكم فورا ....وتقوميه من على الاكل غصب عنه
ويستحسن لو ترميله الشبكة فى وشه وتقوليله ماتعتبش هنا تانى

لانه يبقى انسان بارد وان شاء الله لو اتجوزتيه...... وسالتيه على حاجة هيرد عليكى بعد 90 سنة
والنوع ده يجيب الضغط والسكر والمرارة

اما لو لقيتيه بياكل ويخلص بسرعة جدا

وعقبال ما انتم تقعدوا على السفرة يكون هو خلص وبيغسل ايديه

وتقوليله انت كده كلت يقولك اصلى بحب اكل بسرعة زى كل الناس اللى فى الدول المتقدمة...... وتلاقيه كل وحلى وشرب الشاى وهيروح وانتم لسه ما حطيتوش ايدكم فى الطبق

ده طبعا انصحك بانك ما تتجوزهوش .......لانه يبقى انسان متسربع على عمره ........ومتهور وطايش

ولو فكرتى تتجوزيه ومفيش غيره ادامك امرك الى الله
بس تاكدى انه ممكن يطلقك يوم الصباحية
ويقولك مش انتى الانسانة اللى كنت بدور عليها........ وبكده يبقى اتخلص منك بدرى بدرى

اما لو لقيته قبل ما ياكل بيغسل ايده عشرين مرة بديتول وفينيك
وكل شوية يبص فى الطبق قبل ما ياكل وعمال يسال الاكل ده اتعمل ازاى
وفين وامتى ومين اللى شارك فى طبخه؟؟
وكانت غاسلة ايدها بمطهر ولا لا والطبق مصدره منين وبكام وخامته ايه ؟؟؟؟وفى الاخر ما ياكلش

فده تاخدى بالك منه كويس....... اوى لانه هيقرفك من الدنيا واللى فيها
وهتلاقيه جايب سنارة وقاعد يصطاد من الطبق .......ومصروف البيت هيضيع على المنظفات
واحسنلك انك تسيبيه فورا لانه هيعلك............ ويشلك ويجبلك الهسهاس
والنوع ده يبقى عايز بيت زجاجى معقم......... وممرضة مش زوجة

اما لو لقيته انسان هادى وبياكل عادى ولا بيهش ولا بينش
وكل ما تقوليله الصنف ده حلو؟؟ يرد يقولك هايل طيب دوق من ده...يقولك حلو اوى
طيب ايه رايك فى المكرونة دى؟؟؟؟ وتبقى معجنة وكل مكروناية لوحدها
يرد يقولك جميلة جدا........ تسلم ايدك
طيب والفراخ حلوة كده؟؟ يقولك كل اللى تعمليه فظيع

لازم تعرفى انه انسان مالوش كلمة ولا هيهش ولا هينش فى البيت
وتعرفى انك هتكونى المتصرف الوحيد والحاكم الامر الناهى
وده طبعا فيه ستات بتموت فى النوع ده......... ويا بختهم بيه لان الواحدة منهم هتقعد وتدلدل رجليها ولا حد
هيقولها بتعملى ايه

اما لو لقيته كل ما يجىء يزوركم يقولك الله ايه الحلاوة دى؟؟
تقومى انتى تنشكحى اوى وتزقططى فاكراه بيعاكسك
يقوم يقولك الله على ريحة التقلية ولا المحشى ريحته تجنن

تقومى تبصيله تزغوريله وتقوليله .......نعم افندم يقولك ايه يا عروستنا ...........انتم مش عازمينى على الغدا ولا اقوم اروح ؟؟
انا شامم ريحة الملوخية والبط كمان دى ريحتكم جايبة اخر الشارع

ولما يقعد على السفرة تلاقيه مزقطط وفرحان .........ولا اللى جاتله علاوة

وعمال يدب فى الاكل.... شوية ......محمر...... وحبه مشمر وكل شوية يقولك لا احنا لازم نستعجل على الجواز
مش علشان بيحبك ولا علشان خاطر عيونك لا علشان........ مفيش حد فى البيت يطبخله
وتبصى تلاقى نفسك قاعدة مع فيل على السفرة..... عمال يحشر فى بطنه لحد ما يجيله انتفاخ
ده بقى لازم تتاكدى انه ما ينفعش خالص
وانه عايز مطعم يعيش فيه مع الديوك والفراخ والبط .......مش يعيش فى بيت
وانه طفس وهمه على بطنه ..... كمان لازم تعرفى انك لو اتجوزتيه هترجع بيت ابوكى ناقصة ايد او رجل
لانه من المحتمل انه لو جاع ومالقاش اكل......... هياكلك انتى

اما لو لقيته من النوع اللى كل شوية يقولك السمن كتير فى الاكل
يا ريت لو ما تحطيش سمن خالص ........علشان الكوليسترول

وايه الزيت ده ياريت ما تستعمليش الا زيت زيتون ودرة ........علشان الزيت العادى بيجبلى حموضة
ولو اكلتيه حلويات يقولك خفى السكر شوية انت بتاكلينا عسل ؟؟ السكر غلط يجبلنا المرض

خفى التقلية بتاعة الملوخية ومالها الملوخية واقعة تحت ليه والشوربة فوق؟؟
التسبيكة فيها حاجة غلط ....محشى الفلفل حراق والبتنجان مكعور والصباع كبير ......ايه اللى انتى مهبباه ده اللحمة نيه والاكل بيقرقش

النوع ده طبعا انا مش هوصيكى عليه........... اكيد كلكم عارفين هتعملوا معاه ايه ؟؟
طبعا وهو نايم من البلكونة عدل
ولو الجيران نادوا عليكى ولا كانك هنا .........وكانك جالك طرش مزمن
ولو اتحيلوا عليكى معلش تعالى على نفسك وباجدع سكينة عندك

يارب بقى تكونوا استفدتم وتقدروا تختاروا صح
مع انى عارفة ان فى الوقت ده ...........مفيش حاجة اسمها اختيار ..........والواحدة منا يا عينى ما بتصدقش تلاقى خيال راجل
وتمسك فيه بايدها وسنانها ........ طفس طفس .......مفجوع مفجوع
المهم تتجوز بس انا حبيت انبهكم علشان ما تتصدموش

بس خليكم عارفين " اقرب طريق الى قلب الراجل معدته"

وكفاية بقى كده لحسن الجيران ............بقالهم ساعة بينادوا عليا

شفقة

عـــــــــيد ميلاد ابو فصـــــــــــــادة " happy birth day "

النهاردة بقى عيد ميلاد سونة حياتى المهم انى قعدت اجهز لليوم ده من اسبوع بس علشان تعرفوا انا بحبه اد ايه ولو انه ولا بيقدر.......... بس يلا اهو الواحد بيعمل اللى عليه

وبعدين قلت يا بت يا شفقة معقول يبقى عيد ميلاد الغالى سونة......... وما تكتبيش فى حقه كلمتين حلوين

لا مالكيش حق لازم تدعبسى شوية وتدورى فى نفوخك على كلمتين ينفعوا فى مناسبة زى دى

وقلت اما اكتب بيتين شعر كده ولا خاطرة صغنونة او اى حاجة ...........طالما هو مش راضى يعترف ويقول خليها علينا...... واهو كمان حاجة تمسح ذنوب العك اللى فات اقصد البوست اللى فات

رحت ممخمخة وكاتبة "اه بس بلاش تريقة ولا قر"

كلما اقترب يوم ميلادك اشعر بسعادة غامرة ويزداد خفقان قلبى لان في كل ميلاد تمر على سنة بالقرب منك

وكلما اقترب منك اشعر بحب وسعادة وشوق غامر وكل يوم وكل ساعة وكل سنة.... ازداد بمعرفتك ويزداد حبى لك ويكون مولدى فما اجمل القرب منك

يوم ميلادك وعندما تدق الساعة معلنة بداية سنة جديدة اطير فى فرح وبهجة لاوقد الشموع لتدفء المكان بالحب والسرور

فاليوم نبدا ولا ننتهى ويكفينى ان فى هذا اليوم البهجة لم تغادر كيانى ووجدانى

وساظل احتفل به الى ان ينتهى زمانى................. وكل عام وانت بخير

يا توام روحى ... وانيس وحدتى ....ورفيق دربى ...وشريكى فى فرحى واحزانى

لك كل الحب والشوق يا من روانى بحبه ....وحقق امالى و احلامى

الشاعرة المغمورة شفقة

الدنيا من غير ستات..... ما تتعاش

اولا هبدا الحلقة بتاعتى بمقولة قراتها لاخ مؤلف بتقول" فلتحيا الستات ولتسقط الشنبات"
ومن موقعى هذا احب ابلغكم .......باننى سوف اقوم بمظاهرة سلمية
هتسير من المهندسينالى ميدان الحلمية وسانادى فيها تحيا الستات ولتسقط الشنبات

وماشى يا سى احسان انا هوريك ......قال ايه الباشمندس الاسطى احسان...... نزل بوست من ورايا بيفتقد فيه الاخت المرحومة الصايعة المتشردة اللى مش لاقيه حد يلمها ودايرة على حل شعرها الست هانم العزوبيه قصر الله عمرها
طيب تعالوا نحلل حروف كلمة عزوبية.....هتلاقى العين يعنى عره والزين زفت .....والواو واطيه......والباء بوظان.....والياء يع .....والهاء ههجم عليها واوريها شغلها بس سيبونى عليها

اوكيه ولا تزعل يا احسان ده انا بكتب البوست ده مش علشان ارد عليك
لا علشان كمان اعزيك وانزلك نعى....... فى مدونتى فى الفقيدة الغالية ام اربعة واربعين
بس علشان تعرف انها مشاركة وجدانية وكتابية منى وكمان ناوية انزلك النعى .....فى ربع عمود و3 كلمات فى جريدة معارضة وهاكتب فيها
طــــــــــــظ فى العزوبية ولا عزاء للسيدات

بقى يا راجل افتكرتك قاعد تكتب فيا
غزل صريح عفيف من بتوع الحاج احمد شوقى
او بيتين حلوين كده من بتوع سى قيس
والناس الحلوة بتوع الشعر الجاهلى
اتاريك لا كتبت بيتين ولا حتى حتة ارض او ربع فدان درة
قال ايه قاعد يعيط على العزوبية
بقى يا ناس ده كلام هى الدنيا من غير ستات تتعاش؟؟

ايوا اوعى حد يفتح بقه ويقول اه ولا نفس ولا كلمة.....ولا تنتوفة حرف واحد يطلع .......طيب لو تخيلنا ان الدنيا مابقاش فيها الجنس اللتيف الزريف الحونين احم احم الهو عظمتنا
تفتكروا شكلها كان هيبقى ايه؟؟
اكيد كانت هتبقى معمصة ومنكوشة وحافية وسوداء وحالتها بالبلاء

ده حتى لو تمعنا ودققنا النظر شويتن....... هنلاقى ان الدنيا نفسها مؤنثة ......الجنة مؤنثة.....كل حاجة حلوة على وزن التانيث اه....خدوا بالكم تانيث مش نسانيس

اما كل حاجة متعبة ومكعبرة ومدمرة على وزن شنب
عندكم مثلا.........عذاب يا ساتر
قهر.... يارب الطف ذل ....يا خرابى ربنا ما يورهولنا قرف.... وهو الواحد ناقص كل ده على وزن مذكر
طيب تخيلوا...... كده لو الرجالة فى الدنيا لوحدهم من غيرنا
هتبقى ازاى...... انا قعدت اتخيل
شوفوا بقى لو الواحد مسافر وركب طيارة ملقاش مضيفة يا خرابى الحال هيبقى ازاى....... محدش هيسافر او يبقوا يشوفولهم جمل يسافروا بيه مسيرة عامين
اصلا وهى الطيارة تبقى طيارة من غير المضيفة؟؟ طيب مين اللى هيقدملك الاكل ......ساعتها هتطفحوا غصب عنك ولا مين اللى هيربطلك الحزام اكيد هتسيبوا مفكوك وتقع على وشك وتريحنا
امال تفتكروا وقوع الطيارات ده بسبب ايه ؟؟؟
ده علشان بيكون الطيار مش مركز فى عدم وجود المضيفة وطبعا بيحدث خلل
وربكة فى الخطوط المهوية" الجوية" ويسبب وقوع الطيارة وموت الناس غرقا او ارتطاما او حرقا


ويا سلام بقى لو مبقاش فيه دكتورة ست .......وخاصة امراض النساء يووووووه الدنيا كانت اتقلبت راس على عقب وماحدش يقول وماله ما كفاية الدكاترة الرجالة
هرد واقول لا عندكم فى الصعيد والارياف...... مثلا لو ما كانش فيه دكاترة ستات ما كانش حد هيخلف اصلا
ومش هيبقى فيه نسل من اصله
ولو حد فكر يقترح ان المدام تولد عند دكتور....... شوف انت يا بوى ايه اللى عيحصلك ويحصله ده لو قدرت تقترح الاقتراح ده اصلا وما انضربتش برصاصة طايشة


ولا الممرضات اه تخيلوا المستشفيات من غير ممرضات هتبقى عاملة ازاى
ولا الحجر الصحى..... ده الواحد بيروح المستشفى عامل نفسه عيان علشان الممرضة تديله الدواء
شوف بقى لو الممرضة بقت بقدرة قادر ممرض ......بايده اللى زى المرزبة يديك حقنة يتوبك تروح مستشفيات تانى
ويحببك فى الموت بدل العلاج...... وساعتها هنستبدل لقب "ملائكة الرحمة" بابليس


طيب نيجى للمدارس شوف لو المدرسة من غير مدرسات
الواحد مش هيدخل عياله المدرسة اصلا ........وهيشغلهم فى جراج ... ايون
علشان دى الحجة...... اللى كل شوية الراجل رايح جاى بيها على المدرسة وبسببها بيدفع مصاريف اد كده

وبعدين هى المدرسة تبقى مدرسة من غير ست الناظرة والميس
ولا يا سلام بقى على مدارس اللغات..... والفرنساوى
اللى طلعت موضة جديدة دلوقتى والناس ما بتدخلش ولادها الا المدارس دى
طبعا فى فرق لما تلاقى الميس بتنطق الفرنساوى زى البسكوتة
ولا لما تقول جملة............sil vous plais يا سيدى بقها بينقط عسل
كمان تلاقى الولاد مجتهدين وبيذاكروا طول ما الميس موجودة ......وتلاقى التلميذ من دول متنح وفاتح بقه وقاعد يسمع الدرس وبيرطم لغات وبيعمل الهوم وورك
وشعلة نشاط ورايح جاى عينه فى الكتاب
ومابياكلش الا العيش الفرنساوى ويشرب فرنساوى...... ويقرا فرنساوى كل ده علشان خاطر عيون الميسز .....او المدام بالفرنساوى
اما بقى لو الميس رحلت وجابوا بدلها مدرس
تلاقى اسمه بقى خوجة....... والعيال مش عايزة تروح المدرسة..... وما بيذاكروش وكل يوم حجة علشان ما يروحوش المدرسة وعلطول عندهم مغص ودوخة
ولو اجبرتهم يروحوا المدرسة ينطوا من فوق السور وحالتهم بالبلاء حتى الاكل ما بياكلوش
ويقاطعوا العيش البلدى مش علشان الزحمة
لا علشان بينافس العيش الفرنساوى


نيجى للسوق...... الواحد بيروح المحلات اصلا علشان البياعات
بيبقى نازل يتفرج وبسببها بيشترى....... ده ممكن الواحد يدخل المحل يخرج شاريه كله وماضى كمان على شيك على بياض
والواحد يخرج منشكح وحاسس ان الحياة حلوة ولذيذة وكلها تجديد
اما لو ما فيش ستات..... هتلاقى المحلات فاضية مفيهاش مانيكان ستات
كله رجالة ولا يلاقى بياعة يعاكسها و يقعد واقف ادام المحل ساعة
او يدخل يقيس طول اليوم كبيره ينزل يتفرج خمس دقايق وما يشتريش..... وبكده نبقى ساهمنا فى عدم انتعاش وازدهار الصناعة اللى هى اصلا مزدهرة ومنتعشة ويحدث انقلاب فى الغرفة التجارية
وبكده يبقى يا عينى على اصحاب المحلات


الجامعة اه بقى لما السنة الدراسية الجديدة بتبدا....... تلاقى الواحد من دول نشيط وشايف نفسه ومتلمع على الاخر وواقف يوم قبلها ادام المرايه ونفسه مفتوحة على المذاكرة والسيكشن والمحاضرات
كل ده علشان رايح الكلية وهيقابل صحباته وزميلاته البنات
وتلاقى التزام بالمواعيد و الكافتيريات مليانة على الاخر والطلبات على ودنه ........ طبعا عندهم حق ما هو من غير البنات والزميلات مش هيبقى فيه عرض ازياء ولا ديفليهات
وتلاقى الطالب من دول نفسه مقفولة من المذاكرة وحضور المحاضرات طيب بذمتكم تجيله نفس ازاى والجامعة كلها شنبات
وطبعا للسبب ده واملا فى ارتقاء وتقدم المستوى التعليمى والجامعى
بدئوا يفتحوا جامعات خاصة وفى نفس الوقت متخصصة
كلها عروض ازياء وديفليهات ......علشان الطلبة نفسهم تتفتح ويخلصونا ويذاكروا شفتوا اد ايه الستات مهمين


نيجى للمواصلات ...... وخاصة الاتوبيسات والميكروباصات لما يكون فيهم ستات
تلاقيهم امم والناس شوية شوية تنط من الشباك وضرب يمين وضرب شمال والتذاكر شغالة على ودنه
والدنيا زحمة
اما لو كانت المواصلات من غير ستات واعتزلوا النزول من البيت هتلاقى الدنيا رايقة صحيح .....بس ما فيش تذاكر والاتوبيسات فاضية والميكروباصات بتنش
وماحدش هيركبهم بعد كده وهو اصلا الرجالة بتركب المواصلات دى ليه ......مش علشان توصَل لا علشان توصل بفتح الكلمة
وبكده.....حال البلد هيدمر اقتصاديا وهيزيد معدل وجود السيتى كاب


نيجى للفن والسينما والمسرح...... طول ما فيهم ستات الناس تدخل الفيلم وشباك التذاكر يعدى وتلاقيه بالضرب ولا طابور الجمعية
اما لو مفيش ستات من اصله .....مش هيبقى فيه ممثلات ولا افلام ولا انتاج وما حدش هيدخل يتفرج والسينما والمسرح هتبقى ضلمة
وبكده صناعة السينما هتتضرب هتتضرب


ولا الشعراء والادباء ......دول بقى لو مبقاش فيه ستات هيختفوا وينقرضوا خالص من الوجود او يغيروا شغلتهم بقى ويلفوا بربابة يغنوا عليها
ما هما عندهم حق هيكتبوا شعر فى مين ؟
ده غير انه مش هيبقى فيه الهام ولا شاهين ولا ملهمين


نيجى بقى لاخر حاجة وهو البيت فمن غيرنا هيكون خرابة ايون خرابة بيسكنها النمل والعنكبوت والصراصير
وساعتها ابقوا نضفوا...... وامسحوا........ واغسلوا ...... يعنى من الاخر هتسيبوا شغلكم وتتجهوا للعمل الحر مكوجى .....غسالة..... او طباخة
وبكده تبقوا تستاهلوا طالما عايزين
العزوبية


كلمة اخيرا ليك يا سى احسان ما تبقاش تنسى ان فى مقولة شهيرة بتقول" وراء كل عظيم امرأة" وابقى سلملى على العزوبية

شفقة

وحوي يا وحوي ......... إيوحــــــة

كل سنة وانتم طيبين
ورمضــــان كريم

ولو انها جاية متأخرة
بس والله أنا بقالي شهر وزيادة عايز أكتب البوست ده
بس كان مزاجي متعكر شويتين
فخفت لحسن انقلكم حالة الغم اللي أنا فيها
ودي حالة بتجيلي كل سنة في نفس الميعاد ده
الأسبوع اللي قبل رمضان على طول
لأني بافتكر شخص عزيز عليا

أعز أعز صديقاتي
وبعد عشرة فوق التلاتين سنة
افتقدتها في الوقت ده من أربع سنين
قبل رمضان بأسبوع بالظبط

بالتحديد كان يوم 8 أكتوبر
وأول رمضان كان موافق 15 أكتوبر
فجأة ومن غير ميعاد حياتي اتبدلت

*****

من يوميها وأنا مش حاسس بطعم الأكل
أهو باسد فراغ في المعدة بأي حاجة والسلام
باكل لمجرد مايقولوش عليا ده مات من الجوع
لأنها هتبقى موتة بفضيحة

*****

من يوميها وأنا مش قادر أضحك بجد
الضحكة الملعلعة بتاعة زمان راحت فين ؟؟؟
الإبتسامة اللي ماكانتش بتفارقني طول الوقت
كنت مبتسم بسبب ومن غير سبب زي العبيط
ماتت معاها الضحكة
وانتحرت حزنا عليها إبتسامتي البلهاء

*****

من يومها والجيران عرفوا معنى الهدوء
بطلت أشغل الكاسيت على آخره وأغني معاه
حتى غنا الحمام وأنا باستحمى بطلته كمان
وتقريبا كده هابطل أستحمى أساسا

*****

من يومها وأنا مش مهتم بنفسي ولا شياكتي
أسيب دقني أو أحلقها ماهيش أزمة
أقصر شعري أو أسيبه طويل منكوش وايه يعني
ألبس كوتشي أو الهاف بوت ولا أقولك مالوش لازمة
يعني اللي هيقابلك هيسيب شكلك وبهدلتك وهيبص ع الجزمة ؟؟

*****

من يومها وانا مبطل أمارس هوايتي في لعب الرياضة
بقى بعد ماكنت بالعب 120 تمرين يوماتي
أبقى من أصحاب الوزن الزيادة ؟؟
راحت فين أيام التنس والجيم .. والساونا اللي كانت عندي عادة ؟؟
دلوقتي بادخل النادي من السنة للسنة لأجل ما أجدد الكارنيه وأعمل إعادة

*****

من يومك وأنا عايش ماليش سكة ماليش عنوان
مش لاقي سبب للعيشة .. ومش عايش كما الإنسان
رحتي في سكة اللي يروح مايرجعش ولا بعد زمان
خلاص ياحبيبتي جالي جنان ومنخوليا على هذيان

لسة ماعرفتوش الفقيدة مين هيه ؟؟
دي كانت حبيبة قلبي ... العزوبية

عزاء واجب لكل من فقدوا العزوبية
لا أراكم الله مكروها في عزيز لديكم
مع خالص تعازي / إحســان الحزين

النية المستخبية

وحشتونى اوى اوى جدا خالص بس معلش اعذرونا بقى رمضان وكان من المتوقع ان احسان هو اللى يفجر البوست الجديد وقعدت استنى واستنى لكن للاسف الصيام عامل معاه شغل فاستنيت لما هو خرج وقلت اكتب بوست انا ويكون ليا السبق البوستاوى.

لكن انا مش هاكتب حاجة عن رمضان علشان ما تبقاش خيانة لاحسان لانه هو اللى هينزل البوست الصيامى

اما انا فهنزل البوست الفطارى حاجة كده تسلى على السحور.

المهم انا كنت عند واحدة صاحبتى طلبت منى احضر معاها مقابلة مع العريس........ وانا بقى بموت فى الحاجات دى وقعدت اتفرج ومطرطقة ودانى على الاخر ومركبلهم سماعات .

المهم لقيت العريس داخل البيت اخر شياكة وانتكة الجاكت مالوش دعوة بالبنطلون ولا بلون الشوز ودقنه طويلة شكله كده معهوش تمن موس الحلاقة المهم ابتدت المحاكمة اقصد القاعدة والتعارف وانا عمالة ابص لنظرات كل واحد فيهم واحللها بتاملاتى ونظراتى النفساوية المتقوقعة فى الداخل.

وطبعا من المتوقع بس ده كان زمان ما اعرفش دلوقتى ايه الاخبار .....ان اجمل احساس لما واحد يجىء يتقدم لواحدة ويطلب رجليها للجواز.....عفوا يطلب ايدها علشان يحطها فى الكلبشات

طبعا اول ما ابو العروسة بيشوف العريس بيمسك فيه بايده وسنانه طبعا اخيرا هيخلص من البلوة اللى عنده وهيخلص من كلمة عايزة يا بابا .......... ويسلمها لواحد تمسك فى رقبته

وتلاقى الراجل يا عينى مش طايق العريس بس هيعمل ايه مضطر وكل واحد منهم بيقول حاجة بيكون له نيه تانية

خاااااااااااااااااااااااااااااااالص

ابو العروسة اول ما شاف العريس قال "اهلا اهلا يا ابنى والله احنا بنشترى راجل"

وفى سره.." راجل قال راجل قال وهو بقى فيه رجاله فى الزمن الاغبر اللى احنا عايشينه ده؟؟

ده بقى زمن الخنافس والعرس......... جتكم وكسة كلكم شباب فسدان بتوع الفيسكو.... والحظاظة ....والكلام الفارغ ايخيه

العريس قاعد عامل مكسوف ومش عارف يتكلم "ربنا يخليك يا عمى اهو ده العشم برضوا"

وفى سره.."خلصنا يا خويا وقول عايز كام فى البيعة دى شبكة ومؤخر وقيمة ونايمة ...والعشم فى انك تتهاود معايا وتقسطهم بدل ما تكسر وسطى ووسط اهلى

اهى الهانم بنتك مش السفيرة عزيزة.......... دى كبيرها طشت وكوز وحلتين المونيوم

العروسة.. تخرج هتموت من الكسوف وقال يعنى عمرها ما اتكلمت مع رجالة " اهلا ...تشرفنا ..نورتنا"

فى سرها.." يا دى الخيبة قال نورنا قال بلا نيلة..... دلوقتى النور يقطع لما شاف خلقتك

يعنى هو الواحد كان ناقص ضلمة.......... مهو كفاية حياته مضلمة خلقة...ولا الواحد كان ناقص حد يخدمه ويقوله رايح فين........ وجاى مين اهو الواحد بعد كده مش هيعرف يخلع مع اصحابه على الديسكو

.يوووووووه ............... يا شيخ روح كده شكلك هتكتم على نفسى ........ وانت شبه بتاع البليله

ام العروسة.." اهلا وسهلا يا ابنى...منور امال فين الحاجة؟؟ ما شرفتناش ليه؟؟

فى سرها.." الهى تكون مقطوع من شجرة .........وامك ماتت وشبعت موت ..اهو تريح البت ويكون من حظها ونصيبها ان ما لهاش حماه ام اربعة واربعين

العريس.."قريب ان شاء الله تزوركم وتبارك الجواز"

فى سره.." قال تبارك قال ...هى اصلا مش عايزة تشوف خلقتكم خالص ......ولا تعرفكم........ يعنى هى كانت ناقصة واحدة تقرفها وتصرف عليها ..مش كفاية انا لسه بيتصرف عليا وكل يوم تسم بدنى بالكلام يلا اهو الاقى حد ياخد نصيبه معايا

العروسة.." اه..لازم فعلا طنط تشرفنا واحنا لينا بركة الا هى"

فى سرها.." قال بركة قال" بركة السبع" جتها كسر رجليها وتنشك فى معاميعها

الواحد كان عايز واحد لقيط...لا اب ولا ام

وخصوصا الام ويا حبذا بقى لو كان حاصل على شهادة الجودة من دار الايتام

ابو العروسة.." ها يا حبيبى قولى بقى ...ان شاء الله ناوى على ايه .........وايه امكانياتك؟؟

فى سره.." اكيد ناوى تجبلى شلل والرعاش ..... وهو شباب اليومين دول حيلته حاجة

...بس على مين انا لازم ادفعك دم قلبك انت واهلك ......اه امال هتاخد البت كده ببلاش على الجاهز

وانا علمت وكبرت وربيت كل ده فين تمنه ؟؟

هى سايبه ولا سايبه ........ امال هنكسر وسط مين فى الجهاز والعفش والذى منه ؟؟

زى ما اتكسر وسطى عليها هى واخواتها

العريس.." زى ما تحب يا عمى .....اللى حضرتك تأمرنى بيه

فى سره.." عمك دبب وحبك برص....خلصنا يا خويا وقول عايز كام خلينا نخلص من الرزيه دى اقصد الجوازة دى

ام العروسة.." احنا يا حبيبى يهمنا راحة بنتنا... وكل اللى تجيبه كويس المهم الراجل وشخصيته

فى سرها.." هىهى قال سخصية قال ؟؟

لا يا اخويا احنا عايزين واحد لا بيهش ولا بينش مش ناقصينك تجيب للبت كأبه

قول بقى هتدفع كام فى البت .....اه دى ليها تمنها

وقال بنشترى راجل يا خويا ما ابوها قاعد قدامك اهو كان عملى ايه ؟

كحيان وفقران وصدمان وعدمان كانت الرجوله اكيلتناه؟؟.......... بلا وكسة

العريس.." والله يا طنط الراى رايكم انا من ايدكم دى لايدكم دى"

فى سره.." جاتكم قطع ايدكم ورقبتكم .......ده الكلام والحبتين دول دلوقتى

بعد كده مش هنخلص من كلمة هات هات جاتكم الهيتهات كلكم.

لكن صبركم بالله عليا لما تيجى عندى البيت بس........ هطلعه بلاء على جتتها وجتت اللى خلفوها

ابو العروسة منشكح اوى.." خلاص يا ابنى شوف احنا علينا نص العفش وانت النص........ والفاضى يدى للمليان واهى فى بيتها

فى سره.." الود ودى تشيل وتدبس انت فى كله ...الواحد لسه عنده مصايب غيرها .....هانجيبلهم منين ادفع يا اخويا مش كفايه هنديك بت زى الفل

عود ورور كده........ ياختى على جمالها

العريس.." تمام كده يا عمى طيب وحاجة الكهرباء والمطبخ؟؟

فى سره.." كسرتوا وسطى الله يقطم ضهركم والله ما ادفع اكتر من كده ....نحلتوه وبرى"

ام العروسة.." حاجة الكهرباء عليك والمطبخ علينا

فى سرها.." الهى تتكهرب يا بعيد.......... بس بعد ما تكتب الكتاب.......... ونعلى الجواب علشان البت تورثك

العريس.." ها ....يا ترى عروستنا موافقة؟؟

نقرأ الفاتحة

فى سره.." الهى ما توافقى انا مش عايز البيعة دى

انا مش ناقصك انتى واهلك هتخربوا بيتى

العروسة.." طبعا مكسوفة وحطها وشها فى الجزمة... اقصد فى الارض

فى سرها.." يلا خليه يشرب بقى.......سيبك انت ده انا ناويالك على حتة نيه عسل

"وهى بتخن صوتها" استنى عليا يا حسب الله

ام العروسة.." السكوت علامة الرضا "

فى سرها.." دى مش طايقاك بس يلا اهو تلاقى حد تمسك فى رقبته شوية

وتحل عنا وبعدين تعمل ايه يا عين امها ......كبرت ومش عايزة تبور وتعنس

العريس.." مكسوف قال يعنى فرحان وهو هيتنقط "فعلا شكلها خجول وبتتكسف"

فى سره.." وهو يا ختى فيه بت دلوقتى بتتكسف هتعملوهم علينا ولا ايه يا اخوانا ...ولا علشان معدينها بمذاجنا؟؟

لا احنا ما بناكلش من كلام الاونطة ده ....ما تعملوهمش علينا

وفى الاخر تلاقيهم كلهم رافعين ايديهم .....وبيقراو الفاتحة

العريس.." بيقرأها طبعا على روحه مقدما"

ابو العروسة.." ما صدق خلص من بنته وانزاح الهم

ام العروسة.." ما صدقت ودبستهاله وارتاحت من الضرب والتلطيش بتاع كل يومط

العروسة .." بتقراها على روح العريس ....وامه..... واهله كلهم هما واللى خلفوهم"

انا بقى محصلش معايا ولا حاجة من دى الحق يتقال من وراء سى احسان اه الراجل قيمة .....وسيما ومش دقة قديمة

بس هو متزمت حبتين مش بيخلينى اروح الفيسكو غير يوم واحد فى الشهر

الصراحة حصل اكتر من كده بس ايه على مين فى الاخر وقع على بوزه....... وكان ليه القرف اقصد الشرف .......وكلبشنى

سلام بقى علشان ارجع الزنزانه لحسن ميعاد الزيارة خلص
وكل جوازة وانتم طيبين

شفقة